Ramayana| యశ్‌ రావణ తాండవం

Published: 22 Oct 2026 • 04:12 PM

* దసరా కానుకగా వీడియో

*నవంబర్‌ 5న విడుదల

ఆకేరు న్యూస్, సినిమా: రామాయణం సినిమాపై ప్రేక్షకుల్లో ఆసక్తిని పెంచేలా చిత్ర బృందం ప్రత్యేక వీడియోను విడుదల చేసింది. దసరా సందర్భంగా రావణుడి పాత్రలో నటిస్తున్న రాకింగ్‌ స్టార్‌ యశ్‌కు సంబంధించిన రైజ్‌ ఆఫ్‌ అసుర వీడియోను ప్రేక్షకుల ముందుకు తీసుకొచ్చింది. శక్తివంతమైన సంగీతం, భారీ విజువల్స్‌తో రూపొందించిన ఈ వీడియో సినీ అభిమానుల్లో సినిమాపై అంచనాలను పెంచుతోంది.

రావణుడిగా యశ్‌ విశ్వరూపం

‘రైజ్‌ ఆఫ్‌ అసుర’ వీడియోలో రావణుడి శక్తి, భక్తి, వ్యక్తిత్వంలోని విభిన్న కోణాలను ఆవిష్కరించే ప్రయత్నం చేశారు. యశ్‌ లుక్‌, పాత్రకు తగిన శరీరాకృతి, గంభీరమైన స్క్రీన్‌ ప్రెజెన్స్‌ ప్రత్యేక ఆకర్షణగా నిలిచాయి. పరమశివుడి భక్తుడిగా రావణుడి ప్రాధాన్యాన్ని ప్రతిబింబించేలా తాండవ నేపథ్యానికి పెద్దపీట వేశారు. ఈ వీడియోతో యశ్‌ అభిమానుల్లోనే కాకుండా ‘రామాయణం’ కోసం ఎదురుచూస్తున్న ప్రేక్షకుల్లోనూ ఆసక్తి పెరిగింది.

తెలుగు వెర్షన్‌కు దేవిశ్రీ గాత్రం

ఈ ప్రత్యేక వీడియోను భాషను బట్టి వేర్వేరు పేర్లతో రూపొందించారు. హిందీలో ‘రైజ్‌ ఆఫ్‌ అసుర’, కన్నడలో ‘రావణ తాండవ’, తెలుగు, తమిళ భాషల్లో ‘రావణ తాండవం’ పేర్లతో విడుదల చేస్తున్నారు. తెలుగు వెర్షన్‌కు రాకేందు మౌళి సాహిత్యం అందించగా, ప్రముఖ సంగీత దర్శకుడు దేవిశ్రీ ప్రసాద్‌ గాత్రాన్ని అందించారు. హిందీ వెర్షన్‌కు విశాల్‌ దడ్లానీ పాడగా, డాక్టర్‌ కుమార్‌ విశ్వాస్‌ సాహిత్యం అందించారు. ఏఆర్‌ రెహమాన్‌, హీరల్‌ విరాడియా సంగీత పర్యవేక్షణలో ఈ వీడియో రూపొందింది. టీ-సిరీస్‌ లేబుల్‌పై పాటలను విడుదల చేస్తున్నారు.

రాముడిగా రణ్‌బీర్‌.. సీతగా సాయి పల్లవి

నితేష్‌ తివారీ దర్శకత్వంలో తెరకెక్కుతున్న ఈ చిత్రంలో రణ్‌బీర్‌ కపూర్‌ శ్రీరాముడిగా, సాయి పల్లవి సీతగా, యశ్‌ రావణుడిగా కనిపించనున్నారు. సన్నీ డియోల్‌ హనుమంతుడిగా, రవి దూబే లక్ష్మణుడిగా నటిస్తున్నారు. రకుల్‌ ప్రీత్‌ సింగ్‌ శూర్పణఖ పాత్రలో కనిపించనున్నారు. ప్రైమ్‌ ఫోకస్‌ స్టూడియోస్‌, డీఎన్ఈజీ, యశ్‌కు చెందిన మాన్‌స్టర్‌ మైండ్‌ క్రియేషన్స్‌ సంయుక్తంగా ఈ చిత్రాన్ని నిర్మిస్తున్నాయి.

నవంబర్‌ 5న తొలి భాగం

రెండు భాగాలుగా రూపొందుతున్న ‘రామాయణం’ తొలి భాగాన్ని 2026 నవంబర్‌ 5న ప్రపంచవ్యాప్తంగా విడుదల చేయాలని చిత్ర బృందం ప్రకటించింది. రెండో భాగాన్ని 2027 దీపావళి సందర్భంగా విడుదల చేయాలని ప్రణాళిక రూపొందించింది. హిందీ, తెలుగు, తమిళం, కన్నడ, మలయాళ భాషల్లో ఈ సినిమాను ప్రేక్షకుల ముందుకు తీసుకురానున్నారు. ఐమ్యాక్స్‌ ఫార్మాట్‌లోనూ విడుదల చేయనున్నారు.

దసరా సందర్భంగా విడుదలైన యశ్‌ రావణుడి ప్రత్యేక వీడియోతో ‘రామాయణం’పై అంచనాలు మరింత పెరిగాయి. ఇతిహాసంలోని రావణుడి పాత్రను యశ్‌ ఏ విధంగా వెండితెరపై ఆవిష్కరించనున్నారోనని అభిమానులు ఆసక్తిగా ఎదురుచూస్తున్నారు.