Adilabad RIMS
* పుట్టిన కొన్ని గంటల్లోనే శిశువు మృతి
* అర్ధరాత్రి జననం.. తెల్లవారుజామున మరణం..
* ఆదిలాబాద్ రిమ్స్‌లో ఏం జరుగుతోంది
ఆకేరు న్యూస్, ఆదిలాబాద్ : ఆదిలాబాద్ రిమ్స్ ఆసుపత్రిలో మరో విషాద ఘటన చోటుచేసుకుంది. అప్పుడే పుట్టిన ఓ పసికందు మృతి చెందడం కలకలం రేపింది. వైద్యుల నిర్లక్ష్యం కారణంగానే తమ బిడ్డ ప్రాణాలు కోల్పోయాడని కుటుంబ సభ్యులు ఆరోపిస్తున్నారు. ఈ ఘటనతో ఆసుపత్రి వద్ద విషాద వాతావరణం నెలకొంది. ఆదిలాబాద్ జిల్లా గుడిహత్నూర్ మండలం తోషం గ్రామానికి చెందిన షేక్ సీమ ప్రసవం కోసం రిమ్స్ ఆసుపత్రిలో చేరారు. ఈ క్రమంలో అర్ధరాత్రి సమయంలో ఆమె మగబిడ్డకు జన్మనిచ్చారు. అయితే పుట్టిన కొద్ది గంటల్లోనే శిశువు మృతి చెందడంతో కుటుంబ సభ్యులు తీవ్ర విషాదంలో మునిగిపోయారు.
* వైద్యుల నిర్లక్ష్యంపై కుటుంబ సభ్యుల ఆరోపణలు
ఉదయం 3.30 గంటల సమయంలో తమ శిశువు మృతి చెందినట్లు కుటుంబ సభ్యులు తెలిపారు. వైద్యులు సకాలంలో స్పందించకపోవడం, సరైన వైద్య సేవలు అందించకపోవడం వల్లే ఈ ఘటన జరిగిందని వారు ఆరోపిస్తున్నారు. తమకు జరిగిన అన్యాయంపై బాధిత కుటుంబ సభ్యులు ఆవేదన వ్యక్తం చేస్తున్నారు.
* మరో శిశువు మృతితో ఆందోళన..
శిశువు మృతితో ఆసుపత్రి వద్ద ఉద్రిక్త పరిస్థితులు నెలకొన్నాయి. సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరించారు. ఘటనకు దారితీసిన పరిస్థితులపై విచారణ చేపట్టారు. శిశువు మృతికి గల అసలు కారణాలు, వైద్య సేవల్లో ఏమైనా లోపాలు జరిగాయా అనే అంశాలు విచారణలో తేలాల్సి ఉంది.
వరుసగా చోటుచేసుకుంటున్న ఇలాంటి ఘటనలతో ఆదిలాబాద్ రిమ్స్ ఆసుపత్రి మరోసారి వార్తల్లో నిలిచింది. ఈ ఘటనపై ఉన్నతాధికారులు స్పందించి సమగ్ర విచారణ జరిపించాలని బాధిత కుటుంబ సభ్యులు కోరుతున్నారు.
About the Author
Please tell us what is wrong. Your report will be sent to the website team.
