Bethlehem Kudumba Unit
Bethlehem Kudumba Unit: ఆకేరు న్యూస్, సినిమా: మలయాళ నటుడు నివిన్ పౌలీ, మమిత బైజు ప్రధాన పాత్రల్లో నటించిన బెత్లెహెం కుటుంబ యూనిట్ బాక్సాఫీస్ వద్ద దూసుకెళ్తోంది. గిరీష్ ఏడి దర్శకత్వంలో తెరకెక్కిన ఈ చిత్రం ఆగస్టు 21న ప్రేక్షకుల ముందుకు వచ్చింది. విడుదలైనప్పటి నుంచి ప్రపంచవ్యాప్తంగా భారీ వసూళ్లు సాధిస్తూ రూ.300 కోట్ల క్లబ్లోకి అడుగుపెట్టింది.
రూ.305 కోట్లకు పైగా వసూళ్లు
తాజా సమాచారం ప్రకారం బెత్లెహెం కుటుంబ యూనిట్ ప్రపంచవ్యాప్తంగా రూ.305 కోట్లకు పైగా గ్రాస్ వసూళ్లు సాధించినట్లు చిత్రబృందం తెలిపింది. థియేటర్లలో సినిమా జోరు ఇంకా కొనసాగుతోందని పేర్కొంది. రూ.300 కోట్ల మార్క్ను అందుకున్న తొలి మలయాళ చిత్రంగా నిలిచిన లోక చాప్టర్ 1 రికార్డును ఈ సినిమా అధిగమించినట్లు వెల్లడించింది. దిలీష్ పోతన్, ఫహాద్ ఫాజిల్, శ్యామ్ పుష్కరన్లకు చెందిన భావన స్టూడియోస్ ఈ చిత్రాన్ని నిర్మించింది. ఈ విజయం మలయాళ చిత్ర పరిశ్రమలో బాక్సాఫీస్ రికార్డులకు కొత్త అర్థాన్ని ఇస్తోందని చిత్రబృందం అభిప్రాయపడింది.
నివిన్, మమితపై దర్శకుడి ప్రశంసలు
దర్శకుడు గిరీష్ ఏడి మాట్లాడుతూ.. పక్కింటి కుర్రాడి తరహా పాత్రకు నివిన్ పౌలీ సరిగ్గా సరిపోయారని తెలిపారు. మమిత బైజు సహజ నటనకు పేరుగాంచిన నటి అని ప్రశంసించారు. గతంలో ‘సూపర్ శరణ్య’ చిత్రంలో ఆమెతో కలిసి పనిచేశానని, అప్పుడే ఆమెను దృష్టిలో పెట్టుకుని ఈ కథను రూపొందించాలని అనుకున్నట్లు చెప్పారు.
వారం వ్యవధిలో రెండు సినిమాలు
మమిత బైజు నటించిన విశ్వనాథ్ అండ్ సన్స్ బెత్లెహెం కుటుంబ యూనిట్ సినిమాలు వారం వ్యవధిలో విడుదల కావడం మరో ఆసక్తికర అంశం. రెండు చిత్రాల్లోనూ ఆమె పాత్రలు ప్రేమకథతో ముడిపడి ఉండటం విశేషం. విశ్వనాథ్ అండ్ సన్స్ లో మ్యాడీ పాత్రలో కనిపించిన మమిత.. బెత్లెహెం కుటుంబ యూనిట్ లో యాష్లీగా అలరించారు.
About the Author
Please tell us what is wrong. Your report will be sent to the website team.
