MANCHERIAL | కేజీబీవీ విద్యార్థిని మిస్సింగ్ కేసు

* హైదరాబాద్ వెళ్తుండగా పట్టుకున్న పోలీసులు

ఆకేరు న్యూస్, మంచిర్యాల: మంచిర్యాల జిల్లాలో కలకలం రేపిన కస్తూర్బాగాంధీ బాలికల విద్యాలయం (KGBV) ఇంటర్ విద్యార్థిని అదృశ్యం కేసు సుఖాంతమైంది. అయితే, ఈ కేసు దర్యాప్తులో పోలీసులకు సైతం మైండ్ బ్లాంక్ అయ్యే నిజాలు వెలుగులోకి వచ్చాయి. చదువుకోవడం ఇష్టం లేక కాలేజీ నుండి పారిపోయిన సదరు విద్యార్థిని.. తెలంగాణ ప్రభుత్వ ఉచిత బస్సు సౌకర్యాన్ని వాడుకుంటూ మూడు రోజుల పాటు రాష్ట్రవ్యాప్తంగా విహరించడం ఇప్పుడు స్థానికంగా తీవ్ర చర్చనీయాంశంగా మారింది.

మంచిర్యాల జిల్లా కోటపల్లి మండల కేంద్రంలోని కస్తూర్బాగాంధీ బాలికల విద్యాలయంలో ఓ బాలిక ఇంటర్ ఫస్ట్ ఇయర్ చదువుతోంది. అయితే, ఈ నెల 5వ తేదీన కాలేజీ ప్రాంగణం నుండి ఆమె హఠాత్తుగా మాయమైంది. విద్యార్థిని ఎంతకూ కనిపించకపోవడంతో ఆందోళన చెందిన కళాశాల సిబ్బంది, తల్లిదండ్రులకు సమాచారం అందించారు. తమ కుమార్తె అదృశ్యం కావడంపై తల్లిదండ్రులు తీవ్ర ఆందోళనతో కోటపల్లి పోలీస్ స్టేషన్‌లో ఫిర్యాదు చేశారు. కేసు నమోదు చేసుకున్న పోలీసులు రంగంలోకి దిగి విచారణ ప్రారంభించారు.

* లిఫ్ట్ అడిగి ప్రయాణం.. ఆధార్ కార్డుతో ఫ్రీ బస్సులు..

పోలీసులు రంగంలోకి దిగి సీసీటీవీ ఫుటేజీలు, సాంకేతిక ఆధారాలను పరిశీలించగా షాకింగ్ విషయాలు తెలిశాయి. చదువుపై ఆసక్తి లేని సదరు విద్యార్థిని, ఎలాగైనా కాలేజీ నుండి తప్పించుకోవాలని పక్కా ప్లాన్ వేసింది.

కాలేజీ నుండి బయటపడిన తర్వాత కోటపల్లి సమీపంలో ఓ ద్విచక్రవాహనదారుడిని లిఫ్ట్ అడిగి చెన్నూరు చేరుకుంది. మహాలక్ష్మి స్కీమ్ వాడుకుంటూ చెన్నూరు బస్టాండ్‌కు చేరుకున్న ఆమె, తెలంగాణ ప్రభుత్వ మహిళల ఉచిత బస్సు ప్రయాణ సదుపాయాన్ని (మహాలక్ష్మి పథకం) చక్కగా వాడుకుంది. తన వద్ద ఉన్న ఆధార్ కార్డును చూపించి జీరో టికెట్ తీసుకుంది. చెన్నూరు నుండి మంచిర్యాల.. అక్కడి నుండి నేరుగా ఆదిలాబాద్ వెళ్ళింది. మళ్ళీ ఆదిలాబాద్ నుండి తిరుగు ప్రయాణమై మంచిర్యాల మీదుగా కరీంనగర్ చేరుకుంది. ఇలా మూడు రోజుల పాటు ఎలాంటి ఖర్చు లేకుండా బస్సుల్లోనే ప్రయాణిస్తూ గడిపేసింది.

* హైదరాబాద్ వెళ్తుండగా అడ్డుకున్న పోలీసులు…

కరీంనగర్ చేరుకున్న విద్యార్థిని.. అక్కడి నుండి హైదరాబాద్ వెళ్లే ఆర్టీసీ బస్సు ఎక్కింది. అయితే, అప్పటికే జిల్లాల వ్యాప్తంగా పోలీసులను అప్రమత్తం చేసిన ఉన్నతాధికారులు, బాలిక ఫోటో ఆధారంగా అన్ని ప్రధాన బస్టాండ్లు, రూట్లలో నిఘా పెట్టారు. కరీంనగర్ నుండి హైదరాబాద్ వైపు వెళ్తున్న బస్సులను తనిఖీ చేస్తుండగా, సదరు విద్యార్థిని పోలీసుల కంటపడింది.

వెంటనే ఆమెను ఆధీనంలోకి తీసుకున్న పోలీసులు సురక్షితంగా రక్షించారు. ప్రాథమిక విచారణలో కేవలం చదువుకోవడం ఇష్టం లేక, భయంతోనే కాలేజీ నుండి పారిపోయినట్లు బాలిక అంగీకరించింది. అనంతరం పోలీసులు ఆమె తల్లిదండ్రులకు సమాచారం అందించి, కౌన్సిలింగ్ ఇచ్చి బాలికను వారికి అప్పగించడంతో కథ సుఖాంతమైంది. మూడు రోజుల పాటు పోలీసులను, తల్లిదండ్రులను టెన్షన్ పెట్టిన ఈ ‘ఉచిత బస్సు ప్రయాణం’ ఉదంతం జిల్లాలో హాట్ టాపిక్‌గా మారింది.