Chhattisgarh| ఏఐతో తాంత్రికుడిగా చిత్రీకరణ

Published: 07 Nov 2026 • 05:43 PM

* న్యూస్ పోర్టల్ నిర్వాహకుడు అరెస్ట్

* బ్లాక్‌మెయిల్, డబ్బుల వసూళ్ల కోణంలోనూ పోలీసుల దర్యాప్తు

Chhattisgarh| ఆకేరు న్యూస్, ఛత్తీస్‌గఢ్: కృత్రిమ మేధ (ఏఐ) సాంకేతికతను దుర్వినియోగం చేస్తూ ఓ వ్యాపారవేత్త ఫొటోలను మార్ఫింగ్ చేసి, అతడిని తాంత్రికుడిగా చిత్రీకరిస్తూ వార్తలు ప్రచురించారనే ఆరోపణలపై ఓ న్యూస్ పోర్టల్ నిర్వాహకుడిని పోలీసులు అరెస్ట్ చేశారు. డిజిటల్ మార్ఫింగ్‌తో పాటు సోషల్ మీడియాలో తప్పుడు ప్రచారం, బ్లాక్‌మెయిల్, డబ్బుల వసూళ్లకు పాల్పడ్డారనే కోణాల్లో పోలీసులు దర్యాప్తు చేస్తున్నారు. ఛత్తీస్‌గఢ్‌లోని బిలాస్‌పూర్‌లో ఈ ఘటన వెలుగులోకి వచ్చింది.

ఏఐతో ఫొటోల మార్ఫింగ్.. తప్పుడు ప్రచారం!

పోలీసుల కథనం ప్రకారం.. బిలాస్‌పూర్‌లోని టిఫ్రా ప్రాంతానికి చెందిన ఓ వ్యాపారవేత్త అక్టోబర్ 29న సిర్గిట్టి పోలీసులకు ఫిర్యాదు చేశారు. తన ఫొటోలను ఏఐ సాయంతో డిజిటల్‌గా మార్ఫింగ్ చేసి, తాంత్రికుడి వేషధారణలో ఉన్నట్లుగా చిత్రీకరించారని ఆరోపించారు. యువతులను ఆకర్షించేందుకు వశీకరణ, క్షుద్రవిద్యలు చేస్తున్నాడనే భావన కలిగించేలా మార్ఫింగ్ చేసిన చిత్రాలతో కథనాలు ప్రచురించారని ఫిర్యాదులో పేర్కొన్నారు.

ఈ ఫొటోలను న్యూస్ పోర్టల్‌తో పాటు సోషల్ మీడియా వేదికల్లోనూ ప్రచారం చేశారని తెలిపారు. దీంతో తన వ్యక్తిగత, సామాజిక ప్రతిష్ఠ దెబ్బతిన్నదని, తనను బ్లాక్‌మెయిల్ చేసేందుకు ప్రయత్నించారని ఆరోపించారు.

న్యూస్ పోర్టల్ నిర్వాహకుడు అరెస్ట్

ఈ కేసులో ‘ది హనీ బ్యాడ్జర్ న్యూస్’ పోర్టల్ నిర్వాహకుడు దీపక్ టాండన్ అలియాస్ అంబేద్కర్ టాండన్ (46)ను పోలీసులు అరెస్ట్ చేశారు. నవంబర్ 6న రాయ్‌పూర్‌లోని న్యూ రాజేంద్ర నగర్ ప్రాంతంలోని రజత్ ప్రైమ్ అపార్ట్‌మెంట్‌లో సిర్గిట్టి పోలీసులు అతడిని అదుపులోకి తీసుకున్నారు. నిందితుడి నుంచి రెండు మొబైల్ ఫోన్లను స్వాధీనం చేసుకున్నారు.

రెండు ఫోన్లలో కీలక డిజిటల్ ఆధారాలు

పోలీసులు స్వాధీనం చేసుకున్న మొబైల్ ఫోన్లలో అభ్యంతరకరమైన ఫొటోలు, వీడియోలు, ఆడియో క్లిప్‌లు ఉన్నట్లు వెల్లడించారు. న్యూస్ పోర్టల్‌కు సంబంధించిన డిజిటల్ సమాచారం కూడా అందులో ఉన్నట్లు తెలిపారు. వీటిని ఎవరెవరికి పంపించారు? ప్రచురణ వెనుక మరెవరైనా ఉన్నారా? అనే అంశాలపై దర్యాప్తు చేస్తున్నారు.

ఈ వ్యవహారంలో దీపక్ టాండన్‌తో పాటు కోమల్ ప్రసాద్ చౌబే, మరికొందరిపై కూడా కేసు నమోదైంది. క్రైమ్ నంబర్ 798/2026 కింద ఛత్తీస్‌గఢ్ టోన్హీ ప్రతాడ్నా నివారణ చట్టం–2005లోని సెక్షన్లు 4, 5తో పాటు భారతీయ న్యాయ సంహిత (బీఎన్‌ఎస్) సెక్షన్ 3(5) కింద కేసు నమోదు చేసినట్లు పోలీసులు తెలిపారు.

బ్లాక్‌మెయిల్.. వసూళ్ల కోణంలో విచారణ

మార్ఫింగ్ చేసిన ఫొటోలతో వ్యక్తులను బెదిరించి డబ్బులు వసూలు చేసేందుకు ప్రయత్నించారా? ఈ వ్యవహారంలో మరికొందరి ప్రమేయం ఉందా? అనే కోణాల్లో పోలీసులు విచారణ కొనసాగిస్తున్నారు. అరెస్టు చేసిన నిందితుడిని కోర్టులో హాజరుపరిచారు. డిజిటల్ ఆధారాల విశ్లేషణ అనంతరం కేసులో మరిన్ని వివరాలు వెలుగులోకి వచ్చే అవకాశం ఉంది.