Governor Shiv Pratap Shukla | 'జననీ జన్మభూమిశ్చ..' స్ఫూర్తితో ముందుకు సాగాలి

Published: 02 Jun 2026 • 07:03 AM

ఆకేరు న్యూస్, హైదరాబాద్: తెలంగాణ రాష్ట్ర అవతరణ దినోత్సవ వేడుకలు హైదరాబాద్‌లోని లోక్‌భవన్‌లో అత్యంత వైభవంగా జరిగాయి. ఈ సందర్భంగా తెలంగాణ రాష్ట్ర గవర్నర్ శివ ప్రతాప్ శుక్లా ముఖ్యఅతిథిగా విచ్చేసి, జాతీయ పతాకాన్ని ఆవిష్కరించారు. అనంతరం రాష్ట్ర ప్రజలకు, ప్రపంచవ్యాప్తంగా స్థిరపడిన తెలంగాణ బిడ్డలందరికీ ఆయన హృదయపూర్వక రాష్ట్ర అవతరణ దినోత్సవ శుభాకాంక్షలు తెలియజేశారు.

* అమరవీరుల త్యాగాల ఫలమే తెలంగాణ..

ఈ సందర్భంగా గవర్నర్ మాట్లాడుతూ.. దశాబ్దాల పాటు సాగిన ప్రజాస్వామ్య పోరాటాలు, ఎందరో అమరవీరుల త్యాగాల ఫలితంగానే తెలంగాణ రాష్ట్రం ఆవిర్భవించిందని గుర్తుచేశారు.

“జననీ జన్మభూమిశ్చ స్వర్గాదపి గరీయసీ” (కన్నతల్లి, జన్మభూమి స్వర్గం కంటే మిన్న) అనే మహోన్నత స్ఫూర్తితో ప్రతి ఒక్కరూ రాష్ట్ర ప్రగతి కోసం ముందుకు సాగాలని ఆయన పిలుపునిచ్చారు.

* వ్యవసాయం, ఐటీ రంగాల్లో అంతర్జాతీయ గుర్తింపు..

తెలంగాణ సంస్కృతి, సంప్రదాయాలు, విశిష్టమైన వ్యవసాయ వారసత్వమే ఈ రాష్ట్రానికి జీవనాడి అని గవర్నర్ కొనియాడారు. కాకతీయుల కాలం నాటి గొలుసుకట్టు చెరువుల నుంచి నేటి ఆధునిక సాగునీటి ప్రాజెక్టుల వరకు తెలంగాణ రైతాంగం చేస్తున్న కృషి ఎంతో ప్రశంసనీయమన్నారు.

కేవలం వ్యవసాయ రంగంలోనే కాకుండా.. ఐటీ, ఫార్మా, స్టార్టప్ రంగాల్లో కూడా తెలంగాణ అంతర్జాతీయంగా ప్రత్యేక గుర్తింపు సాధించిందని ఆయన అభినందించారు.

* సుసంపన్న తెలంగాణే లక్ష్యం..

రాజ్యాంగ విలువలు, ‘సర్వేజనా సుఖినోభవంతు’ (సర్వే భవంతు సుఖినః) అనే సర్వమానవ కల్యాణ స్ఫూర్తితో సుసంపన్నమైన తెలంగాణ నిర్మాణం జరగాలని గవర్నర్ ఆకాంక్షించారు.

గ్రామీణాభివృద్ధి, పట్టణాభివృద్ధి సమపాళ్లలో సాగుతూ, అన్ని వర్గాల సంక్షేమమే ధ్యేయంగా పాలన సాగాలని కోరారు. రాబోయే రోజుల్లో దేశ సర్వతోముఖాభివృద్ధిలో తెలంగాణ రాష్ట్రం మరింత కీలక పాత్ర పోషించాలని గవర్నర్ శివ ప్రతాప్ శుక్లా ఆకాంక్షించారు. ఈ వేడుకల్లో పలువురు ఉన్నతాధికారులు, ప్రముఖులు పాల్గొన్నారు.