Karimnagar Development | కరీంనగర్ అభివృద్ధికి భారీ నిధులు..

Published: 09 Nov 2026 • 03:05 PM

* రూ.1.5 కోట్ల అభివృద్ధి పనులకు శ్రీకారం

* బండి సంజయ్‌తో కలిసి మంత్రి పొన్నం ప్రభాకర్ శంకుస్థాపన

ఆకేరు న్యూస్, కరీంనగర్ : ఎన్నికల వరకే రాజకీయాలని, ఎన్నికలు పూర్తయిన తర్వాత ప్రజా సంక్షేమం మరియు జిల్లా అభివృద్ధే ధ్యేయంగా అందరం కలిసి పనిచేస్తామని రాష్ట్ర రవాణా మరియు బీసీ సంక్షేమ శాఖ మంత్రి పొన్నం ప్రభాకర్ స్పష్టం చేశారు. కరీంనగర్ మున్సిపల్ కార్పొరేషన్ పరిధిలో సోమవారం పర్యటించిన ఆయన, 46వ డివిజన్ పరిధిలో యుడిఐఎఫ్ (UDIF) నిధులు రూ. 1.5 కోట్లతో చేపట్టనున్న బాక్స్ టైప్ డ్రైన్ నిర్మాణ పనులకు కేంద్ర హోంశాఖ సహాయ మంత్రి బండి సంజయ్ కుమార్‌తో కలిసి శంకుస్థాపన చేశారు.

ఈ కార్యక్రమంలో నగర మేయర్ కొలగని శ్రీనివాస్, డిప్యూటీ మేయర్ సునీల్ రావు, స్థానిక కార్పొరేటర్ మల్లికార్జున రాజేందర్, మున్సిపల్ కమిషనర్ ప్రపుల్ దేశాయ్, జిల్లా గ్రంథాలయ సంస్థ చైర్మన్ సత్తు మల్లేష్, మార్కెట్ కమిటీ చైర్మన్ ఆకుల నర్సయ్యతో పాటు పలువురు మున్సిపల్ అధికారులు, నాయకులు పాల్గొన్నారు.

* కేంద్ర, రాష్ట్ర నిధులతో సమగ్ర ప్రగతికి ప్రణాళిక..

శంకుస్థాపన అనంతరం ఏర్పాటు చేసిన విలేకరుల సమావేశంలో మంత్రి పొన్నం ప్రభాకర్ మాట్లాడుతూ, వ్యక్తిగత రాజకీయాలకు అతీతంగా కరీంనగర్ ఉమ్మడి జిల్లాను అభివృద్ధిలో అగ్రభాగాన నిలబెడతామని తెలిపారు. కేంద్ర మంత్రి బండి సంజయ్, రాష్ట్రంలో ఉన్న ఇతర మంత్రులు, ఎమ్మెల్యేలు మరియు ప్రజాప్రతినిధులందరితో కలిసి జిల్లా అభివృద్ధికి సమష్టిగా కృషి చేస్తామన్నారు. కేంద్ర మరియు రాష్ట్ర ప్రభుత్వాల నుంచి వీలైనన్ని ఎక్కువ నిధులు తీసుకువచ్చి ప్రగతి పనులను వేగవంతం చేస్తామని, అందులో భాగంగానే ఉమ్మడి జిల్లా పరిధిలో 70 నుండి 90 శాతం పనులు పూర్తయి నిలిచిపోయిన సాగునీటి ప్రాజెక్టులను ప్రాధాన్యతా క్రమంలో పూర్తి చేస్తామని స్పష్టం చేశారు.

* విద్య మరియు వైద్య రంగాలకు ప్రత్యేక ప్రాధాన్యత..

జిల్లాలో విద్య మరియు వైద్య రంగాల బలోపేతానికి ప్రభుత్వం పెద్దపీట వేస్తోందని మంత్రి వెల్లడించారు. భీమదేవరపల్లి మరియు రాజన్న సిరిసిల్ల జిల్లాల్లో కొత్తగా నవోదయ విద్యాలయాల ఏర్పాటుకు ప్రతిపాదనలు సిద్ధం చేశామని, అలాగే జమ్మికుంట మరియు హుస్నాబాద్ ప్రాంతాల్లో కేంద్రీయ విద్యాలయాలను (KVS) మంజూరు చేయాలని కేంద్ర ప్రభుత్వాన్ని కోరుతున్నామని చెప్పారు.

వీటితో పాటు ఎల్‌ఎల్‌బీ, ఎల్‌ఎల్‌ఎం, ఫార్మసీ, ఇంజనీరింగ్ వంటి ఉన్నత విద్యా కోర్సులకు జిల్లాలో ప్రాధాన్యత కల్పిస్తున్నామని తెలిపారు. వైద్య రంగ అభివృద్ధిలో భాగంగా అసంపూర్తిగా ఉన్న ప్రభుత్వ మెడికల్ కాలేజీ నిర్మాణ పనులను త్వరలోనే పూర్తి చేసి సామాన్య ప్రజలకు నాణ్యమైన వైద్య సేవలు అందుబాటులోకి తెస్తామన్నారు.

* పారిశ్రామిక, పర్యాటక రంగాల విస్తరణ మరియు పట్టణాభివృద్ధి..

ఉమ్మడి కరీంనగర్ జిల్లాలో ఉన్న సింగరేణి, ఎన్టీపీసీ సంస్థల భాగస్వామ్యంతో పాటు గోదావరి జలసంపద పుష్కలంగా ఉన్నందున పారిశ్రామికంగా అపార అవకాశాలు ఉన్నాయని పొన్నం ప్రభాకర్ పేర్కొన్నారు. జిల్లాలోని ప్రముఖ పుణ్యక్షేత్రాలైన వేములవాడ, కొండగట్టు, ధర్మపురి, కాళేశ్వరం, కొత్తకొండ దేవాలయాలతో పాటు చారిత్రక ఎలగందుల ఖిల్లా మరియు జలవనరులను పర్యాటకంగా అభివృద్ధి చేయడానికి కేంద్ర, రాష్ట్ర ప్రభుత్వాల సమన్వయంతో చర్యలు తీసుకుంటున్నామని వివరించారు.

నగరంలో పెరుగుతున్న పట్టణీకరణకు అనుగుణంగా మౌలిక సదుపాయాలు కల్పిస్తున్నామని, మున్సిపల్ శాఖలో సేవలందిచేందుకు ఇటీవల రాష్ట్ర క్యాబినెట్ దాదాపు 1000 కొత్త పోస్టుల భర్తీకి ఆమోదం తెలిపిన విషయాన్ని గుర్తుచేశారు.

* పేదల ఇళ్లు మరియు ప్రజా భాగస్వామ్యం

కరీంనగర్ నగరంలో అసంపూర్తిగా నిలిచిపోయిన డబుల్ బెడ్‌రూమ్ ఇళ్లను త్వరగా పూర్తి చేసి అర్హులైన పేదలకు అందించేలా చర్యలు తీసుకోవాలని రాష్ట్ర ఆర్థిక మంత్రిని, జిల్లా ఇంచార్జి మంత్రి తుమ్మల నాగేశ్వరరావును కోరినట్లు పొన్నం ప్రభాకర్ తెలిపారు. జిల్లా అభివృద్ధిలో ప్రజాప్రతినిధులతో పాటు జర్నలిస్టులు, ప్రజలు కూడా భాగస్వాములు కావాలని, ప్రజలకు ఉన్న ఉమ్మడి సమస్యలను తమ దృష్టికి తీసుకువస్తే సానుకూలంగా స్పందించి పరిష్కారానికి కృషి చేస్తామని హామీ ఇచ్చారు. ప్రజల ఆశీర్వాదంతో ప్రజాప్రతినిధిగా జిల్లాను ప్రగతిపథంలో నడిపించడమే తమ ప్రధాన బాధ్యత అని మంత్రి పునరుద్ఘాటించారు.