Station Ghanpur| జ్ఞానేశ్‌ను తప్పించాలి

Published: 03 Oct 2026 • 04:50 PM

* సీపీఎం నేత రాపర్తి రాజు

Station Ghanpur| ఆకేరు న్యూస్, స్టేషన్ ఘన్‌పూర్: ఎన్నికల కమిషన్ స్వతంత్రతను కాపాడాలని, ప్రధాన ఎన్నికల కమిషనర్ (CEC) జ్ఞానేశ్ కుమార్‌ను బాధ్యతల నుంచి తప్పించాలని సీపీఎం జిల్లా కార్యదర్శి వర్గ సభ్యులు రాపర్తి రాజు డిమాండ్ చేశారు. జనగామ జిల్లా చిల్పూర్ మండలం క్రిష్ణజీగూడెంలో శనివారం నిర్వహించిన సీపీఎం ముఖ్య కార్యకర్తల సమావేశంలో ఆయన మాట్లాడారు.

కేంద్రంలోని బీజేపీ ప్రభుత్వం అధికార దుర్వినియోగానికి పాల్పడుతూ రాజ్యాంగబద్ధ సంస్థల స్వతంత్రతను దెబ్బతీస్తోందని రాపర్తి రాజు ఆరోపించారు. ప్రభుత్వానికి అనుకూలంగా వ్యవహరించే వ్యక్తులను కీలక రాజ్యాంగ సంస్థల్లో నియమించడం ద్వారా ప్రజల్లో ప్రజాస్వామ్య వ్యవస్థలపై ఉన్న నమ్మకాన్ని దెబ్బతీస్తున్నారని విమర్శించారు.

ఎన్నికల కమిషన్ రాజకీయ ఒత్తిళ్లకు అతీతంగా, రాజ్యాంగం నిర్దేశించిన నిష్పక్షపాత ధోరణితో పనిచేయాల్సిన అవసరం ఉందన్నారు. ఎన్నికల జాబితాలు, ఓటర్ల హక్కులు, ఎన్నికల నిర్వహణలో పారదర్శకత, అన్ని రాజకీయ పార్టీలకు సమాన అవకాశాలు వంటి అంశాల్లో ఎలాంటి పక్షపాతానికి తావులేకుండా వ్యవహరించాల్సిన బాధ్యత కమిషన్‌పై ఉందన్నారు.

జ్ఞానేశ్ కుమార్ 2025 ఫిబ్రవరి 19న భారత 26వ ప్రధాన ఎన్నికల కమిషనర్‌గా బాధ్యతలు స్వీకరించారు. ప్రస్తుతం ఎన్నికల కమిషన్ పనితీరుపై రాజకీయ పార్టీల నుంచి వస్తున్న అభ్యంతరాలను పరిగణనలోకి తీసుకుని సమగ్ర సమీక్ష అవసరమని రాపర్తి రాజు అన్నారు.

రాజ్యాంగ సంస్థలను నిర్వీర్యం చేసే ప్రయత్నాలను ప్రజలు ప్రశ్నించాలని ఆయన పిలుపునిచ్చారు. ఎన్నికల కమిషన్ స్వతంత్రతను కాపాడటం అంటే ప్రజాస్వామ్యాన్ని, ఓటు హక్కును పరిరక్షించడమేనని అన్నారు.

జ్ఞానేశ్ కుమార్ వ్యవహారశైలిపై వస్తున్న అభ్యంతరాలను పరిగణనలోకి తీసుకుని ఆయనను బాధ్యతల నుంచి తప్పించి, ఎన్నికల కమిషన్‌పై ప్రజలకు విశ్వాసం కలిగించే చర్యలు చేపట్టాలని డిమాండ్ చేశారు. ప్రజాస్వామ్యం, ఎన్నికల కమిషన్ స్వతంత్రత, ఓటు హక్కు, రాజ్యాంగ పరిరక్షణ అంశాలపై ప్రజా ఉద్యమం చేపడతామని తెలిపారు.

సమావేశానికి సీపీఎం మండల కార్యదర్శి సాదం రమేష్ అధ్యక్షత వహించారు. మండల కమిటీ సభ్యులు పోలు సంపత్, అపారదాపు రాజు, ఆవుల ప్రభాకర్, బర్మ రవి, ఉపసర్పంచ్ గద్ద కోమల, వార్డు మెంబర్ ఊరడి బుచ్చిరాజ్, గద్ద కుమార్, ఊరడి లింగయ్య, పోలు శ్రీనివాస్, ముడిక బీమయ్య, సాదం రామరాజు తదితరులు పాల్గొన్నారు.