CM Chandrababu Naidu | నేడు నరసాపురం, మొగల్తూరు కు ఏపీ సీఎం

Published: 01 Sep 2026 • 01:48 PM

* పశ్చిమ గోదావరి జిల్లాలో పర్యటన

* లబ్ధిదారులకు పింఛన్ల పంపిణీ

* సభలో ప్రసంగించనున్న సీఎం చంద్రబాబు

* ఆయన ప్రస్తావించనున్న విషయాలపై ఆసక్తి

ఆకేరు న్యూస్, మొగల్తూరు/నరసాపురం: ఆంధ్రప్రదేశ్ ముఖ్యమంత్రి నారా చంద్రబాబు నాయుడు నేడు పశ్చిమ గోదావరి జిల్లాలో పర్యటించనున్నారు. మొగల్తూరు, నరసాపురం ప్రాంతాల్లో జరగనున్న పలు కార్యక్రమాల్లో ఆయన పాల్గొననున్నారు. ముఖ్యంగా సామాజిక భద్రతా పింఛన్ల పంపిణీ కార్యక్రమానికి సీఎం ప్రాధాన్యం ఇవ్వనున్నారు. పర్యటనలో భాగంగా నరసాపురంలో పింఛన్ లబ్ధిదారులతో సీఎం చంద్రబాబు మాట్లాడనున్నారు. ప్రభుత్వం అందిస్తున్న పింఛన్లు లబ్ధిదారులకు ఏ మేరకు ఉపయోగపడుతున్నాయో పలువురు లబ్ధిదారులతో మాట్లాడి వారి సమస్యలు, అవసరాలు, ప్రభుత్వ పథకాలపై అభిప్రాయాలను అడిగి తెలుసుకోనున్నట్లు సమాచారం.

అనంతరం మొగల్తూరులో నిర్వహించే ప్రజావేదిక సభలో చంద్రబాబు ప్రసంగించనున్నారు. రాష్ట్ర ప్రభుత్వ అభివృద్ధి, సంక్షేమ కార్యక్రమాలు, ప్రజలకు అందిస్తున్న పథకాలు, భవిష్యత్ కార్యాచరణపై ఆయన కీలకంగా మాట్లాడే అవకాశం ఉంది. స్థానిక సమస్యలు, అభివృద్ధి పనులపై కూడా సీఎం స్పందించే అవకాశం ఉందని అధికారులు, పార్టీ వర్గాలు చెబుతున్నాయి. సీఎం పర్యటన నేపథ్యంలో మొగల్తూరు, నరసాపురం ప్రాంతాల్లో అధికారులు విస్తృత ఏర్పాట్లు చేశారు. సభా ప్రాంగణం, పింఛన్ పంపిణీ, సీఎం ముఖాముఖి కార్యక్రమాల కోసం ప్రత్యేక ఏర్పాట్లు చేపట్టారు. భారీ సంఖ్యలో ప్రజలు, పింఛన్ లబ్ధిదారులు ఈ కార్యక్రమాలకు హాజరయ్యే అవకాశం ఉండటంతో భద్రతా ఏర్పాట్లు కట్టుదిట్టం చేశారు. నేడు మొగల్తూరు, నరసాపురం ప్రాంతాల్లో సీఎం చంద్రబాబు పర్యటన రాజకీయంగానూ, పరిపాలనాపరంగానూ ప్రాధాన్యం సంతరించుకుంది. ప్రజావేదిక సభలో సీఎం ఏ అంశాలపై కీలక ప్రకటనలు చేస్తారన్న ఆసక్తి నెలకొంది.