Hyderabad
Hyderabad| ఆకేరు న్యూస్, హైదరాబాద్‌: పెళ్లి వేడుక.. సందడి.. అతిథుల హడావుడి.. ఇంతలోనే గాల్లోకి తుపాకీ కాల్పులు. హైదరాబాద్‌ పాతబస్తీలోని బర్కాస్‌ ప్రాంతంలో జరిగిన ఈ ఘటన ఆలస్యంగా వెలుగులోకి వచ్చింది. వివాహ వేడుకలో లైసెన్స్‌డ్‌ రివాల్వర్‌తో మూడు రౌండ్లు గాల్లోకి కాల్పులు జరిపినట్లు పోలీసులు గుర్తించారు. ఇందుకు సంబంధించిన వీడియో సోషల్ మీడియాలో వైరల్ కావడంతో పోలీసులు దర్యాప్తు చేపట్టారు.
వీడియోతో మొదలైన దర్యాప్తు
పోలీసుల వివరాల ప్రకారం.. 2025 ఆగస్టులో బర్కాస్‌లో ఓ వ్యాపారవేత్త కుటుంబానికి చెందిన వివాహ వేడుక జరిగింది. ఈ కార్యక్రమంలో అమీర్‌ బిన్‌ సయీద్‌ (41) రివాల్వర్‌తో గాల్లోకి మూడు రౌండ్లు కాల్పులు జరిపినట్లు పోలీసులు తెలిపారు. అక్కడున్న వారు ఈ దృశ్యాలను వీడియోగా చిత్రీకరించగా.. అనంతరం అవి సోషల్ మీడియాలో వైరల్‌గా మారాయి.
వీడియో పోలీసుల దృష్టికి రావడంతో దర్యాప్తు ప్రారంభమైంది. అందులో కనిపించిన వ్యక్తిని గుర్తించే క్రమంలో పోలీసులు అమీర్‌ బిన్‌ సయీద్‌ను గుర్తించినట్లు వెల్లడించారు.
రివాల్వర్ ఎవరిది?
పోలీసులు అమీర్‌ నివాసానికి వెళ్లి విచారించగా.. కాల్పులకు ఉపయోగించిన రివాల్వర్ తనది కాదని, తన కజిన్‌ వలీద్‌ హుస్సేన్‌కు చెందిన లైసెన్స్‌డ్‌ ఆయుధమని తెలిపినట్లు అధికారులు పేర్కొన్నారు. దీంతో ఆయుధం యాజమాన్యంతో పాటు దాన్ని మరో వ్యక్తి వినియోగించిన అంశంపైనా పోలీసులు దర్యాప్తు చేశారు. రివాల్వర్‌ను స్వాధీనం చేసుకున్నట్లు తెలిపారు.
ఇద్దరిపై కేసు
ఈ ఘటనకు సంబంధించి అమీర్‌ బిన్‌ సయీద్‌, రివాల్వర్ యజమాని వలీద్‌ హుస్సేన్‌పై ఆర్మ్స్‌ యాక్ట్‌ కింద కేసు నమోదు చేసినట్లు పోలీసులు వెల్లడించారు. లైసెన్స్‌ ఉన్న ఆయుధమైనప్పటికీ వివాహ వేడుకలో గాల్లోకి కాల్పులు జరపడం చట్టపరమైన సమస్యలకు దారితీసినట్లు పోలీసులు తెలిపారు.
వేడుకల్లో ఫైరింగ్‌పై హెచ్చరిక
వివాహ వేడుకల్లో ఆయుధాలతో గాల్లోకి కాల్పులు జరపడం ప్రమాదకరమని పోలీసులు స్పష్టం చేస్తున్నారు. లైసెన్స్‌ ఉన్న ఆయుధాన్ని కలిగి ఉండటం వేరు.. దాన్ని బహిరంగంగా కాల్పులకు ఉపయోగించడం వేరు అనే అంశాన్ని ఈ ఘటన మరోసారి తెరపైకి తెచ్చింది. సోషల్ మీడియాలో వైరల్ అయిన వీడియో ఆధారంగా పాత ఘటనపై కూడా పోలీసులు చర్యలు తీసుకోవడం గమనార్హం.
About the Author
Please tell us what is wrong. Your report will be sent to the website team.
