ANDE SRI JAYANTI | కవులకు ప్రభుత్వ గౌరవం

* ఉద్యమకారులకు సముచిత గౌరవం

ఆకేరు న్యూస్, హైదరాబాద్:
హైదరాబాద్‌లోని తెలంగాణ అమరవీరుల స్మారకం (అమర జ్యోతి) వద్ద ప్రజాకవి, పద్మశ్రీ అందే శ్రీ జయంతి వేడుకలను ఘనంగా నిర్వహించారు. ఈ సందర్భంగా ఆయన చిత్రపటానికి రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్, ఎమ్మెల్సీ ప్రొఫెసర్ కోదండరాం, మాజీ ఎమ్మెల్సీ రాములు నాయక్, ఉద్యమ నాయకులు మోతె శోభన్ రెడ్డితో పాటు పలువురు కవులు, కళాకారులు పుష్పాంజలి ఘటించి, ఘనంగా నివాళులర్పించారు.

* ఉద్యమానికి దిక్సూచి -మంత్రి పొన్నం ప్రభాకర్..

ఈ సందర్భంగా మంత్రి పొన్నం ప్రభాకర్ మాట్లాడుతూ, తెలంగాణ మలిదశ ఉద్యమంలో అందే శ్రీ గారు రచించిన “జయ జయహే తెలంగాణ” గీతం కోట్ల మందిలో ఉద్యమ స్ఫూర్తిని రగిల్చిందని కొనియాడారు. ఈ పాట సబ్బండ వర్గాలను (అన్ని వర్గాల ప్రజలను) ఒక్క తాటిపైకి తీసుకువచ్చి, ఉద్యమాన్ని ఉరకలెత్తించిందని గుర్తుచేశారు. తెలంగాణ సంస్కృతిని, అస్తిత్వాన్ని ప్రపంచానికి చాటిచెప్పిన మహోన్నత కవి అందే శ్రీ అని ఆయన ప్రశంసించారు.

* ఉద్యమకారుల గుర్తింపు కమిటీ కీలక సమావేశం..

నివాళులర్పించిన అనంతరం, తెలంగాణ ఉద్యమంలో క్రియాశీలక పాత్ర పోషించిన కవులు, కళాకారులు, రచయితలతో ‘ఉద్యమకారుల గుర్తింపు కమిటీ’ ప్రత్యేక సమావేశాన్ని నిర్వహించింది. మలిదశ ఉద్యమంలో పాల్గొన్న నిజమైన ఉద్యమకారులను గుర్తించి, వారిని ప్రభుత్వ పరంగా ఏ విధంగా గౌరవించాలనే అంశంపై ఈ కమిటీ విస్తృతంగా చర్చిస్తోంది. ఇందులో భాగంగా కవులు, కళాకారుల నుంచి సలహాలు, సూచనలు మరియు అభిప్రాయాలను కమిటీ సభ్యులు రికార్డు చేశారు.

* అందరి అభిప్రాయాలతోనే ముందడుగు..

ఈ సందర్భంగా మంత్రి పొన్నం ప్రభాకర్ మాట్లాడుతూ.. “తెలంగాణ రాష్ట్ర సాధనలో ముఖ్య భూమిక పోషించిన అన్ని వర్గాల ప్రజలను గుర్తించి, గౌరవించుకోవడమే మా ప్రజా పాలన ప్రభుత్వ ముఖ్య ఉద్దేశం. ఇందుకోసం ఏర్పాటైన ఉద్యమకారుల గుర్తింపు కమిటీ గత 15 రోజులుగా నిరంతరాయంగా అభిప్రాయ సేకరణ చేస్తోంది. ప్రతి ఒక్కరి సలహాలను పరిగణనలోకి తీసుకుంటున్నాం. తెలంగాణ ఉద్యమ స్ఫూర్తికి కవులు, కళాకారులు, రచయితలే మూలకారకులు. సబ్బండ వర్గాల నుంచి వస్తున్న ప్రజా అభిప్రాయాల ఆధారంగానే ప్రభుత్వం తదుపరి నిర్ణయాలు తీసుకుంటుంది” అని స్పష్టం చేశారు.

ఈ సమావేశంలో ఉద్యమ కాలం నాటి జ్ఞాపకాలను గుర్తుచేసుకుంటూ, నిజమైన ఉద్యమకారులకు న్యాయం జరిగేలా చూడాలని కవులు, కళాకారులు కమిటీకి విజ్ఞప్తి చేశారు.