Rayaparthi | మైలారం విద్యార్థులకు ఘన సన్మానం

Published: 15 Aug 2026 • 08:59 PM

* మైలారం ఉన్నత పాఠశాల ప్రతిభావంతులకు ఎస్ ఆర్ ఆర్ ఫౌండేషన్ ఘన సన్మానం

ఆకేరు న్యూస్, రాయపర్తి:

మండలంలోని మైలారం గ్రామ జిల్లా పరిషత్ సెకండరీ ప్రభుత్వ పాఠశాలలో విద్యార్థుల ప్రతిభకు సముచిత గౌరవం లభించింది. గడిచిన విద్యాసంవత్సరంలో 10వ తరగతి పదికి పది (10/10) జీపీఏ సాధించి పాఠశాల స్థాయిలో మొదటి స్థానంలో నిలిచిన విద్యార్థి పట్టపురం రచన కు రూ. 3,016/- నగదు బహుమతి మరియు జ్ఞాపిక (షీల్డ్), అలాగే ద్వితీయ స్థానంలో నిలిచిన విద్యార్థి అన్నబోయిన సుహిత కు రూ. 2,016/- నగదు బహుమతి మరియు జ్ఞాపిక (షీల్డ్) ఇచ్చి ఎస్ ఆర్ ఆర్ ఫౌండేషన్ ఆధ్వర్యంలో ఘనంగా సన్మానించారు.

ఈ కార్యక్రమానికి ఎస్ ఆర్ ఆర్ ఫౌండేషన్ చైర్మన్ పరుపాటి శ్రీనివాస్ రెడ్డి, తమ మండల ప్రతినిధులు లేతకుల రంగారెడ్డి, ద్వారా అందజేశారు ఈ కార్యక్రమంలో స్థానిక సర్పంచ్ చిర్ర వేణు, హెచ్ ఎం ఉమాదేవి, ముఖ్య నాయకులు గూడెల్లి వెంకయ్య, గబ్బిట యాకయ్య, సంకినేని ఎల్లస్వామి, వార్డు సభ్యులు పరుపాటి రవీందర్ రెడ్డి, గాడిపల్లి రాములు, తాటికాయల కేతమ్మ ప్రతిభ చూపిన విద్యార్థులకు శాలువాలు కప్పి బహుమతులను ప్రదానం చేశారు.

* విద్యార్థుల్లో పోటీతత్వాన్ని పెంచడమే లక్ష్యం

ఈ సందర్భంగా ఎస్ ఆర్ ఆర్ ఫౌండేషన్ మండల ప్రతినిధి లేతకుల రంగారెడ్డి మాట్లాడుతూ, గ్రామీణ ప్రాంత విద్యార్థులలో ఉన్న ప్రతిభను వెలికితీసి వారిని మరింత ఉన్నత చదువుల వైపు ప్రోత్సహించడానికే ఈ నగదు బహుమతులు, ప్రశంసా పత్రాలు అందిస్తున్నామని తెలిపారు. పదో తరగతి ఫలితాలు విద్యార్థుల భవిష్యత్తుకు పునాది అని, ఈ రకమైన ప్రోత్సాహకాలు మిగతా విద్యార్థులలో కూడా పోటీతత్వాన్ని, పట్టుదలను పెంచుతాయని ఆయన ఆశాభావం వ్యక్తం చేశారు. ప్రభుత్వ పాఠశాల విద్యార్థులు ఏ రంగంలోనూ తక్కువ కాదని నిరూపిస్తున్నారని కొనియాడారు.

* పాఠశాల ఉపాధ్యాయులు, గ్రామస్థుల అభినందనలు

విద్యార్థుల భవిష్యత్తును కాంక్షిస్తూ, వారికి ఆర్థికంగానూ, మానసికంగానూ అండగా నిలుస్తున్న ఎస్ ఆర్ ఆర్ ఫౌండేషన్ సేవా కార్యక్రమాలను పాఠశాల ప్రధానోపాధ్యాయులు (HM), ఉపాధ్యాయ బృందం మరియు గ్రామ పెద్దలు ప్రత్యేకంగా అభినందించారు. ఫౌండేషన్ చైర్మన్ పరుపాటి శ్రీనివాస్ రెడ్డి అందిస్తున్న సహకారం ఎంతో మంది విద్యార్థులకు స్పూర్తినిస్తుందని కొనియాడారు.

ఈ కార్యక్రమంలో పాఠశాల ఉపాధ్యాయులు, ఎస్ ఆర్ ఆర్ ఫౌండేషన్ ప్రతినిధులు, విద్యార్థుల తల్లిదండ్రులు మరియు పెద్ద సంఖ్యలో విద్యార్థులు పాల్గొన్నారు.