CM REVANTH REDDY | కేంద్రంతో కీలక భేటీలు

* తెలంగాణ పెండింగ్ అంశాలపై కేంద్రంతో కీలక భేటీలు

ఆకేరు న్యూస్, డెస్క్: తెలంగాణ ముఖ్యమంత్రి ఎ. రేవంత్ ఢిల్లీ పర్యటన అత్యంత ప్రాధాన్యత సంతరించుకుంది. రాష్ట్ర ప్రయోజనాలే పరమావధిగా, తెలంగాణకు రావలసిన నిధులు, పెండింగ్ ప్రాజెక్టుల సాధనే లక్ష్యంగా సీఎం హస్తినలో వరుస భేటీలతో బిజీగా గడుపుతున్నారు. డిప్యూటీ సీఎం భట్టి విక్రమార్క, మంత్రి పొంగులేటి శ్రీనివాసరెడ్డిలతో కలిసి రేవంత్ రెడ్డి కేంద్ర మంత్రులను కలుస్తూ రాష్ట్రానికి సంబంధించిన కీలక ప్రతిపాదనలను వారి ముందు ఉంచుతున్నారు.

* అజెండాలో ఉన్న కీలక అంశాలు ఇవే…
ఈ పర్యటనలో భాగంగా ముఖ్యమంత్రి రేవంత్ రెడ్డి ప్రధానంగా మూడు రంగాలపై ప్రత్యేక దృష్టి సారించారు.

* మెట్రో రైల్ ఫేజ్-2 విస్తరణ…

హైదరాబాద్ మెట్రో రెండో దశ విస్తరణతో పాటు శంషాబాద్ ఎయిర్‌పోర్ట్ కనెక్టివిటీకి సంబంధించిన అంశాన్ని కేంద్ర పట్టణాభివృద్ధి శాఖ మంత్రి మనోహర్ లాల్ ఖట్టర్ దృష్టికి సీఎం తీసుకెళ్లనున్నారు. ఈ ప్రాజెక్టులో కేంద్ర భాగస్వామ్యం, నిధుల విడుదలపై చర్చించనున్నారు.

* రీజినల్ రింగ్ రోడ్ (RRR) & జాతీయ రహదారులు….

తెలంగాణ రవాణా రంగానికి మలుపు తిప్పే రీజినల్ రింగ్ రోడ్ (ఆర్‌ఆర్‌ఆర్‌) ప్రాజెక్టు పనులను వేగవంతం చేయడంపై కేంద్ర రోడ్డు రవాణా శాఖ మంత్రి నితిన్ గడ్కరీతో రేవంత్ రెడ్డి ప్రత్యేకంగా భేటీ కానున్నారు. అలాగే హైదరాబాద్ నుంచి అమరావతి వరకు ప్రతిపాదించిన 12 వరుసల గ్రీన్ ఫీల్డ్ ఎక్స్‌ప్రెస్‌వేకు సంబంధించిన అంశాలు కూడా ఈ చర్చల్లో ప్రధానంగా రానున్నాయి.

* నూతన విమానాశ్రయాలు & పౌర విమానయానం…

కేంద్ర విమానయాన శాఖ మంత్రి కింజారపు రామ్మోహన్ నాయుడుతో జరిగే భేటీలో రాష్ట్రంలో కొత్త విమానాశ్రయాల ఏర్పాటు, కొత్తగా కార్గో సర్వీసులు, మెయింటెనెన్స్, రిపేర్ అండ్ ఓవర్ హాల్ (MRO) సౌకర్యాల కల్పనపై సీఎం ప్రతిపాదనలు సమర్పించనున్నారు.

* సమష్టి పోరాటమే లక్ష్యం…

* ఢిల్లీ పర్యటనకు ముందే సీఎం రేవంత్ రెడ్డి హైదరాబాద్‌లోని ప్రజా భవన్‌లో సర్వపక్ష ఎంపీలతో సమావేశమయ్యారు. పార్టీలకూ అతీతంగా తెలంగాణ అభివృద్ధి కోసం పార్లమెంట్ వేదికగా గళమెత్తాలని, కేంద్రం నుంచి రావాల్సిన వాటాలు, ఐఐఎం (IIM) వంటి ప్రతిష్టాత్మక సంస్థల సాధన కోసం కలిసికట్టుగా ఒత్తిడి తీసుకురావాలని ఎంపీలను కోరారు. ఆ మేరకు పక్కా పవర్‌పాయింట్ ప్రజెంటేషన్‌తో సీఎం ఢిల్లీ గడ్డపై అడుగుపెట్టారు.

* రాజకీయ సమీకరణాలపై కూడా నజర్..

పాలనాపరమైన అంశాలతో పాటు, ఈ ఢిల్లీ పర్యటనలో రాజకీయ పరమైన చర్చలు కూడా జోరుగా సాగనున్నాయి. సీఎం రేవంత్ రెడ్డి ఏఐసీసీ (AICC) అగ్రనేతలు మల్లికార్జున ఖర్గే, రాహుల్ గాంధీలతో భేటీ అయ్యే అవకాశం ఉంది. రాష్ట్రంలో నామినేటెడ్ పదవుల భర్తీ, మంత్రివర్గ విస్తరణ మరియు భవిష్యత్తు రాజకీయ కార్యాచరణపై పార్టీ అధిష్ఠానంతో ఆయన సుదీర్ఘంగా చర్చించనున్నట్లు సమాచారం.
మొత్తానికి సీఎం రేవంత్ రెడ్డి ఢిల్లీ పర్యటన తెలంగాణ అభివృద్ధికి, రాబోయే కాలంలో కేంద్ర-రాష్ట్ర సత్సంబంధాలకు అత్యంత కీలకంగా మారనుంది.