GADDAR'S DAUGHTER VENNELA | జనసేనానికి స్ట్రాంగ్ వార్నింగ్

* నటుడిగా అభిమానిస్తాం.. కానీ తెలంగాణను తక్కువ చేస్తే ఊరుకోం…

ఆకేరు న్యూస్, హైదరాబాద్: జనసేన అధినేత, ఆంధ్రప్రదేశ్ ఉపముఖ్యమంత్రి పవన్ కళ్యాణ్ తెలంగాణపై చేసిన వ్యాఖ్యలు ఇప్పుడు పొలిటికల్ సర్కిల్స్‌లో పెను దుమారం రేపుతున్నాయి. పవన్ వ్యాఖ్యలపై ప్రజా గాయకుడు, దివంగత గద్దర్ కుమార్తె జి.వి. వెన్నెల తీవ్రస్థాయిలో మండిపడ్డారు. తెలంగాణ ఉద్యమ చరిత్రను, ఇక్కడి ప్రజల ఆత్మగౌరవాన్ని కించపరిచేలా మాట్లాడటం సరికాదని ఆమె హితవు పలికారు.

* తెలంగాణ మా బిడ్డల జాగీరు..!

తెలంగాణ గడ్డపై ఇక్కడి ప్రజలకున్న హక్కును, భావోద్వేగాలను వెన్నెల చాలా బలంగా వినిపించారు.
“తెలంగాణ గడ్డ నిన్న మా అయ్యల జాగీరు.. ఈరోజు మా జాగీరు.. రేపు మా బిడ్డల జాగీరు! ఈ నేల ఇక్కడి ప్రజల సొత్తు. దీనిపై మాట్లాడే పూర్తి హక్కు, అధికారం ఇక్కడి ప్రతి బిడ్డకూ ఉంది” అని ఆమె స్పష్టం చేశారు.

* డబ్బులు పంచితేనో.. లాబీయింగ్ చేస్తేనో రాలేదు!

తెలంగాణ రాష్ట్ర ఏర్పాటు వెనుక ఉన్న దశాబ్దాల పోరాటాన్ని గుర్తు చేస్తూ పవన్ కళ్యాణ్‌కు ఆమె ఘాటు కౌంటర్ ఇచ్చారు. తెలంగాణ అనేది ఎవరో ఇస్తేనో, ఢిల్లీ స్థాయిలో లాబీయింగ్ రాజకీయాలు చేస్తేనో, లేదా ఎన్నికల్లో డబ్బులు ఖర్చు పెట్టి పైసలు పంచితేనో వచ్చిన రాష్ట్రం కాదని ఆగ్రహం వ్యక్తం చేశారు. తెలంగాణ ఉద్యమం అనేది కోట్లాది మంది ప్రజల గుండె చప్పుడు.. అదొక పవిత్రమైన ఆత్మగౌరవ పోరాటమని వెన్నెల గుర్తు చేశారు.

* ఎన్నో త్యాగాలు.. ఎందరో అమరులు

ప్రత్యేక రాష్ట్రం కోసం తెలంగాణ సమాజం అనుభవించిన నరకాన్ని, చేసిన ప్రాణ త్యాగాలను ఆమె ఈ సందర్భంగా ఏకరువు పెట్టారు
అమరుల ఎన్‌కౌంటర్లు: కేవలం “తెలంగాణ” అనే పదం పలికినందుకే గతంలో ఎంతో మంది ఉద్యమకారులను, యువకులను ప్రభుత్వాలు అన్యాయంగా ఎన్‌కౌంటర్ చేశాయని వెన్నెల ఆవేదన వ్యక్తం చేశారు.

తల్లుల కడుపు కోత: మలిదశ ఉద్యమంలో వందలాది మంది విద్యార్థులు, యువకులు ప్రాణ త్యాగాలు చేశారని.. ఎంతో మంది తల్లులు తమ కడుపు కోతను భరించి బిడ్డలను కోల్పోయారని గుర్తు చేశారు.

సహనంతో కూడిన పోరాటం: ఉద్యమ సమయంలో తెలంగాణ ప్రజలు ఎన్నో అవమానాలను భరించారని, ప్రాణాలు సైతం లెక్కచేయకుండా పోరాడారే తప్ప.. ఎన్నడూ ఎవరినీ ఒక్క మాట కూడా అనలేదని, అంతటి క్రమశిక్షణ, సహనంతో కూడిన పోరాటం ఇదని ఆమె వివరించారు.

* నటుడిగా గౌరవిస్తాం కానీ…

పవన్ కళ్యాణ్‌పై తమకున్న వ్యక్తిగత అభిమానాన్ని ప్రస్తావిస్తూనే, ఆయన రాజకీయ వ్యాఖ్యలను తప్పుబట్టారు. ఒక నటుడిగా, అలాగే గద్దర్ అభిమానిగా పవన్ కళ్యాణ్‌ను తాము ఎప్పుడూ అభిమానిస్తామని.. అయితే ఆ అభిమానం వేరు, తెలంగాణ ఆత్మగౌరవం వేరని స్పష్టం చేశారు. సినిమా రంగానికి, రాజకీయ రంగానికి ఉన్న వ్యత్యాసాన్ని గ్రహించి, తెలంగాణ చరిత్రను తక్కువ చేసి మాట్లాడటం మానుకోవాలని వెన్నెల హితవు పలికారు.

ప్రస్తుతం వెన్నెల చేసిన ఈ వ్యాఖ్యలు సోషల్ మీడియాలో విపరీతంగా వైరల్ అవుతున్నాయి. తెలంగాణ ఉద్యమకారులు, నెటిజన్లు ఆమెకు పెద్ద ఎత్తున మద్దతు తెలుపుతున్నారు.