Idupu Kayitham| ఇడుపు కాయితం లో సహజత్వమే బలం

Published: 23 Oct 2026 • 06:01 PM

* గడప పాటకు మంచి స్పందన

* బన్నీ వాసు

Idupu Kayitham| ఆకేరు న్యూస్, హైదరాబాద్: హీరో ప్రియదర్శి, హీరోయిన్ నాగదుర్గ జంటగా నటిస్తున్న చిత్రం ఇడుపు కాయితం. సుకుమార్ రైటింగ్స్, బన్నీ వాస్ వర్క్స్ బ్యానర్లపై నిర్మాత బన్నీ వాస్ నిర్మిస్తున్న ఈ సినిమాకు వంశీరెడ్డి దొండపాటి దర్శకత్వం వహిస్తున్నారు. కుటుంబ నేపథ్యంతో తెరకెక్కుతున్న ఈ చిత్రం డిసెంబర్ 11న ప్రపంచవ్యాప్తంగా థియేటర్లలో విడుదల కానుంది.

ఈ సందర్భంగా హైదరాబాద్‌లో చిత్రంలోని గడప పాట విడుదల కార్యక్రమాన్ని ఘనంగా నిర్వహించారు. ఈ వేడుకలో చిత్ర బృందం సినిమా విశేషాలను పంచుకుంది.

మన ఇంటి కథ

సినిమా కథ, మాటలు, నేపథ్యంలోని సహజత్వం తమను ఆకట్టుకున్నాయని నిర్మాత బన్నీ వాస్ తెలిపారు. దర్శకుడు వంశీరెడ్డి కథ చెప్పినప్పుడు తన చిన్ననాటి గ్రామీణ వాతావరణం కళ్లముందు కనిపించిందన్నారు. ఇది సినిమా కథలా కాకుండా మన ఇంట్లో జరిగే సంఘటనలాగా అనిపించిందని పేర్కొన్నారు. సుకుమార్, తబిత సహకారంతో సినిమాను వేగంగా పూర్తి చేయగలిగామని చెప్పారు.

‘గడప’ ప్రత్యేకం

ఇంటి గడపతో ముడిపడిన కుటుంబ అనుబంధాలు, మహిళల భావోద్వేగాలను ఈ పాట ప్రతిబింబిస్తుందని చిత్ర బృందం తెలిపింది. లిరిసిస్ట్ అభినయ శ్రీనివాస్ ఈ పాటకు సాహిత్యం అందించగా, సురేష్ బొబ్బిలి సంగీతం సమకూర్చారు. గాయని తేలు విజయ, గాయకుడు శంకర్ బాబు పాటల గురించి తమ అనుభవాలను పంచుకున్నారు.

నాగదుర్గ భావోద్వేగం

హీరోయిన్ నాగదుర్గ మాట్లాడుతూ, శ్రీలత పాత్రలో నటించేందుకు ఎంతో కష్టపడ్డానని తెలిపారు. గడప పాట ప్రోమో చూసిన తన తండ్రి ఫోన్ చేసి అభినందించారని, భావోద్వేగానికి గురయ్యారని చెప్పారు. శ్రీలత పాత్ర ప్రతి ఇంట్లోని అమ్మాయికి దగ్గరగా ఉంటుందని, ప్రేక్షకులు ఆదరిస్తారని ఆశాభావం వ్యక్తం చేశారు.

ప్రియదర్శి నమ్మకం

సినిమా ప్రారంభ సమయంలో సోషల్ మీడియాలో వచ్చిన ప్రతికూల వ్యాఖ్యలు తమను బాధించాయని హీరో ప్రియదర్శి తెలిపారు. అయితే మీడియా, చిత్ర పరిశ్రమ నుంచి లభించిన మద్దతు తమకు ధైర్యాన్నిచ్చిందన్నారు. ఇంటి గడపతో ప్రతి ఒక్కరికీ ఎన్నో జ్ఞాపకాలు ఉంటాయని, అలాంటి అనుబంధాన్ని తమ సినిమా ద్వారా ప్రేక్షకులకు అందిస్తున్నామని చెప్పారు.

31 రోజుల షూటింగ్

దర్శకుడు వంశీరెడ్డి దొండపాటి మాట్లాడుతూ, 31 రోజుల అవుట్‌డోర్ షెడ్యూల్‌ను విజయవంతంగా పూర్తి చేశామని తెలిపారు. యువ సాంకేతిక బృందం ఎంతో కష్టపడి పనిచేసిందని, నిర్మాతలు పూర్తి సహకారం అందించారని చెప్పారు. తెలంగాణ గ్రామీణ నేపథ్యాన్ని సహజంగా తెరపై చూపించేందుకు ప్రయత్నించినట్లు పేర్కొన్నారు.

భారీ తారాగణం

ఈ చిత్రంలో ప్రియదర్శి, నాగదుర్గతో పాటు శివజ్యోతి (తీన్మార్ సావిత్రి), సుజాత (జోర్దార్), చంద్రవ్వ, మౌనిక రెడ్డి, రచ్చరవి, బిత్తిరి సత్తి, అభయ్ బేతిగంటి, మైమ్ మధు తదితరులు నటిస్తున్నారు. సురేష్ బొబ్బిలి సంగీతం అందిస్తుండగా, ఎంఎన్ బాల్ రెడ్డి సినిమాటోగ్రఫీ, శ్రీధర్ సొంపల్లి ఎడిటింగ్ బాధ్యతలు నిర్వహిస్తున్నారు.

కుటుంబ బంధాలు, తెలంగాణ గ్రామీణ జీవనశైలికి ప్రాధాన్యమిస్తూ రూపొందిన ‘ఇడుపు కాయితం’ డిసెంబర్ 11న ప్రపంచవ్యాప్తంగా విడుదల కానుంది.