Telangana Municipal Jobs | మున్సిపల్ శాఖలో భారీ నోటిఫికేషన్‌

Published: 05 Oct 2026 • 01:10 PM

* 886 పోస్టుల భర్తీకి గ్రీన్ సిగ్నల్
* కమిషనర్, జూనియర్ అసిస్టెంట్ పోస్టుల వివరాలు ఇవే

ఆకేరు న్యూస్, డెస్క్ : తెలంగాణలోని నిరుద్యోగ యువతకు ప్రభుత్వం త్వరలోనే శుభవార్త అందించబోతోంది. రాష్ట్రంలోని పురపాలక, పట్టణాభివృద్ధి శాఖలో ఖాళీగా ఉన్న వివిధ స్థాయిల ఉద్యోగాల భర్తీకి సర్కార్ వేగంగా అడుగులు వేస్తోంది. కొత్తగా ఏర్పాటు చేసిన మున్సిపాలిటీలు, కార్పొరేషన్లలో పాలనా సంస్కరణలు వేగవంతం చేసేందుకు గానూ 886 కొత్త పోస్టుల సృష్టికి ఆర్థిక శాఖ ఇప్పటికే ఆమోదం తెలిపింది.

మంత్రివర్గం (Cabinet) తదుపరి సమావేశంలో ఈ ప్రతిపాదనలకు అధికారిక ఆమోదం లభించనుంది. ఆ వెంటనే తెలంగాణ పబ్లిక్ సర్వీస్ కమిషన్ (TGPSC) ద్వారా ఉద్యోగాల భర్తీ ప్రక్రియ ప్రారంభం కానుంది.

* డిప్యూటేషన్ల పాలనకు స్వస్తి..

రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత పరిపాలనా సౌలభ్యం కోసం కొత్తగా 24 మున్సిపాలిటీలను ఏర్పాటు చేయడంతో పాటు, కొన్ని పురపాలక సంఘాలను కార్పొరేషన్లుగా అప్‌గ్రేడ్ చేసింది. అయితే, ఈ కొత్త స్థానిక సంస్థల్లో అవసరమైన స్థాయిలో శాశ్వత ప్రాతిపదికన సిబ్బంది లేకపోవడంతో తీవ్ర ఇబ్బందులు ఎదురవుతున్నాయి.

ప్రస్తుతం ఇతర ప్రభుత్వ శాఖల నుంచి ఉద్యోగులను డిప్యూటేషన్‌పై తీసుకొచ్చి తాత్కాలికంగా పాలన సాగిస్తున్నారు. దీనివల్ల ప్రజలకు అందాల్సిన సేవల్లో ఆలస్యం జరుగుతుండటంతో, పూర్తిస్థాయి సిబ్బందిని నియమించాలని అధికారులు ప్రతిపాదించారు.

ప్రాథమిక అంచనాల ప్రకారం మొత్తం 886 పోస్టులు అవసరమని గుర్తించి, ముఖ్యమంత్రి కార్యాలయం (CMO) మరియు ఆర్థిక శాఖల ఆమోదం పొందారు. ఈ పోస్టులు భర్తీ కానున్నాయి. మున్సిపల్ శాఖలో భర్తీ చేయనున్న 886 పోస్టులలో వివిధ కేడర్లకు చెందిన కీలక ఉద్యోగాలు ఉన్నాయి.

గ్రేడ్-3 మున్సిపల్ కమిషనర్లు : 20 పోస్టులు
డిప్యూటీ కమిషనర్లు (స్పెషల్ గ్రేడ్ మున్సిపాలిటీలు) : 11 పోస్టులు
జూనియర్ అసిస్టెంట్లు : 86 పోస్టులు
అసిస్టెంట్ ఎగ్జిక్యూటివ్ ఇంజినీర్లు (AEE) : 56 పోస్టులు
హెల్త్ అసిస్టెంట్లు : 40 పోస్టులు
జూనియర్ అకౌంటెంట్లు : 40 పోస్టులు
సీనియర్ అకౌంటెంట్లు : 40 పోస్టులు
వీటితో పాటు వార్డు ఆఫీసర్లు, సాంకేతిక సిబ్బంది మరియు ఇతర సహాయక ఉద్యోగాలు అందుబాటులో ఉన్నాయి.

* నోటిఫికేషన్ ఎప్పుడు రావచ్చు అంటే…

వాస్తవానికి ఇటీవల జరిగిన మంత్రివర్గ సమావేశంలోనే ఈ పోస్టుల మంజూరుకు ఆమోదం లభిస్తుందని భావించినప్పటికీ, సాంకేతిక కారణాల వల్ల ఆ ప్రతిపాదన చివరి నిమిషంలో వాయిదా పడింది. రాబోయే క్యాబినెట్ భేటీలో దీనికి గ్రీన్ సిగ్నల్ లభించడం ఖాయంగా కనిపిస్తోంది. ప్రభుత్వ ఆమోదం లభించిన వెంటనే ఆర్థిక శాఖ నుంచి TGPSCకి ప్రతిపాదనలు వెళ్తాయి.

ఆ తర్వాత కమిషన్ ఉద్యోగ ప్రకటన సమగ్ర వివరాలను, అర్హతలను రూపొందిస్తుంది. రాబోయే కొత్త సంవత్సరం (జనవరి) నాటికి దీనికి సంబంధించిన అధికారిక ఉద్యోగ నోటిఫికేషన్ వెలువడే అవకాశాలు ఉన్నాయని విశ్వసనీయ వర్గాలు వెల్లడించాయి.

* నిరుద్యోగులకు మంచి అవకాశం

రాష్ట్రంలో పోటీ పరీక్షలకు సిద్ధమవుతున్న అభ్యర్థులకు ఇది ఒక గొప్ప అవకాశం. ఇప్పటికే TGPSC ద్వారా వివిధ ఉద్యోగ నియామకాల ప్రక్రియ కొనసాగుతుండగా, ఇప్పుడు మున్సిపల్ శాఖలో ఇంజినీరింగ్, నాన్-టెక్నికల్ మరియు అడ్మినిస్ట్రేటివ్ ఉద్యోగాలకు నోటిఫికేషన్ రానుండటం గ్రూప్స్, ఇంజినీరింగ్ అభ్యర్థులకు చాలా పెద్ద ఊరట కలిగించే అంశం.