Wardhannapet | వర్ధన్నపేట ఎమ్మెల్యేపై బీఆర్‌ఎస్ సీరియస్

Published: 21 Aug 2026 • 06:03 PM

* మాజీ ఎమ్మెల్యే ఆరూరి రమేశ్‌పై అక్రమ కేసులా

ఆకేరు న్యూస్, వరంగల్: రాజకీయ కక్షసాధింపు చర్యల్లో భాగంగానే మాజీ ఎమ్మెల్యే ఆరూరి రమేశ్‌తో పాటు బీఆర్‌ఎస్ కార్యకర్తలపై అక్రమ కేసులు బనాయిస్తున్నారని పార్టీ నాయకులు తీవ్ర ఆగ్రహం వ్యక్తం చేశారు. శుక్రవారం వర్ధన్నపేట మండల కేంద్రంలో ఏర్పాటు చేసిన విలేకరుల సమావేశంలో మండల బీఆర్‌ఎస్ పార్టీ అధ్యక్షుడు తూళ్ళ కుమారస్వామి, ఇతర ప్రజాప్రతినిధులు మాట్లాడుతూ స్థానిక ఎమ్మెల్యే తీరుపై విమర్శలు గుప్పించారు.

* జెండా ఆవిష్కరణలో ఎలాంటి నిబంధనా ఉల్లంఘన లేదు

స్వాతంత్య్ర దినోత్సవం సందర్భంగా వర్ధన్నపేట అంబేద్కర్ సెంటర్‌లో ఎవరికీ ఎలాంటి ట్రాఫిక్ అంతరాయం కలగకుండా, ప్రశాంత వాతావరణంలో శాంతియుతంగా జాతీయ జెండాను ఆవిష్కరించామని నేతలు స్పష్టం చేశారు. జెండా ఎగురవేసే సమయంలో తాడు విషయంలో చిన్న సాంకేతిక లోపం తలెత్తినప్పటికీ, వెంటనే కేవలం ఐదు సెకన్ల వ్యవధిలోనే దాన్ని సరిచేసి, జాతీయ గీతాలాపనతో సగౌరవంగా వందనం సమర్పించామని తెలిపారు. జాతీయ జెండాకు తాము ఎలాంటి అవమానం కలిగించలేదని వివరించారు.

* ఎమ్మెల్యే ఒత్తిడితోనే అక్రమ కేసులు..

స్థానిక ఎమ్మెల్యే తీవ్ర ఒత్తిడి తెచ్చి, మున్సిపల్ కమిషనర్ ద్వారా పోలీసులకు ఫిర్యాదు చేయించారని వారు ఆరోపించారు. మాజీ ఎమ్మెల్యే ఆరూరి రమేశ్‌తో పాటు సుమారు 25 మంది బీఆర్‌ఎస్ కార్యకర్తలపై అక్రమంగా ఎఫ్‌ఐఆర్ నమోదు చేయించడం దారుణమని మండిపడ్డారు. దేశవ్యాప్తంగా ప్రతి పౌరుడు, కార్మికులు, ఆటో యూనియన్ల ప్రతినిధులు స్వచ్ఛందంగా స్వాతంత్య్ర వేడుకలు జరుపుకున్నారని, కావాలనే బీఆర్‌ఎస్ శ్రేణులను లక్ష్యంగా చేసుకుని కేసులు పెట్టడం ఎంతవరకు సమంజసమని ప్రశ్నించారు.

* పోలీసు ధోరణి వీడి ప్రజా సమస్యలపై దృష్టి పెట్టాలి

గతంలో పోలీసు అధికారిగా పనిచేసిన ఎమ్మెల్యే, ప్రజాప్రతినిధిగా ఎన్నికైన తర్వాత కూడా ఇంకా అదే ధోరణితో వ్యవహరిస్తున్నారని నేతలు విమర్శించారు. నియోజకవర్గంలో రాజీవ్ గాంధీ విగ్రహం వేరే ప్రాంతంలో ఉన్నప్పటికీ, కావాలని అంబేద్కర్ సెంటర్ వద్ద కార్యక్రమం నిర్వహించి గంటల తరబడి రవాణాకు తీవ్ర అంతరాయం కలిగించారని ఆరోపించారు. దీనిపై సాధారణ ప్రజలతో పాటు తాము కూడా పోలీసులకు ఫిర్యాదు చేశామని గుర్తుచేశారు.

ప్రజాస్వామ్య దేశంలో ప్రతిపక్షాల గొంతు నొక్కాలని చూడటం, ప్రశ్నించిన వారిపై అక్రమ కేసులు పెట్టడం సరికాదని వారు హెచ్చరించారు. ఇది పోలీసు రాజ్యం కాదని, లౌకిక ప్రజాస్వామ్య వ్యవస్థ అని గ్రహించాలని హితవు పలికారు. ఎమ్మెల్యే తన వైఖరిని మార్చుకుని, నియోజకవర్గ ప్రజా సమస్యల పరిష్కారంపై దృష్టి సారించాలని డిమాండ్ చేశారు.

ఈ విలేకరుల సమావేశంలో బీఆర్‌ఎస్ కౌన్సిలర్లు గుజ్జ వీర రాఘవరావు, తిరుపతి సురేష్, తుమ్మల అరుణ శ్రీధర్, రాజశేఖర్, మాజీ మున్సిపల్ సెక్రటరీ కొండేటి శ్రీనివాస్, 1వ డివిజన్ అధ్యక్షుడు మేకల శ్రీనివాస్, 10వ డివిజన్ అధ్యక్షుడు కొండేటి సంపత్, రాజు రామన్న, శ్రీకాంత్, 10వ డివిజన్ యూత్ అధ్యక్షుడు పసునూరి రమేష్ తదితరులు పాల్గొన్నారు.