Delhi | ఢిల్లీలో రెండో రోజు బీజేపీ కీలక సమావేశాలు..

Published: 23 Aug 2026 • 07:34 PM

* మోదీ 25 ఏళ్ల పాలనపై విస్తృత చర్చ

అకేరు న్యూస్ ఢిల్లీ: దేశ రాజధాని ఢిల్లీలో బీజేపీ రాష్ట్రాల అధ్యక్షులు, రాష్ట్ర ఇన్‌ఛార్జిల సమావేశాలు రెండో రోజు కొనసాగుతున్నాయి. దేశవ్యాప్తంగా పార్టీ సంస్థాగత బలోపేతం, రాజకీయ అంశాలు, కేంద్ర ప్రభుత్వ పథకాలను ప్రజల్లోకి తీసుకెళ్లే అంశాలపై నేతలు చర్చిస్తున్నారు.

ప్రధాని నరేంద్ర మోదీ సీఎంగా, ప్రధానమంత్రిగా ప్రజాజీవితంలో 25 ఏళ్ల ప్రస్థానం పూర్తి చేసుకున్న నేపథ్యంలో ఆయన పాలనలో చేపట్టిన కార్యక్రమాలు, సాధించిన విజయాలపై సమావేశంలో ప్రధానంగా చర్చ జరిగినట్లు సమాచారం. గుజరాత్ ముఖ్యమంత్రిగా ప్రారంభమైన మోదీ రాజకీయ ప్రస్థానం.. ప్రధానమంత్రిగా దేశానికి అందించిన పాలన వరకు వివిధ అంశాలను పార్టీ నేతలు సమీక్షిస్తున్నారు.

మోదీ ప్రభుత్వ విధానాలు, సంక్షేమ పథకాలు, అభివృద్ధి కార్యక్రమాలు, దేశవ్యాప్తంగా చేపట్టిన మౌలిక వసతుల ప్రాజెక్టులను ప్రజలకు విస్తృతంగా వివరించాలని బీజేపీ నాయకత్వం నిర్ణయించినట్లు తెలుస్తోంది. ముఖ్యంగా ప్రతి రాష్ట్రంలో మోదీ పాలనపై ప్రత్యేక ప్రచార కార్యక్రమాలు నిర్వహించాలని రాష్ట్రాల అధ్యక్షులు, ఇన్‌ఛార్జిలకు దిశానిర్దేశం చేసినట్లు సమాచారం.

రాబోయే రోజుల్లో కేంద్ర ప్రభుత్వ విజయాలను ప్రజల్లోకి తీసుకెళ్లడంతో పాటు పార్టీ కార్యకర్తలను మరింత చురుకుగా భాగస్వామ్యం చేయడం, సంస్థాగతంగా పార్టీని బలోపేతం చేయడంపైనా సమావేశంలో దృష్టి సారించినట్లు తెలుస్తోంది. మొత్తంగా ఢిల్లీలో జరుగుతున్న ఈ సమావేశాలు బీజేపీ భవిష్యత్ రాజకీయ వ్యూహానికి కీలకంగా మారుతున్నాయి.