Graduate MLC Election | గ్రాడ్యుయేట్ ఎమ్మెల్సీ ఎన్నికలకు కసరత్తు

Published: 13 Nov 2026 • 02:42 PM

* జిల్లాలో 117 పోలింగ్ కేంద్రాలు
* 66,922 మంది పట్టభద్రుల ఓటర్లు
* 33 కొత్త పోలింగ్ కేంద్రాలకు ప్రతిపాదనలు

ఆకేరు న్యూస్, హనుమకొండ : వరంగల్-ఖమ్మం-నల్గొండ పట్టభద్రుల ఎమ్మెల్సీ నియోజకవర్గానికి సంబంధించి ఓటరు జాబితాల తయారీ, పోలింగ్ కేంద్రాల ఏర్పాటుపై ఎన్నికల అధికారులు కసరత్తు ముమ్మరం చేశారు.

ఇందులో భాగంగా హనుమకొండ జిల్లాలో ప్రతిపాదిత పోలింగ్ కేంద్రాల ఖరారుపై రాజకీయ పార్టీల ప్రతినిధులతో జిల్లా అదనపు కలెక్టర్ ఎన్. రవి సమావేశం నిర్వహించారు. నవంబర్ 12న హనుమకొండలో జరిగిన ఈ సమావేశంలో హనుమకొండ, పరకాల రెవెన్యూ డివిజన్ల పరిధిలోని పోలింగ్ కేంద్రాల ప్రతిపాదనలపై చర్చించారు.

* జిల్లాలో 117 పోలింగ్ కేంద్రాల ప్రతిపాదన..

ప్రస్తుత ప్రతిపాదనల ప్రకారం హనుమకొండ జిల్లాలో మొత్తం 117 పోలింగ్ కేంద్రాలను ఏర్పాటు చేయాలని అధికారులు నిర్ణయించారు. ఇందులో ప్రస్తుతం ఉన్న 84 పోలింగ్ కేంద్రాలతో పాటు కొత్తగా 33 కేంద్రాలను ప్రతిపాదించారు.

అలాగే ఆరు పోలింగ్ కేంద్రాల ప్రదేశ మార్పులు, పది కేంద్రాల పేర్ల మార్పులకు ప్రతిపాదనలు రూపొందించారు. ఈ పోలింగ్ కేంద్రాల ద్వారా జిల్లాలో సుమారు 66,922 మంది పట్టభద్రుల ఓటర్లకు ఓటు వేసే అవకాశం కల్పించేలా ప్రణాళిక రూపొందించినట్లు అదనపు కలెక్టర్ వివరించారు.

* పార్టీలకు ప్రతిపాదిత జాబితా అందజేత..

భారత ఎన్నికల సంఘం మార్గదర్శకాల ప్రకారం రూపొందించిన ప్రతిపాదిత పోలింగ్ కేంద్రాల జాబితాను రాజకీయ పార్టీల ప్రతినిధులకు అధికారులు అందజేశారు. కేంద్రాల ఏర్పాటు, ప్రదేశాల మార్పులు, పేర్ల మార్పులకు సంబంధించిన వివరాలను వివరించారు. ఈ సందర్భంగా రాజకీయ పార్టీల ప్రతినిధులు తమ అభిప్రాయాలను వెల్లడించారు.

* డి నోవో ఓటరు జాబితాల తయారీపై చర్చ..

2026 నవంబర్ 1వ తేదీని అర్హత తేదీగా తీసుకొని వరంగల్-ఖమ్మం-నల్గొండ పట్టభద్రుల నియోజకవర్గానికి డి నోవో ఓటరు జాబితాల తయారీ ప్రక్రియ కొనసాగుతోంది. ఈ ప్రక్రియను సమర్థవంతంగా పూర్తి చేసేందుకు ఎన్నికల అధికారులు చర్యలు చేపడుతున్నారు.

సాధారణ ఓటర్ల ప్రత్యేక ఇంటెన్సివ్ రివిజన్ (SIR-2026) కార్యక్రమంలో భాగంగా ఎన్యుమరేషన్ ఫారాలు పంపిణీ చేయలేని అంశాలపై కూడా సమావేశంలో చర్చించారు. గైర్హాజరు, శాశ్వతంగా నివాసం మార్చుకోవడం, మరణాలు, నకిలీ నమోదులు తదితర కారణాలతో పంపిణీ చేయలేకపోయిన ఫారాల వివరాలను అధికారులు రాజకీయ పార్టీల ప్రతినిధుల దృష్టికి తీసుకెళ్లారు.

* రాజకీయ పార్టీలు సహకరించాలి : అదనపు కలెక్టర్

డి నోవో ఓటరు జాబితాల తయారీ ప్రక్రియను విజయవంతంగా పూర్తి చేయడంలో రాజకీయ పార్టీలు పూర్తి సహకారం అందించాలని అదనపు కలెక్టర్ ఎన్. రవి కోరారు. ఓటరు జాబితాల్లో పారదర్శకత, ఖచ్చితత్వం ఉండేలా ఎన్నికల అధికారులు, రాజకీయ పార్టీలు సమన్వయంతో పనిచేయాలని సూచించారు.

* సమావేశానికి హాజరైన ప్రతినిధులు..

ఈ సమావేశంలో కాంగ్రెస్ తరఫున ఎండీ నేహాల్, బీఆర్ఎస్ నుంచి బి. ప్రవీణ్ కుమార్, బీజేపీ తరఫున రావు అమరేందర్ రెడ్డి, సీపీఐ(ఎం) నుంచి జి. ప్రభాకర్ రెడ్డి, వైఎస్సార్‌సీపీ తరఫున ఎన్. రజినీకాంత్, ఏఐఎంఐఎం నుంచి సయ్యద్ ఫైజుల్లా, బీఎస్పీ నుంచి అంబాల ప్రశాంత్, టీడీపీ తరఫున కుసుమ శ్యాం సుందర్ పాల్గొన్నారు. అలాగే హనుమకొండ ఆర్డీవో వెంకటేష్, ట్రైనీ డిప్యూటీ కలెక్టర్ పవన్, హనుమకొండ తహసీల్దార్ రవీందర్ రెడ్డి, ఎన్నికల విభాగం సూపరింటెండెంట్ జగత్ సింగ్, ఎన్నికల సిబ్బంది సమావేశంలో పాల్గొన్నారు.