ప్రజా సంఘాల రౌండ్ టేబుల్ సమావేశం
* 60కి పైగా కుల, ప్రజా సంఘాల ఏకగ్రీవ తీర్మానం
ఆకేరు న్యూస్, హనుమకొండ: డాక్టర్ పెరుమాండ్ల రామకృష్ణకు గవర్నర్ కోటాలో ఎమ్మెల్సీ అవకాశం కల్పించాలని 60కి పైగా కుల, ప్రజా సంఘాల ప్రతినిధులు ఏకగ్రీవంగా తీర్మానించారు. మంగళవారం హనుమకొండ ప్రెస్ క్లబ్‌లో నిర్వహించిన రౌండ్ టేబుల్ సమావేశంలో ఈ మేరకు నిర్ణయం తీసుకున్నారు. ప్రజా ఆరోగ్యం, సామాజిక సేవా రంగాల్లో ఆయన అందిస్తున్న సేవలను గుర్తించి శాసనమండలిలో ప్రాతినిధ్యం కల్పించాలని ప్రభుత్వాన్ని కోరారు.
పేదలకు సేవలు
సమావేశంలో పాల్గొన్న వివిధ సంఘాల ప్రతినిధులు మాట్లాడుతూ.. డాక్టర్ పెరుమాండ్ల రామకృష్ణ అనేక సంవత్సరాలుగా వైద్య సేవలు అందించడంతో పాటు పేదలు, బడుగు బలహీన వర్గాల సంక్షేమం కోసం సామాజిక కార్యక్రమాల్లో చురుగ్గా పాల్గొంటున్నారని పేర్కొన్నారు. ప్రజా ఆరోగ్యం, సామాజిక సేవ, సహకార రంగాల్లో ఆయన చేసిన కృషిని గుర్తించి ఎమ్మెల్సీగా అవకాశం కల్పించాలని విజ్ఞప్తి చేశారు.
సీఎం పరిశీలించాలని విజ్ఞప్తి
భారత రాజ్యాంగంలోని ఆర్టికల్ 171(5) ప్రకారం ప్రత్యేక పరిజ్ఞానం, అనుభవం ఉన్న వ్యక్తులకు శాసనమండలిలో గవర్నర్ నామినేషన్ ద్వారా ప్రాతినిధ్యం కల్పించే అవకాశం ఉందని వక్తలు పేర్కొన్నారు. సామాజిక సేవా రంగంలో డాక్టర్ రామకృష్ణకు ఉన్న అనుభవాన్ని పరిగణనలోకి తీసుకుని ఆయన పేరును పరిశీలించాలని కోరారు.
అలాగే, డాక్టర్ రామకృష్ణ కుటుంబం, ఆయన విద్యార్థి దశ నుంచి కాంగ్రెస్ పార్టీకి అందించిన సేవలను గుర్తించి ముఖ్యమంత్రి ఈ అంశంపై సానుకూలంగా స్పందించాలని సమావేశంలో పాల్గొన్న ప్రతినిధులు విజ్ఞప్తి చేశారు.
ఎమ్మెల్యేలకు వినతిపత్రాలు
డాక్టర్ పెరుమాండ్ల రామకృష్ణకు ఎమ్మెల్సీ అవకాశం కల్పించే వరకు ప్రజాస్వామ్య పద్ధతిలో తమ మద్దతు కొనసాగిస్తామని సంఘాల నాయకులు స్పష్టం చేశారు. సమావేశం అనంతరం వరంగల్ జిల్లా ఎమ్మెల్యేలను కలిసి ఆయనకు ఎమ్మెల్సీ పదవి కల్పించాలని కోరుతూ వినతిపత్రాలు సమర్పించారు. సానుకూలంగా స్పందించిన ఎమ్మెల్యేలకు కృతజ్ఞతలు తెలిపారు.
పలువురు ప్రముఖుల హాజరు
ఈ సమావేశంలో గౌడ సంఘం రాష్ట్ర అధ్యక్షుడు యాదగిరి గౌడ్, ఉద్యమకారుల సంఘం ఉమ్మడి జిల్లా అధ్యక్షుడు రజినీకాంత్ రజక, బీసీ రజక సంఘం రాష్ట్ర అధ్యక్షుడు చాపర్తి కుమార్, న్యాయవేదిక రాష్ట్ర అధ్యక్షుడు కేడల ప్రసాద్ పటేల్, మాదిగ హక్కుల దండోరా రాష్ట్ర అధ్యక్షుడు సునీల్ మాదిగ, ప్రజా సంఘాల జేఏసీ చైర్మన్ మాదాసి సురేష్, కాకతీయ యూనివర్సిటీ ప్రొఫెసర్ దాస్, ఎస్సీ, ఎస్టీ ఉపాధ్యాయ సంఘం జాతీయ అధ్యక్షుడు కొమ్ముల బాబు, మైనారిటీ నాయకుడు ఎండీ అలీ తదితరులు పాల్గొన్నారు. వివిధ కుల, ప్రజా, ఉద్యోగ, నిరుద్యోగ సంఘాల నాయకులు, యువకార్యకర్తలు పెద్ద సంఖ్యలో హాజరయ్యారు.
About the Author
Please tell us what is wrong. Your report will be sent to the website team.
