Telangana IAS Transfers | 12 మంది ఐఏఎస్ అధికారుల బదిలీ..

Published: 28 Oct 2026 • 12:27 PM

* కీలక శాఖల్లో మార్పులు..

ఆకేరు న్యూస్ , హైదరాబాద్: తెలంగాణ రాష్ట్రంలో పలువురు ఐఏఎస్ అధికారుల బదిలీలు, పోస్టింగుల్లో మార్పులు చోటుచేసుకున్నాయి. వివిధ శాఖల్లో పనిచేస్తున్న 12 మంది ఐఏఎస్ అధికారులకు కొత్త బాధ్యతలు అప్పగిస్తూ రాష్ట్ర ప్రభుత్వం ఉత్తర్వులు జారీ చేసింది. ప్రభుత్వ ప్రధాన కార్యదర్శి సంజయ్ జాజు పేరుతో అక్టోబర్ 28, 2026న జారీ అయిన జీవో ఆర్టీ నంబర్ 1553లో ఈ మార్పులను పేర్కొన్నారు. ఈ బదిలీల్లో భాగంగా అటవీ, పర్యావరణం, ఇంధనం, రవాణా, రోడ్లు భవనాలు, దేవాదాయ, గిరిజన సంక్షేమం, వైద్యారోగ్యం, మహిళా శిశు సంక్షేమ శాఖల్లో కీలక మార్పులు చోటుచేసుకున్నాయి. పలువురు అధికారులకు అదనపు బాధ్యతలు కూడా అప్పగించారు.

* కీలక శాఖలకు కొత్త అధికారులు

-జయేష్ రంజన్‌కు అటవీ శాఖ బాధ్యతలు..
1992 బ్యాచ్‌కు చెందిన ఐఏఎస్ అధికారి జయేష్ రంజన్‌ను అటవీ, పర్యావరణం, శాస్త్ర సాంకేతిక శాఖల ప్రత్యేక ప్రధాన కార్యదర్శిగా నియమించారు. అదనంగా EPTRI డైరెక్టర్ జనరల్ బాధ్యతలు అప్పగించారు. క్రీడలకు సంబంధించిన బాధ్యతల నుంచి ఆయనను రిలీవ్ చేస్తూ సంబంధిత మార్పులు చేశారు.

వికాస్ రాజ్‌కు ఇంధన శాఖ..

1992 బ్యాచ్ ఐఏఎస్ అధికారి వికాస్ రాజ్‌ను ఇంధన శాఖ ప్రత్యేక ప్రధాన కార్యదర్శిగా బదిలీ చేశారు. ఇప్పటివరకు ఈ బాధ్యతలు నిర్వహించిన నవీన్ మిట్టల్‌ను రిలీవ్ చేశారు.

నవీన్ మిట్టల్‌కు రవాణా, రోడ్లు భవనాలు..

1996 బ్యాచ్ ఐఏఎస్ అధికారి నవీన్ మిట్టల్‌కు రవాణా, రోడ్లు భవనాలు, రెవెన్యూ శాఖల బాధ్యతలు అప్పగించారు. ఈ బాధ్యతల నుంచి ఎం. దానకిశోర్‌ను రిలీవ్ చేసినట్లు ఉత్తర్వుల్లో పేర్కొన్నారు.

శైలజా రామయ్యర్‌కు దేవాదాయ శాఖ..

1997 బ్యాచ్ ఐఏఎస్ అధికారి శైలజా రామయ్యర్‌ను రెవెన్యూ శాఖ పరిధిలోని దేవాదాయ శాఖ ప్రిన్సిపల్ సెక్రటరీగా నియమించారు.

* అదనపు బాధ్యతలు స్వీకరించనున్న అధికారులు

అవని ప్రసాద్‌కు క్రీడా శాఖ బాధ్యతలు..

1995 బ్యాచ్ ఐఏఎస్ అధికారి అవని ప్రసాద్‌కు ప్రస్తుతం నిర్వహిస్తున్న యువజనాభ్యుదయం, పర్యాటక, సాంస్కృతిక శాఖ బాధ్యతలతో పాటు క్రీడా శాఖ డైరెక్టర్, తెలంగాణ క్రీడా ప్రాధికార సంస్థ డైరెక్టర్ జనరల్ బాధ్యతలను అదనంగా అప్పగించారు.

రాహుల్ బొజ్జకు గిరిజన సంక్షేమ శాఖ..

2000 బ్యాచ్ ఐఏఎస్ అధికారి రాహుల్ బొజ్జకు గిరిజన సంక్షేమ శాఖ ప్రిన్సిపల్ సెక్రటరీ బాధ్యతలు అదనంగా అప్పగించారు. ప్రస్తుతం ఆయన నిర్వహిస్తున్న బీసీ సంక్షేమ శాఖ బాధ్యతలను కొనసాగించనున్నారు. గిరిజన సంక్షేమ శాఖ బాధ్యతల నుంచి సబ్యసాచి ఘోష్‌ను రిలీవ్ చేశారు.

ఇలంబర్తి కె.కు రవాణా శాఖ..

2005 బ్యాచ్ ఐఏఎస్ అధికారి ఇలంబర్తి కె.ను రవాణా, రోడ్లు భవనాల శాఖ కార్యదర్శిగా నియమించారు. రవాణా కమిషనర్ బాధ్యతలను అదనంగా అప్పగించడంతో పాటు ప్రస్తుతం నిర్వహిస్తున్న పశుసంవర్ధక శాఖకు సంబంధించిన బాధ్యతలను కొనసాగించనున్నారు.

సర్ఫరాజ్ అహ్మద్‌కు HMDA బాధ్యతలు..

2009 బ్యాచ్ ఐఏఎస్ అధికారి సర్ఫరాజ్ అహ్మద్‌కు హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA) మెట్రోపాలిటన్ కమిషనర్ బాధ్యతలను అదనంగా అప్పగించారు. గ్రేటర్ హైదరాబాద్ మున్సిపల్ కార్పొరేషన్ (GHMC), మల్కాజిగిరి మున్సిపల్ కార్పొరేషన్‌ల ప్రత్యేక అధికారిగా కూడా బాధ్యతలు నిర్వహించనున్నారు.

మహిళా, శిశు సంక్షేమ శాఖలో మార్పులు..

2013 బ్యాచ్ ఐఏఎస్ అధికారి శృతి ఓజాను మహిళా, శిశు సంక్షేమ శాఖ ప్రత్యేక కార్యదర్శిగా నియమించారు.

2015 బ్యాచ్ ఐఏఎస్ అధికారి డాక్టర్ ఎస్. సంగీత సత్యనారాయణను మహిళా, శిశు సంక్షేమ శాఖ డైరెక్టర్‌గా నియమించారు. ఈ బాధ్యతల నుంచి శృతి ఓజాను రిలీవ్ చేశారు.

వైద్యారోగ్య శాఖలో ముషరఫ్ అలీ ఫారూఖీకి బాధ్యతలు..

2014 బ్యాచ్ ఐఏఎస్ అధికారి మహమ్మద్ ముషరఫ్ అలీ ఫారూఖీని వైద్య, ఆరోగ్య, కుటుంబ సంక్షేమ శాఖ డైరెక్టర్‌గా నియమించారు. ఇన్‌స్టిట్యూట్ ఆఫ్ హెల్త్ అండ్ ఫ్యామిలీ వెల్ఫేర్ డైరెక్టర్ బాధ్యతలను అదనంగా అప్పగించారు. తెలంగాణ రైతు పవర్ డిస్ట్రిబ్యూషన్ కంపెనీ చైర్మన్, మేనేజింగ్ డైరెక్టర్ బాధ్యతలను కూడా నిర్వహించనున్నారు.

TGREDCO బాధ్యతలు జితేష్ వి. పాటిల్‌కు..

2016 బ్యాచ్ ఐఏఎస్ అధికారి జితేష్ వి. పాటిల్ TGSPDCL చైర్మన్, మేనేజింగ్ డైరెక్టర్‌గా కొనసాగనున్నారు. అదనంగా తెలంగాణ రాష్ట్ర పునరుత్పాదక ఇంధన అభివృద్ధి సంస్థ (TGREDCO) వైస్ చైర్మన్, మేనేజింగ్ డైరెక్టర్ బాధ్యతలను అప్పగించారు. ఈ అదనపు బాధ్యతల నుంచి ముషరఫ్ అలీ ఫారూఖీని రిలీవ్ చేశారు.

*పరిపాలనలో కీలక మార్పులు..

రాష్ట్రంలోని వివిధ శాఖల పనితీరును సమన్వయం చేయడం, పరిపాలనా బాధ్యతలను పునర్వ్యవస్థీకరించడం లక్ష్యంగా ఈ మార్పులు చేపట్టినట్లు ఉత్తర్వుల ద్వారా తెలుస్తోంది. కొత్త బాధ్యతలు చేపట్టనున్న అధికారులు తమకు కేటాయించిన శాఖల్లో పరిపాలనను కొనసాగించనున్నారు.