Hyderabad | అక్రమ కట్టడం కూలి అపార్ట్‌మెంట్ ధ్వంసం

Published: 23 Aug 2026 • 06:17 PM

* వీధిపాలైన 25 కుటుంబాలు

ఆకేరు న్యూస్ హైదరాబాద్:

హైదరాబాద్‌లోని మాదాపూర్ పరిధిలోని అంజయ్యనగర్‌లో నిర్మిస్తున్న అక్రమ భవనం ఒక్కసారిగా కూలిపోయిన ఘటన తీవ్ర విషాదాన్ని, ఆందోళనను రేకెత్తించింది. అతి తక్కువ విస్తీర్ణంలో (సుమారు 50 చదరపు గజాలు) ఎలాంటి అనుమతులు లేకుండా నిర్మిస్తున్న ఏడు అంతస్తుల భవనం అకస్మాత్తుగా పక్కనే ఉన్న అపార్ట్‌మెంట్‌పైకి పడిపోయింది. ఈ ఘోర ప్రమాదంలో భవనంలో పనిచేస్తున్న ఇద్దరు కార్మికులు ప్రాణాలు కోల్పోగా, పలువురికి గాయాలయ్యాయి.

* శిధిలాల తొలగింపు చర్యలు వేగవంతం

ప్రమాద సమాచారం అందుకున్న వెంటనే పోలీసులు, హెచ్‌వైడిఆర్‌ఏఏ (HYDRAA), ఎన్‌డిఆర్‌ఎఫ్ (NDRF) బృందాలు రంగంలోకి దిగాయి. జేసీబీలు, భారీ యంత్రాల సహాయంతో శిధిలాలను తొలగించే పనులను కొనసాగిస్తున్నారు. సురక్షిత ప్రాంతాలకు రోడ్డు రాకపోకలను మళ్లించి, ఇతర ప్రమాదాలు జరగకుండా ముందస్తు చర్యలు చేపట్టారు.

* పక్కనే ఉన్న అపార్ట్‌మెంట్‌కు భారీ నష్టం

అక్రమంగా నిర్మించిన ఏడు అంతస్తుల భవనం పక్కనే ఉన్న ఆవాస అపార్ట్‌మెంట్‌ పైకూలడంతో దాని భాగాలు, గోడలు తీవ్రంగా దెబ్బతిన్నాయి. పక్క భవనం నుంచి ఊడిపడిన శిధిలాలు అపార్ట్‌మెంట్ గదుల్లోకి దూసుకెళ్లడంతో లక్షల రూపాయలు ఖర్చు చేసి చేయించుకున్న ఇంటీరియర్ డిజైన్‌, ఆసరాగా ఉన్న గృహోపకరణాలు పూర్తిగా ధ్వంసమయ్యాయి.

* 25 కుటుంబాలను ఖాళీ చేయించిన అధికారులు

భవనం కూలిన ప్రభావంతో పక్కనే ఉన్న అపార్ట్‌మెంట్ పిల్లర్లు, నిర్మాణం బలహీనపడే ప్రమాదం ఉండటంతో అధికారులు అప్రమత్తమయ్యారు. ఎలాంటి ప్రాణనష్టం జరగకుండా ముందస్తు భద్రతా చర్యల్లో భాగంగా అపార్ట్‌మెంట్‌లోని 25 కుటుంబాలను తక్షణమే ఖాళీ చేయించి వేరే ప్రాంతాలకు తరలించారు.

* ఎవరో చేసిన తప్పుకు మేమెందుకు బలి కావాలి?

సొంతింటి కలను నెరవేర్చుకుని, రూ. లక్షలు వెచ్చించి ఆధునిక ఇంటీరియర్ డిజైన్లు చేయించుకున్న అపార్ట్‌మెంట్ వాసులు ఈ హఠాత్ పరిణామంతో తీవ్ర మానసిక ఆందోళన చెందుతున్నారు. “నిబంధనలకు విరుద్ధంగా బిల్డర్లు చేసే అక్రమ నిర్మాణాల వల్ల, వారి స్వార్థం వల్ల మేమెందుకు వీధిపాలు కావాలి?” అని బాధితులు ప్రశ్నిస్తున్నారు. గతంలోనే హెచ్చరించినా అధికారులు కఠిన చర్యలు తీసుకోలేదని ఆరోపిస్తున్నారు.

* పరిహారంపై అధికారులను నిలదీస్తున్న బాధితులు

తమకు జరిగిన ఆస్తి నష్టానికి, అనుభవిస్తున్న మానసిక వేదనకు బాధ్యులెవరు? పరిహారం ఎవరు చెల్లిస్తారని బాధితులు ప్రభుత్వాన్ని, జీహెచ్‌ఎంసీ అధికారులను నిలదీస్తున్నారు. ఘటనకు కారణమైన బిల్డర్, నిబంధనలు ఉల్లంఘించిన యజమానిపై కఠిన చర్యలు తీసుకోవాలని, తమకు జరిగిన నష్టానికి పూర్తిస్థాయి పరిహారం అందించి న్యాయం చేయాలని బాధితులు డిమాండ్ చేస్తున్నారు.