CM Revanth Reddy | సీఎం రేవంత్‌రెడ్డితో డీజీపీ సీవీ ఆనంద్ భేటీ

Published: 18 Sep 2026 • 03:51 PM

* 22ఏ భూములపై విచారణ..

* గణేశ్ నిమజ్జన ఏర్పాట్లు, శాంతిభద్రతలపై చర్చ

ఆకేరు న్యూస్, హైదరాబాద్ : అసెంబ్లీ హాల్‌లో ముఖ్యమంత్రి రేవంత్‌రెడ్డితో డీజీపీ సీవీ ఆనంద్ భేటీ అయ్యారు. రాష్ట్రంలో కీలకంగా మారిన 22ఏ భూముల అంశం, గణేశ్ నిమజ్జన ఏర్పాట్లు, శాంతిభద్రతల పరిస్థితిపై ఇరువురు చర్చించినట్లు సమాచారం.

* 22ఏ అంశంపై దర్యాప్తు..

22ఏ భూములకు సంబంధించిన సమస్యలపై ప్రభుత్వం దృష్టి సారించిన నేపథ్యంలో.. ఈ అంశానికి సంబంధించి జరుగుతున్న విచారణ, పోలీసు శాఖకు సంబంధించిన అంశాలపై డీజీపీ సీఎంకు వివరాలు అందించినట్లు తెలుస్తోంది. 22ఏ జాబితాలో భూముల చేర్పులు, తొలగింపులు, అక్రమాలకు సంబంధించిన ఫిర్యాదులపై ప్రభుత్వం ఇప్పటికే దృష్టి పెట్టింది. అసెంబ్లీలో సీఎం రేవంత్‌రెడ్డి 22ఏ అంశంపై ప్రభుత్వం తీసుకుంటున్న చర్యలను వివరించిన నేపథ్యంలో డీజీపీతో జరిగిన భేటీకి ప్రాధాన్యత ఏర్పడింది.

* గణేశ్ నిమజ్జనంపై ప్రత్యేక దృష్టి..

మరోవైపు హైదరాబాద్‌లో కొనసాగుతున్న గణేశ్ ఉత్సవాలు, ఈ నెల 25న జరగనున్న నిమజ్జన కార్యక్రమాలపై కూడా సీఎం, డీజీపీ చర్చించినట్లు సమాచారం. నిమజ్జనానికి భారీగా భక్తులు, గణేశ్ విగ్రహాలు తరలివచ్చే నేపథ్యంలో బందోబస్తు, ట్రాఫిక్ నియంత్రణ, నిమజ్జన మార్గాలు, భద్రతా చర్యలపై పోలీసు శాఖ ప్రత్యేక దృష్టి సారించింది.

ఇప్పటికే డీజీపీ సీవీ ఆనంద్ పోలీసు ఉన్నతాధికారులతో సమీక్ష నిర్వహించి గణేశ్ మండపాల వివరాలను డిజిటల్‌గా నమోదు చేయడం, నిమజ్జన మార్గాలను ముందుగానే మ్యాపింగ్ చేయడం, అవసరమైన ప్రాంతాల్లో బాంబ్ డిటెక్షన్ బృందాలు, డాగ్ స్క్వాడ్‌లను మోహరించాలని ఆదేశించారు.

హైదరాబాద్‌లో గణేశ్ ఉత్సవాలు ప్రశాంతంగా జరిగేలా పోలీసు, మున్సిపల్ శాఖలు సమన్వయంతో పనిచేయాలని సీఎం రేవంత్‌రెడ్డి ఇప్పటికే ఆదేశించారు. నిమజ్జన చెరువుల వద్ద క్రేన్లు, ఇతర మౌలిక సదుపాయాలు ఏర్పాటు చేయడంతో పాటు ఉత్సవాలు పూర్తయ్యే వరకు నిరంతర పర్యవేక్షణ కొనసాగించాలని సూచించారు.

* లా అండ్ ఆర్డర్‌పైనా సమీక్ష..

రాష్ట్రవ్యాప్తంగా శాంతిభద్రతల పరిస్థితి, సున్నిత ప్రాంతాల్లో పోలీసు బందోబస్తు, పండుగల సందర్భంగా తీసుకోవాల్సిన భద్రతా చర్యలు వంటి అంశాలపైనా సీఎంకు డీజీపీ వివరించినట్లు తెలుస్తోంది. గణేశ్ ఉత్సవాలు, నిమజ్జన సమయంలో ఎలాంటి అవాంఛనీయ ఘటనలకు తావులేకుండా ముందస్తు చర్యలు తీసుకోవడంపై ప్రత్యేకంగా చర్చ జరిగినట్లు సమాచారం. హైదరాబాద్‌లో నిమజ్జన మార్గంలో ఇప్పటికే ఉన్నతాధికారులు క్షేత్రస్థాయి పరిశీలనలు నిర్వహించారు.

సీసీ కెమెరాల ద్వారా రూట్లను కమాండ్‌ సెంటర్ నుంచి పర్యవేక్షించడంతో పాటు భారీగా పోలీసు బలగాలను మోహరించేందుకు ఏర్పాట్లు చేస్తున్నారు. 22ఏ భూముల అంశంపై విచారణ, గణేశ్ నిమజ్జన బందోబస్తు, రాష్ట్రంలో శాంతిభద్రతల పరిస్థితిపై సీఎం–డీజీపీ భేటీలో చర్చ జరగడం ప్రస్తుతం ప్రాధాన్యత సంతరించుకుంది.