* నీటి సంరక్షణకు ప్రాధాన్యం
* కలెక్టర్ కీలక ఆదేశాలు
ఆకేరు న్యూస్, పాలకుర్తి: ఫామ్ పాండ్ల (వ్యవసాయ కుంటల) నిర్మాణంలో ప్రభుత్వ నిబంధనలను తూచా తప్పకుండా పాటించాలని జిల్లా కలెక్టర్ సందీప్ కుమార్ ఝా అధికారులను ఆదేశించారు. వర్షపు నీటిని సంరక్షించి, వ్యవసాయ అవసరాలకు సద్వినియోగం చేసుకునేలా కుంటల నిర్మాణ పనులను వేగవంతం చేయాలని సూచించారు.
బుధవారం పాలకుర్తి మండలం అయ్యంగారిపల్లి గ్రామంలో ఉపాధి హామీ పథకం కింద చేపడుతున్న ఫామ్ పాండ్ల నిర్మాణ పనులను కలెక్టర్ క్షేత్రస్థాయిలో పరిశీలించారు. పనుల పురోగతి, నిర్మాణ నాణ్యత, ప్రభుత్వ మార్గదర్శకాల అమలుపై అధికారులను అడిగి తెలుసుకున్నారు.
కొలతల్లో రాజీ వద్దు
ప్రతి మండలంలో కనీసం ఐదు ఫామ్ పాండ్లను ఎంపిక చేసి, వాటి నిర్మాణ పనులను నిరంతరం పర్యవేక్షించాలని కలెక్టర్ ఆదేశించారు. కుంటల తవ్వకాల్లో నిర్దేశిత పొడవు, వెడల్పు, లోతు తప్పనిసరిగా పాటించాలని స్పష్టం చేశారు. పనుల నాణ్యత విషయంలో నిర్లక్ష్యం వహించవద్దని సిబ్బందికి సూచించారు.
కూలీల హాజరుపై నిఘా
ఉపాధి హామీ పనుల్లో కూలీలు పెద్ద సంఖ్యలో పాల్గొనేలా చర్యలు తీసుకోవాలని కలెక్టర్ తెలిపారు. రోజువారీ కూలీల హాజరు వివరాలు, హాజరు పట్టీలను తనిఖీ చేశారు. కూలీలకు సకాలంలో వేతనాలు అందేలా అవసరమైన చర్యలు చేపట్టాలని అధికారులను ఆదేశించారు.
ప్రత్యామ్నాయ పంటలపై అవగాహన
రైతులకు ప్రభుత్వ రాయితీ పథకాలపై అవగాహన కల్పించాలని కలెక్టర్ సూచించారు. వ్యవసాయ యాంత్రికీకరణ పథకం కింద అందించే సబ్సిడీ పరికరాల వివరాలను రైతులకు తెలియజేయాలన్నారు. ప్రస్తుత నీటి లభ్యతను దృష్టిలో ఉంచుకుని తక్కువ నీటితో అధిక దిగుబడినిచ్చే ప్రత్యామ్నాయ పంటల సాగు వైపు రైతులను ప్రోత్సహించాలని అధికారులకు దిశానిర్దేశం చేశారు.
ఈ పరిశీలనలో డీఆర్డీఓ భాస్కర్, ఎంపీడీఓ వేదవతి, వివిధ శాఖల అధికారులు, ఇంజనీరింగ్ సిబ్బంది పాల్గొన్నారు.
About the Author
Please tell us what is wrong. Your report will be sent to the website team.
