B Vinod Kumar | ప్రజా సమస్యలపై ఏఐఎస్ఎఫ్ పోరాటం

Published: 29 Sep 2026 • 04:52 PM Updated: 29 Sep 2026 • 04:59 PM

* విద్యార్థుల సమస్యలపై స్పందించాలి

* మాజీ ఎంపీ బోయినపల్లి వినోద్ కుమార్

ఆకేరు న్యూస్, హనుమకొండ : ప్రజా సమస్యలపై పోరాటం చేస్తూ, ప్రగతిశీల ఆలోచనలతో ఆల్ ఇండియా స్టూడెంట్స్ ఫెడరేషన్‌ (AISF)ను ముందుకు తీసుకెళ్లాలని మాజీ ఎంపీ బోయినపల్లి వినోద్ కుమార్ అన్నారు. AISF 90వ వార్షికోత్సవం సందర్భంగా హనుమకొండలో నిర్వహించిన కార్యక్రమంలో ఆయన పాల్గొని ప్రసంగించారు. తొమ్మిది దశాబ్దాలుగా విద్యార్థి హక్కులు, ప్రజాస్వామ్య విలువలు, సామాజిక సమస్యలపై విద్యార్థులను చైతన్యపరుస్తూ AISF కొనసాగిస్తున్న ప్రస్థానం స్ఫూర్తిదాయకమన్నారు.

విద్యార్థి సంఘాలు కేవలం ఎన్నికలు, కళాశాల సమస్యలకే పరిమితం కాకుండా సమాజంలో ఎక్కడ సమస్య ఉన్నా స్పందించి ప్రజల ముందుకు తీసుకెళ్లాలని సూచించారు. దళిత, గిరిజన, వెనుకబడిన వర్గాలతో పాటు అన్ని వర్గాల విద్యార్థుల సమస్యల పరిష్కారం కోసం పోరాడాల్సిన బాధ్యత విద్యార్థి సంఘాలపై ఉందన్నారు. కులం, ప్రాంతం వంటి విభజనలకు అతీతంగా విద్యార్థుల హక్కుల కోసం సంఘటితంగా పోరాడాలని పేర్కొన్నారు.

* కుల ప్రాతిపదికన విభజన ఆందోళనకరం..

వివిధ రాజకీయ, సామాజిక భావజాలాలతో విద్యార్థి సంఘాలు పనిచేయడం ప్రజాస్వామ్యంలో సహజమేనని వినోద్ కుమార్ అన్నారు. అయితే కుల ప్రాతిపదికన విద్యార్థుల విభజన పెరగడం ఆందోళన కలిగించే పరిణామమని పేర్కొన్నారు. విద్యార్థుల్లో సామాజిక, రాజకీయ అవగాహన పెంచడంతో పాటు అన్ని వర్గాల సమస్యలను తమ సమస్యలుగా స్వీకరించాలని సూచించారు.

* విద్యార్థి ఉద్యమమే రాజకీయ అవగాహనకు పునాది..

తాను విద్యార్థి దశలో AISFలో పనిచేసిన అనుభవాలను వినోద్ కుమార్ గుర్తుచేసుకున్నారు. అప్పట్లో కళాశాల విద్యతో పాటు రాజకీయ చర్చలు, డిబేట్లు జరిగేవని, దేశంతో పాటు ప్రపంచవ్యాప్తంగా జరుగుతున్న పరిణామాలపై విద్యార్థులు చర్చించేవారని తెలిపారు. హనుమకొండలో గోడలపై నినాదాలు రాయడం, పోస్టర్లు అంటించడం వంటి ఉద్యమ కార్యక్రమాల్లో పాల్గొన్న రోజులను గుర్తుచేసుకున్నారు. ఇలాంటి అనుభవాలు తమలో ఉద్యమ స్ఫూర్తిని పెంచాయని అన్నారు.

తమ కాలంతో పోలిస్తే నేటి విద్యార్థులకు సమాచారాన్ని పొందేందుకు విస్తృత అవకాశాలు ఉన్నాయని చెప్పారు. సాంకేతిక పరిజ్ఞానాన్ని కేవలం వినోదం కోసం కాకుండా జ్ఞానం, సామాజిక అవగాహన, ప్రజా సమస్యల పరిష్కారం కోసం ఉపయోగించుకోవాలని సూచించారు.

* కొత్త ఆలోచనలతో ముందుకు సాగాలి

విద్యార్థి దశలో ఎదుర్కొన్న ఎన్నికలు, ఉద్యమ అనుభవాలను కూడా వినోద్ కుమార్ గుర్తుచేసుకున్నారు. విద్యార్థి నాయకులను ప్రోత్సహించడం వారి భవిష్యత్‌పై ప్రభావం చూపుతుందని అన్నారు. తమ కాలంలో భిన్న భావజాలాల మధ్య జరిగిన చర్చలు, వాదోపవాదాలు రాజకీయ అవగాహన పెంచాయని తెలిపారు.

ప్రపంచవ్యాప్తంగా సాంకేతిక, ఆర్థిక, సామాజిక రంగాల్లో వేగంగా మార్పులు జరుగుతున్న నేపథ్యంలో నేటి తరం వాటిని లోతుగా అధ్యయనం చేయాలని సూచించారు. మార్క్సిజం, సామాజిక ఆలోచనా విధానాలను కూడా ప్రస్తుత పరిస్థితులకు అనుగుణంగా కొత్త కోణంలో అధ్యయనం చేయాల్సిన అవసరం ఉందన్నారు.

AISF 90 ఏళ్ల చరిత్ర నుంచి స్ఫూర్తి పొంది నేటి సమస్యలను అర్థం చేసుకుని భవిష్యత్ తరాలకు కొత్త దిశ చూపాలని వినోద్ కుమార్ అన్నారు. విద్యార్థుల్లో సామాజిక బాధ్యత, ప్రజాస్వామ్య విలువలు, సమానత్వం, సామాజిక న్యాయం పట్ల నిబద్ధత పెంపొందించాలని సూచించారు.

విద్యార్థుల సమస్యలు ఎక్కడ ఉంటే అక్కడ AISF స్పందించేలా, కొత్త ఆలోచనలను స్వీకరించే నాయకత్వాన్ని తయారు చేయడమే భవిష్యత్ లక్ష్యంగా ఉండాలని ఆయన అన్నారు.