పసికందుపై పెద్దపులి దాడి
* ఆరు నెలల చిన్నారి మృతి!
* తిరి గ్రామంలో తీవ్ర విషాదం
ఆకేరు న్యూస్, మహారాష్ట్ర: ఇంట్లో ఊయలలో హాయిగా నిద్రిస్తున్న ఆరు నెలల పసికందుపై పెద్దపులి (Tiger) దాడి చేసి ప్రాణాలు తీసిన హృదయవిదారక ఘటన మహారాష్ట్రలోని భండారా జిల్లాలో చోటుచేసుకుంది. తల్లి వంట చేస్తుండగా ఇంట్లోకి చొరబడిన పెద్దపులి చిన్నారిని నోట కరుచుకుని దాడి చేసింది. తల్లి పెద్దగా కేకలు వేయడంతో పసికందును వదిలి పులి అక్కడి నుంచి పారిపోయింది. అయితే, తీవ్రంగా గాయపడిన చిన్నారి ప్రాణాలు కోల్పోవడంతో కుటుంబంలో తీరని విషాదం నెలకొంది.
ఊయలలో నిద్రిస్తుండగా దాడి
భండారా జిల్లా (Bhandara District) పవని తహశీల్ పరిధిలోని అడ్యాల్ ప్రాంతం తిరి గ్రామంలో నవంబర్ 13, శుక్రవారం సాయంత్రం ఈ ఘటన జరిగింది. మృతుడిని అద్విక్ అభిమన్ బొంద్రే (6 నెలలు)గా గుర్తించారు. శుక్రవారం సాయంత్రం సుమారు 7 గంటల సమయంలో అద్విక్ ఇంట్లోని ఊయలలో నిద్రిస్తున్నాడు. అదే సమయంలో అతని తల్లి వంటగదిలో వంట చేస్తోంది.
ఇంతలో అకస్మాత్తుగా ఇంట్లోకి ప్రవేశించిన పెద్దపులి ఊయలలో ఉన్న చిన్నారిపై దాడి చేసి నోట కరుచుకుంది. ఈ దృశ్యాన్ని చూసిన తల్లి భయంతో గట్టిగా కేకలు వేసింది. ఆమె అరుపులు విన్న పులి చిన్నారిని వదిలేసి అక్కడి నుంచి పారిపోయింది.
గ్రామంలో విషాద ఛాయలు
తల్లి కేకలు విని కుటుంబ సభ్యులు వెంటనే అక్కడికి చేరుకున్నారు. అయితే అప్పటికే చిన్నారి తీవ్రంగా గాయపడటంతో ప్రాణాలు కోల్పోయాడు. ఆరు నెలల కుమారుడిని కోల్పోయిన తల్లిదండ్రుల రోదనలు గ్రామస్తులను కలచివేశాయి. ఈ ఘటనతో తిరి గ్రామంలో తీవ్ర విషాదంతో పాటు భయాందోళనలు నెలకొన్నాయి.
అటవీశాఖపై గ్రామస్తుల ఆగ్రహం
ఘటనపై సమాచారం అందుకున్న అటవీశాఖ (Forest Department) సిబ్బంది గ్రామానికి చేరుకుని విచారణ ప్రారంభించారు. పంచనామా తదితర ప్రక్రియలు చేపట్టారు. మరోవైపు, నివాస ప్రాంతంలోకి పెద్దపులి చొరబడి చిన్నారి ప్రాణాలు తీసిన ఘటనపై గ్రామస్తులు తీవ్ర ఆగ్రహం వ్యక్తం చేస్తున్నారు.
పులి సంచారాన్ని అరికట్టేందుకు తక్షణ చర్యలు చేపట్టాలని, గ్రామస్తులకు రక్షణ కల్పించాలని అధికారులను డిమాండ్ చేస్తున్నారు. పులి మళ్లీ గ్రామంలోకి ప్రవేశించకుండా పటిష్టమైన భద్రతా చర్యలు తీసుకోవాలని కోరుతున్నారు.
About the Author
Please tell us what is wrong. Your report will be sent to the website team.
