MP Kadiyam Kavya | వైద్యం.. పేదలకు భారం కాకూడదు!

Published: 14 Nov 2026 • 04:04 PM

* ఎంపీ డాక్టర్ కడియం కావ్య

ఆకేరు న్యూస్, హనుమకొండ, నవంబర్ 14: వినికిడి లోపంతో బాధపడుతున్న వారికి అత్యాధునిక వైద్య సేవలు అందుబాటులోకి రావాలని వరంగల్ ఎంపీ డాక్టర్ కడియం కావ్య ఆకాంక్షించారు. ముఖ్యంగా కాక్లియర్ ఇంప్లాంట్ (Cochlear Implant) వంటి ఖరీదైన చికిత్సల వ్యయాన్ని తగ్గించి పేద, మధ్యతరగతి కుటుంబాలకు అందుబాటులోకి తీసుకురావాలని సూచించారు. అలాగే క్యాన్సర్‌ను ప్రాథమిక దశలోనే గుర్తించేలా ప్రభుత్వ ఆసుపత్రుల్లో సమర్థవంతమైన స్క్రీనింగ్ (Screening) వ్యవస్థను ఏర్పాటు చేయాలని అన్నారు.

హనుమకొండ బాలసముద్రంలోని సేవకా రీజెన్సీ, రాయల్ డెక్కన్ హోటల్స్‌లో అపర్ణ ఈఎన్‌టీ హాస్పిటల్, అపర్ణ రాయ్ ఈఎన్‌టీ ఫౌండేషన్ ఆధ్వర్యంలో, ఏఓఐ తెలంగాణ (AOI Telangana) సహకారంతో నిర్వహించిన ‘సీఐ ఫ్రంటియర్స్–2026’ (CI Frontiers–2026) సదస్సుకు ఎంపీ డాక్టర్ కడియం కావ్య ముఖ్య అతిథిగా హాజరయ్యారు. ఈ సందర్భంగా ఆమె వైద్య రంగంలో పరిశోధనలు, ఆధునిక చికిత్సలు, ప్రజారోగ్యంపై కీలక సూచనలు చేశారు.

* వ్యాధి మూలకారణాలపై పరిశోధనలు

వరంగల్ వైద్య రంగానికి విశేష సేవలందిస్తున్న సీనియర్ వైద్యులు, నిపుణులు ఒకే వేదికపై ఉండటం సంతోషంగా ఉందని ఎంపీ అన్నారు. సీనియర్ వైద్యుల అనుభవం, మార్గదర్శకత్వం యువ వైద్యులకు ఎంతో ఉపయోగపడుతుందని పేర్కొన్నారు. ప్రస్తుతం అనేక వ్యాధులకు లక్షణాల ఆధారంగా చికిత్స అందిస్తున్నప్పటికీ, వాటి అసలు మూలకారణాలను గుర్తించి శాశ్వత పరిష్కారాలు కనుగొనే దిశగా పరిశోధనలు జరగాలని సూచించారు. రోగులకు తాత్కాలిక ఉపశమనం కాకుండా సంపూర్ణ ఆరోగ్యాన్ని అందించే చికిత్సా విధానాలు అభివృద్ధి చెందాలన్నారు.

పర్యావరణ కాలుష్యం, ఆహార కల్తీ, ప్లాస్టిక్ వినియోగం, మైక్రోప్లాస్టిక్స్ (Microplastics) ప్రజారోగ్యంపై చూపుతున్న ప్రభావాలపై కూడా వైద్యులు పరిశోధనలు చేయాలని కోరారు.

* క్యాన్సర్‌పై ముందస్తు నిఘా

క్యాన్సర్‌ను ప్రారంభ దశలోనే గుర్తించడం అత్యంత ముఖ్యమని కడియం కావ్య స్పష్టం చేశారు. ఇందుకోసం ప్రభుత్వ ఆసుపత్రుల్లో క్యాన్సర్ స్క్రీనింగ్ కార్యక్రమాలను క్షేత్రస్థాయిలో సమర్థవంతంగా అమలు చేయాలని అన్నారు. వ్యాధి ముదిరిన తర్వాత చికిత్సకు లక్షల రూపాయలు ఖర్చవుతాయని, దీనివల్ల బాధిత కుటుంబాలతో పాటు ప్రభుత్వంపైనా ఆర్థిక భారం పడుతుందని వివరించారు. అదే వ్యాధిని తొలిదశలో గుర్తిస్తే తక్కువ ఖర్చుతో మెరుగైన చికిత్స అందించే అవకాశం ఉంటుందని పేర్కొన్నారు.

పార్లమెంటరీ స్థాయి ఆరోగ్య, కుటుంబ సంక్షేమ శాఖ కమిటీలో సభ్యురాలిగా ఉన్న తాను ఈ అంశానికి ప్రత్యేక ప్రాధాన్యత ఇస్తున్నానని తెలిపారు. ప్రభుత్వ ఆసుపత్రుల్లో క్యాన్సర్ స్క్రీనింగ్ పేరుకే పరిమితం కాకుండా ప్రజలకు వాస్తవంగా ఉపయోగపడేలా చర్యలు తీసుకోవాలని సూచించారు. మహిళల్లోనూ గొంతు క్యాన్సర్ వంటి వ్యాధులు కనిపిస్తున్న నేపథ్యంలో అవగాహన, ముందస్తు పరీక్షలు, నివారణ చర్యలను వివిధ శాఖలు సమన్వయంతో చేపట్టాలని కోరారు.

*రూ.15 లక్షల వరకు ఖర్చు

కాక్లియర్ ఇంప్లాంట్ చికిత్స ఖరీదైనదని ఎంపీ పేర్కొన్నారు. ప్రైవేటు వైద్య రంగంలో ఈ చికిత్సకు సుమారు రూ.10 లక్షల నుంచి రూ.15 లక్షల వరకు ఖర్చవుతుండగా, ప్రభుత్వ వైద్య వ్యవస్థలో ఒక్కో కేసుకు సుమారు రూ.6 లక్షల వ్యయం అవుతోందని వివరించారు. పుట్టుకతోనే వినికిడి లోపం ఉన్న చిన్నారులకు ఈ చికిత్స ఎంతో ప్రయోజనకరమని తెలిపారు. అయితే ఆర్థిక ఇబ్బందుల కారణంగా ఏ ఒక్కరూ ఈ ఆధునిక చికిత్సకు దూరం కాకూడదన్నారు. భవిష్యత్తులో చికిత్స ఖర్చును మరింత తగ్గించి పేద కుటుంబాలకు సైతం సులభంగా అందుబాటులోకి తీసుకురావాలని ఆకాంక్షించారు.

ఈ కార్యక్రమంలో అపర్ణ ఈఎన్‌టీ హాస్పిటల్, అపర్ణ రాయ్ ఫౌండేషన్ ప్రతినిధులతో పాటు ప్రముఖ వైద్యులు డాక్టర్ మోహన్ కామేశ్వరన్, ఆర్గనైజింగ్ చైర్మన్ డాక్టర్ సుదీప్, డాక్టర్ ద్వారకనాథ్, డాక్టర్ కాళీప్రసాద్, డాక్టర్ సత్యనారాయణ, డాక్టర్ రణవీర్ సింగ్, డాక్టర్ ఏకనాథం తదితరులు పాల్గొన్నారు.