Perumandla Ramakrishna | సేవా కార్యక్రమాల్లో యువత ముందుండాలి

Published: 15 Nov 2026 • 06:38 PM

* డాక్టర్ పెరుమాండ్ల రామకృష్ణ పిలుపు

ఆకేరు న్యూస్, హనుమకొండ: విద్యార్థులు విద్యాభ్యాసంతో పాటు సేవా కార్యక్రమాల్లోనూ చురుగ్గా పాల్గొనాలని లయన్ డాక్టర్ పెరుమాండ్ల రామకృష్ణ పిలుపునిచ్చారు. లయన్స్ క్లబ్ ఇంటర్నేషనల్ (Lions Clubs International), లియో డిస్ట్రిక్ట్ 320F ఆధ్వర్యంలో నిర్వహించిన ప్రమాణ స్వీకార కార్యక్రమం (Installation Ceremony) ఘనంగా జరిగింది. ఈ కార్యక్రమంలో పలువురు ప్రముఖులు, లయన్స్ క్లబ్ ప్రతినిధులు, విద్యార్థులు పాల్గొన్నారు.

ఈ వేడుకకు లయన్ జాన్ కెన్నడీ, డాక్టర్ చంద్రశేఖర్ ఆర్య, లయన్ ఉషా మార్తా, వెంకటరెడ్డి, హరికిషన్ రెడ్డి, సుధాకర్ రెడ్డి తదితరులు హాజరయ్యారు. లియో అధ్యక్షురాలు నజీరా, లయన్స్ క్లబ్ ఆఫ్ ఫిజియోథెరపిస్ట్స్ అధ్యక్షుడు డాక్టర్ శివరామకృష్ణ, క్లబ్ సభ్యులు, విద్యార్థులు పెద్ద సంఖ్యలో పాల్గొన్నారు.

ఈ సందర్భంగా ముఖ్య అతిథిగా పాల్గొన్న లయన్ డాక్టర్ పెరుమాండ్ల రామకృష్ణ మాట్లాడుతూ.. లయన్స్ క్లబ్ (Lions Club) అంటేనే సేవకు ప్రతీక అని పేర్కొన్నారు. సమాజానికి సేవ చేయడం ద్వారానే మనిషికి నిజమైన గుర్తింపు, గౌరవం లభిస్తాయని అన్నారు. విద్యార్థి దశ నుంచే సేవాభావం, నాయకత్వ లక్షణాలు (Leadership Skills), క్రమశిక్షణ, సామాజిక బాధ్యతను అలవర్చుకోవాలని సూచించారు.

పేద విద్యార్థులకు విద్యా సహాయం అందించడం, ఆర్థికంగా వెనుకబడిన కుటుంబాలకు అండగా నిలవడం, ఆరోగ్య అవగాహన కార్యక్రమాలు నిర్వహించడం, రక్తదాన శిబిరాలు, పర్యావరణ పరిరక్షణ వంటి సేవా కార్యక్రమాల్లో యువత భాగస్వాములు కావాలని ఆకాంక్షించారు.

నేటి విద్యార్థులే రేపటి నాయకులని, సేవా దృక్పథంతో ముందుకు సాగినప్పుడే సమాజంలో ఉన్నత స్థాయికి చేరుకోగలరని రామకృష్ణ అన్నారు. లియో క్లబ్ (Leo Club) ద్వారా విద్యార్థులు సేవాభావంతో పాటు నాయకత్వ లక్షణాలను పెంపొందించుకునేందుకు మంచి అవకాశం లభిస్తుందని డాక్టర్ శివరామకృష్ణ తెలిపారు.

‘సేవే లక్ష్యం – సమాజమే కుటుంబం’ అనే నినాదంతో ప్రతి ఒక్కరూ సామాజిక సేవా కార్యక్రమాల్లో భాగస్వాములు కావాలని డాక్టర్ లయన్ పెరుమాండ్ల రామకృష్ణ పిలుపునిచ్చారు.