Teenmar Mallanna | తీన్మార్ మల్లన్నను టార్గెట్ చేశారా?

Published: 13 Nov 2026 • 09:37 PM

* లారీ ప్రమాదం వెనుక కుట్ర?

* డీజీపీకి ఫిర్యాదు

ఆకేరు న్యూస్, హైదరాబాద్: తెలంగాణ రాజ్యాధికార పార్టీ అధినేత, ఎమ్మెల్సీ తీన్మార్ మల్లన్న తనపై హత్యకు కుట్ర జరిగి ఉండవచ్చని అనుమానం వ్యక్తం చేశారు. బీసీ రాజ్యాధికార పాదయాత్రలో భాగంగా జరిగిన రోడ్డు ప్రమాదం (Road Accident) వెనుక ఉద్దేశపూర్వక చర్యలు ఉన్నాయనే అనుమానాలు వ్యక్తం చేస్తూ తెలంగాణ డీజీపీకి ఫిర్యాదు చేశారు. ఈ ఘటనపై సమగ్ర దర్యాప్తు (Comprehensive Investigation) జరిపించి, తనతో పాటు పాదయాత్రలో పాల్గొంటున్న వారికి భద్రత కల్పించాలని కోరారు.

* పాదయాత్రలో లారీ ఢీకొట్టడంతో ప్రమాదం

బీసీల రాజకీయ, సామాజిక, రాజ్యాంగబద్ధమైన హక్కులపై ప్రజల్లో అవగాహన కల్పించడంతో పాటు రాజకీయ సాధికారత (Political Empowerment) లక్ష్యంగా తీన్మార్ మల్లన్న బీసీ రాజ్యాధికార పాదయాత్ర చేపట్టారు. ఈ క్రమంలో వలిగొండ నుంచి తొర్రూరు హైవే వైపు పాదయాత్ర కొనసాగుతుండగా యాదాద్రి భువనగిరి జిల్లా మోత్కూరు మండలం అన్నాజీపురం–తిరుమలగిరి రోడ్డు సమీపంలో ప్రమాదం జరిగినట్లు ఆయన ఫిర్యాదులో పేర్కొన్నారు.

TG30T7596 రిజిస్ట్రేషన్ నంబర్ కలిగిన లారీ వేగంగా వచ్చి తన ప్రయాణానికి ఉపయోగిస్తున్న TG30L4444 నంబర్ గల టయోటా ఫార్చునర్ కారుతో పాటు మరో తెలుపు రంగు టాటా ఆల్ట్రోజ్ కారును ఢీకొట్టిందని తెలిపారు. ఈ ఘటనలో తన సిబ్బందితో పాటు మరో వాహనంలో ప్రయాణిస్తున్న పలువురు గాయపడినట్లు వెల్లడించారు.

* తనను లక్ష్యంగా చేసుకున్నారా?

ప్రమాదం జరిగిన తీరు, పరిణామాలు అనుమానాలకు తావిస్తున్నాయని మల్లన్న పేర్కొన్నారు. బీసీల రాజకీయ సాధికారత కోసం తాను చేస్తున్న పోరాటాన్ని అడ్డుకోవాలనే ఉద్దేశంతో కొందరు ఈ ఘటనకు పాల్పడి ఉండవచ్చని అనుమానం వ్యక్తం చేశారు. తనకు శారీరక హాని కలిగించడం లేదా హత్య చేయడం లక్ష్యంగా ముందస్తు ప్రణాళికతో ప్రమాదానికి పాల్పడి ఉండే అవకాశాన్ని కూడా విచారించాలని కోరారు.

* డీఎస్పీ స్థాయి అధికారితో విచారణ

ఈ ఘటనపై తక్షణమే సంబంధిత సెక్షన్ల కింద క్రిమినల్ కేసు (Criminal Case) నమోదు చేయాలని డీజీపీని కోరారు. కనీసం డీఎస్పీ స్థాయి అధికారికి దర్యాప్తు బాధ్యతలు అప్పగించి, నిష్పక్షపాతంగా అన్ని కోణాల్లో విచారణ జరపాలని విజ్ఞప్తి చేశారు. ప్రమాదానికి కారణమైన లారీ యజమాని, డ్రైవర్ వివరాలతో పాటు వాహన యాజమాన్యం, ఉద్యోగ సంబంధాలు, గత ప్రయాణ మార్గాలను పరిశీలించాలని కోరారు. లారీ లేదా డ్రైవర్‌ను తనపై దాడికి ఎవరైనా ఉపయోగించారా అనే కోణంలోనూ విచారణ జరపాలని సూచించారు.

*సీసీటీవీ ఫుటేజీ సేకరించాలని విజ్ఞప్తి

ప్రమాద ప్రాంతంలోని సీసీటీవీ (CCTV) ఫుటేజీ, హైవే నిఘా కెమెరాల రికార్డులు, సమీప వ్యాపార సంస్థలు, భవనాల్లోని కెమెరాల దృశ్యాలు, మొబైల్ వీడియోలు, కాల్ రికార్డులు వంటి సాంకేతిక ఆధారాలను (Technical Evidence) వెంటనే భద్రపరచాలని ఫిర్యాదులో పేర్కొన్నారు. ఎలాంటి ఆధారాలు నాశనం కాకుండా చర్యలు తీసుకుని, వాటిని క్షుణ్ణంగా పరిశీలించాలని కోరారు.

*రాజకీయ కుట్ర కోణంలోనూ దర్యాప్తు

ప్రమాదం వెనుక రాజకీయ శత్రుత్వం, నేరపూరిత బెదిరింపులు, ముందస్తు నిఘా లేదా ఇతర కుట్రలు ఉన్నాయా అనే కోణాల్లోనూ విచారణ జరపాలని మల్లన్న కోరారు. బీసీ రాజ్యాధికార పాదయాత్రను అడ్డుకోవడం లేదా అందులో పాల్గొంటున్న వారిని భయభ్రాంతులకు గురిచేయడం ఈ ఘటన వెనుక ఉద్దేశమా అనే విషయాన్ని తేల్చాలని విజ్ఞప్తి చేశారు.

*పోలీసులపై నమ్మకం ఉంది

తెలంగాణ పోలీసుల నిష్పక్షపాత పనితీరుపై తనకు పూర్తి విశ్వాసం ఉందని తీన్మార్ మల్లన్న తెలిపారు. డీజీపీ వ్యక్తిగతంగా ఈ వ్యవహారంలో జోక్యం చేసుకుని తక్షణమే సమగ్ర దర్యాప్తునకు ఆదేశించాలని కోరారు. ప్రమాదానికి సంబంధించిన ప్రతి ఆధారాన్ని పరిశీలించి, బాధ్యులను గుర్తించి చట్టప్రకారం చర్యలు తీసుకోవాలని విజ్ఞప్తి చేశారు.

ఈ కార్యక్రమంలో తెలంగాణ రాజ్యాధికార పార్టీ వర్కింగ్ ప్రెసిడెంట్ మాదం రజినీ కుమార్ యాదవ్, ప్రధాన కార్యదర్శి అశోక్ ముదిరాజ్, క్రమశిక్షణ కమిటీ చైర్మన్ బంధారపు నర్సయ్య గౌడ్ పాల్గొన్నారు.