* అక్టోబర్ 11న జరగాల్సిన ఎన్నికలపై స్టే
* తదుపరి ఉత్తర్వుల వరకు నిలిపివేత
Telugu Dancers Association| ఆకేరు న్యూస్, హైదరాబాద్‌: తెలుగు ఫిలిం ఇండస్ట్రీలో డాన్సర్స్ అసోసియేషన్ ఎన్నికల వ్యవహారం కీలక మలుపు తిరిగింది. తెలుగు ఫిలిం అండ్ టీవీ డాన్సర్స్ అండ్ డాన్స్ డైరెక్టర్స్ అసోసియేషన్‌కు అక్టోబర్ 11న నిర్వహించ తలపెట్టిన ఎన్నికలను తెలంగాణ హైకోర్టు తాత్కాలికంగా నిలిపివేసింది. ఎన్నికలకు ముందే వివాదంపై విచారణ జరపకుండా, ఎన్నికలు ముగిసిన తర్వాత విచారణకు తేదీ నిర్ణయించడంపై అభ్యంతరం వ్యక్తం చేసిన న్యాయస్థానం.. తదుపరి ఉత్తర్వులు వెలువడే వరకు ఎన్నికలు నిర్వహించవద్దని ఆదేశించింది.
పదవీకాలంపై వివాదం
తెలుగు ఫిలిం ఇండస్ట్రీ ఎంప్లాయీస్ ఫెడరేషన్ సెప్టెంబర్ 23న డాన్సర్స్ అసోసియేషన్‌ను రద్దు చేస్తూ నిర్ణయం తీసుకున్నట్లు పిటిషనర్ తరఫు వాదన. అనంతరం సెప్టెంబర్ 24న 2026–2028 కాలానికి నూతన కార్యవర్గాన్ని ఎన్నుకునేందుకు ఎన్నికల నోటిఫికేషన్ విడుదలైంది. అక్టోబర్ 11న ఎన్నికలు నిర్వహించాలని నిర్ణయించారు.
అయితే, ప్రస్తుత కార్యవర్గం పదవీకాలం 2027 డిసెంబర్ 6 వరకు ఉందని అసోసియేషన్ అధ్యక్షురాలు వి.వి. సుమలతా దేవి పేర్కొన్నారు. ఈ నేపథ్యంలో ఫెడరేషన్ జారీ చేసిన ఎన్నికల నోటిఫికేషన్ చెల్లదని అభ్యంతరం వ్యక్తం చేస్తూ న్యాయస్థానాన్ని ఆశ్రయించారు. ప్రస్తుత కార్యవర్గాన్ని కొనసాగించాలని, ఎన్నికలను నిలిపివేయాలని కోరుతూ సివిల్ దావా దాఖలు చేశారు.
విచారణపై హైకోర్టు అభ్యంతరం
సుమలతా దేవి సెప్టెంబర్ 28న ఎన్నికలను నిలిపివేయాలని కోరుతూ మధ్యంతర దరఖాస్తు దాఖలు చేశారు. అయితే, ట్రయల్ కోర్టు అత్యవసర నోటీసులు జారీ చేసినప్పటికీ, తదుపరి విచారణను నవంబర్ 3, 2026కి వాయిదా వేసింది. అప్పటికి ఎన్నికలు పూర్తయ్యే అవకాశం ఉన్నా, వాటిని నిలిపివేస్తూ మధ్యంతర ఉత్తర్వులు ఇవ్వలేదు.
దీంతో ట్రయల్ కోర్టు నిర్ణయాన్ని సవాలు చేస్తూ పిటిషనర్ హైకోర్టును ఆశ్రయించారు. అక్టోబర్ 8న పిటిషన్‌పై విచారణ చేపట్టిన జస్టిస్ ఎం.బి. లక్ష్మి ధర్మాసనం.. మధ్యంతర ఉపశమనం నిరాకరించడానికి ట్రయల్ కోర్టు ఉత్తర్వుల్లో స్పష్టమైన కారణాలు కనిపించడం లేదని పేర్కొంది.
ఎన్నికల నోటిఫికేషన్ ఇప్పటికే విడుదలైందని, అక్టోబర్ 11న ఎన్నికలు జరగాల్సి ఉందని తెలిసినప్పుడు, విచారణను నవంబర్ 3కి వాయిదా వేయడం సమంజసం కాదని అభిప్రాయపడింది. ఎన్నికలకు ముందే కేసును విచారించేలా తేదీని నిర్ణయించాల్సి ఉందని స్పష్టం చేసింది.
ఎన్నికలు పూర్తయిన తర్వాత విచారణ చేపడితే, పిటిషనర్ కోరుతున్న న్యాయపరమైన పరిష్కారం నిరర్థకమయ్యే అవకాశం ఉందని హైకోర్టు అభిప్రాయపడింది.
ఎన్నికలపై తాత్కాలిక ఆంక్షలు
ఈ నేపథ్యంలో ట్రయల్ కోర్టు సెప్టెంబర్ 28న జారీ చేసిన డాకెట్ ఆర్డర్‌ను హైకోర్టు సస్పెండ్ చేసింది. ఫెడరేషన్ తరఫున ప్రతివాది కోర్టుకు హాజరై వాదనలు వినిపించే వరకు లేదా తదుపరి ఉత్తర్వులు వెలువడే వరకు అక్టోబర్ 11న ఎన్నికలు నిర్వహించరాదని ఆదేశించింది.
ప్రతివాదికి వ్యక్తిగత నోటీసుతో పాటు ఇతర నోటీసులు జారీ చేయాలని కూడా స్పష్టం చేసింది. దీంతో ఎన్నికల నిర్వహణపై తాత్కాలికంగా నిలుపుదల ఏర్పడింది. అయితే, అసోసియేషన్ రద్దు నిర్ణయం, ప్రస్తుత కార్యవర్గం పదవీకాలం, ఎన్నికల నోటిఫికేషన్ చెల్లుబాటుపై తుది నిర్ణయం వెలువడాల్సి ఉంది.
అక్టోబర్ 30న తదుపరి విచారణ
దసరా సెలవుల అనంతరం కోర్టు తిరిగి ప్రారంభమైన అక్టోబర్ 30, 2026న ఈ కేసును తదుపరి విచారణకు జాబితా చేయాలని హైకోర్టు ఆదేశించింది. ఆ విచారణలో ఫెడరేషన్ తన వాదనలు వినిపించాల్సి ఉంటుంది.
హైకోర్టు తాజా ఆదేశాలతో అక్టోబర్ 11న జరగాల్సిన డాన్సర్స్ అసోసియేషన్ ఎన్నికలు తాత్కాలికంగా నిలిచిపోయాయి. తదుపరి విచారణలో న్యాయస్థానం ఎలాంటి ఆదేశాలు జారీ చేస్తుందనేది ఇప్పుడు ఆసక్తికరంగా మారింది.
About the Author
Please tell us what is wrong. Your report will be sent to the website team.
