Telangana Farmers Association | సబ్సిడీతో విత్తనాలు అందించాలి

Published: 28 Oct 2026 • 01:51 PM

* సెల్ఫ్ డిక్లరేషన్ నిబంధనను తొలగించాలి..

* తెలంగాణ రైతు సంఘం డిమాండ్

ఆకేరు న్యూస్, స్టేషన్ ఘన్ పూర్ : రైతులకు 75 శాతం సబ్సిడీతో విత్తనాలు అందించాలని తెలంగాణ రైతు సంఘం చిల్పూర్ మండల కార్యదర్శి పురామని శ్రవణ్ ప్రభుత్వాన్ని డిమాండ్ చేశారు. జనగామ జిల్లా చిల్పూర్ మండల కేంద్రంలో బుధవారం ఆయన మాట్లాడుతూ రైతులు వ్యవసాయం చేయాలంటే ఫెర్టిలైజర్ షాపుల యాజమాన్యానికి సెల్ఫ్ డిక్లరేషన్ పత్రం రాసి ఇవ్వాలనే నిబంధనను ప్రభుత్వం వెంటనే తొలగించాలని పురామని శ్రవణ్ డిమాండ్ చేశారు.

ఎల్ నినో ప్రభావం సాకుగా చూపి, ఫెర్టిలైజర్ షాపుల్లో విత్తనాలు కొనుగోలు చేసేటప్పుడు రైతుల నుంచి ముందస్తుగా డిక్లరేషన్ ఫారాలు తీసుకోవడం అన్యాయమని మండిపడ్డారు. డిక్లరేషన్ ఫారమ్‌లో షాపులో తీసుకున్న విత్తనాలు కల్తీ అయినా, పంటలు పండకపోయినా ఎవరినీ అడగవద్దని సంతకాలు తీసుకోవడం రైతులను నిలువునా మోసం చేయడమే అన్నారు. వ్యాపారులకు కొమ్ముకాస్తూ, రైతుల హక్కులను కాలరాసేలా ఈ డిక్లరేషన్ నిబంధన వెనుక వ్యవసాయ అధికారుల హస్తం ఉందనే అనుమానాలు వ్యక్తం చేశారు.

* రైతు సంఘం ప్రధాన డిమాండ్లు..

డిక్లరేషన్ రద్దు : రైతుల నుంచి బలవంతంగా తీసుకుంటున్న సెల్ఫ్ డిక్లరేషన్ ఫారమ్‌ల నిబంధనను ప్రభుత్వం వెంటనే రద్దు చేయాలి.

75శాతం సబ్సిడీ విత్తనాలు : ప్రకృతి వైపరీత్యాలు, ఎల్ నినో ప్రభావాన్ని దృష్టిలో ఉంచుకుని ప్రభుత్వమే రైతులకు ప్రత్యామ్నాయంగా 75శాతం సబ్సిడీతో నాణ్యమైన విత్తనాలను సరఫరా చేయాలి.

కల్తీ విత్తనాలపై చర్యలు : ఫెర్టిలైజర్ షాపుల యాజమాన్యాల దోపిడీ నుంచి రైతులను రక్షించి, కల్తీ విత్తనాలు విక్రయించే వారిపై చర్యలు తీసుకోవాలి. ప్రభుత్వం, వ్యవసాయ శాఖ అధికారులు స్పందించి ఈ డిక్లరేషన్ నిబంధనను వెంటనే తొలగించకపోతే, రైతులందరినీ ఐక్యం చేసి తెలంగాణ రైతు సంఘం ఆధ్వర్యంలో పెద్ద ఎత్తున ఆందోళన కార్యక్రమాలు చేపడతామని హెచ్చరించారు. ఈ సమావేశంలో అపారదాపు రాజకుమార్, అపారదాపు రవీందర్ లు పాల్గొన్నారు.