Pawan Kalyan | స్థానిక పోరులోనూ 93శాతం విజయమే లక్ష్యం!

Published: 27 Oct 2026 • 12:48 PM

* డిప్యూటీ సీఎం పవన్ కల్యాణ్ పిలుపు
* అగ్రనేతల సమన్వయమే విజయం
* ‘బి-ఫామ్’ ఉన్నవారే పోటీ చేయాలి

ఆకేరు న్యూస్, డెస్క్ : 2024లో అత్యంత సవాల్‌తో కూడుకున్న క్లిష్ట పరిస్థితుల్లో కూటమి ప్రభుత్వం అధికారంలోకి వచ్చిందని, అసెంబ్లీ ఎన్నికల్లో సాధించిన 93 శాతం చారిత్రాత్మక విజయాన్ని రాబోయే స్థానిక సంస్థల ఎన్నికల్లోనూ పునరావృతం చేయడమే లక్ష్యంగా పనిచేయాలని ఏపీ ఉప ముఖ్యమంత్రి, జనసేన అధినేత పవన్ కల్యాణ్ పిలుపునిచ్చారు. స్థానిక సంస్థల ఎన్నికల సన్నాహాలు, సీట్ల సర్దుబాటుపై నిర్వహించిన సమావేశంలో పవన్ కల్యాణ్ పార్టీ నాయకులకు, కూటమి శ్రేణులకు దిశానిర్దేశం చేశారు.

* సీట్ల సర్దుబాటుపై క్లారిటీ – సీఎం చొరవ..

అసెంబ్లీ ఎన్నికల్లో కూటమి భాగస్వామ్య పక్షాల మధ్య సీట్ల సర్దుబాటు చాలా సులువుగా పూర్తయిందని, అయితే స్థానిక ఎన్నికల్లో పోటీ తీవ్రంగా ఉండటం సహజమని పవన్ కల్యాణ్ అభిప్రాయపడ్డారు. స్థానిక పోరులో సీట్ల సర్దుబాటు ప్రక్రియను ముఖ్యమంత్రి నారా చంద్రబాబు నాయుడు చొరవ తీసుకుని పూర్తి చేస్తున్నారని, కొంతమంది నాయకులకు సర్దిచెప్పి ముందుకు తీసుకెళ్తున్నామని తెలిపారు.

“అగ్రనేతల మధ్య ఉన్న ఐక్యత, సమన్వయం కిందిస్థాయి (గ్రౌండ్ లెవెల్) నేతల్లో కూడా స్పష్టంగా కనిపించాలి. అభివృద్ధి ఫలాలు కిందిస్థాయికి చేరాలంటే కూటమి శ్రేణులు కలిసికట్టుగా పనిచేయడం అత్యంత ఆవశ్యకం” అని స్పష్టం చేశారు.

* బి-ఫామ్ ఉన్నవారే బరిలో ఉండాలి..

పోటీలో నిలబడేందుకు చాలా ప్రాంతాల్లో ఔత్సాహిక నేతలు నామినేషన్లు వేసిన విషయాన్ని పవన్ కల్యాణ్ ప్రస్తావించారు. అయితే, పార్టీ క్రమశిక్షణను పాటిస్తూ కూటమి అధికారిక ‘బి-ఫామ్’ (B-Form) పొందిన అభ్యర్థులు మాత్రమే పోటీలో ఉండాలని, మిగిలినవారు ఉపసంహరించుకుని అధికారిక అభ్యర్థుల గెలుపునకు కృషి చేయాలని విజ్ఞప్తి చేశారు. కూటమి సమిష్టి విజయానికి ప్రజల మద్దతు ఎల్లప్పుడూ అవసరమని గుర్తుచేశారు.

* రూ.1.5 లక్షల కోట్లతో అభివృద్ధి..

కూటమి ప్రభుత్వం అధికారంలోకి వచ్చిన తొలిరోజు నుంచే అనేక ఆర్థిక, పాలనాపరమైన సవాళ్లను ఎదుర్కొందని పవన్ పేర్కొన్నారు.

పెట్టుబడుల వరద : దేశంలోకి వచ్చే మొత్తం విదేశీ, స్వదేశీ పెట్టుబడుల్లో ఏకంగా 25 శాతం పెట్టుబడులు ఒక్క ఆంధ్రప్రదేశ్‌కే రావడం ప్రభుత్వ పనితీరుకు నిదర్శనమని హర్షం వ్యక్తం చేశారు.

ఆగని సంక్షేమం & అభివృద్ధి: గత వైకాపా ప్రభుత్వ హయాంలో ఉద్యోగుల జీతాల నిధులను కూడా మళ్లించారని ఆరోపించారు. అలాంటి పరిస్థితి నుంచి రాష్ట్రాన్ని గట్టెక్కించి, ఇప్పటివరకు రూ.1,50,000 కోట్లతో వివిధ అభివృద్ధి పనులను ప్రారంభించామన్నారు.

ప్రధాన ప్రాజెక్టులు : పోలవరం ప్రాజెక్ట్, హంద్రీనీవా, భోగాపురం అంతర్జాతీయ విమానాశ్రయం వంటి కీలకమైన ప్రాజెక్టుల నిర్మాణ పనులను వేగవంతం చేసి ముందుకు తీసుకెళ్తున్నామని వివరించారు.

ఎన్నికల సమయంలో ఇచ్చిన ప్రతి హామీని నెరవేరుస్తున్నామని, అభివృద్ధి సంక్షేమ ఫలాలు ప్రజలందరికీ చేరాలంటే స్థానిక సంస్థల్లోనూ కూటమి విజయదుందుభి మోగించాలని నేతలకు పిలుపునిచ్చారు.