India vs England ODI
* రోహిత్-కోహ్లీ రీఎంట్రీ.. ప్రతీకార పోరుకు సిద్ధమైన గిల్ సేన
ఆకేరు న్యూస్, డెస్క్:
టీ20 సిరీస్లో ఎదురైన ఘోర పరాజయాన్ని వెనక్కి నెట్టి, కొత్త ఆరంభానికి సిద్ధమైంది టీమిండియా. భారత్-ఇంగ్లాండ్ మధ్య మూడు వన్డేల సిరీస్లో తొలి మ్యాచ్ నేడు (జూలై 14) బర్మింగ్హామ్లోని ఎడ్జ్బాస్టన్ స్టేడియంలో జరగనుంది. భారత కాలమానం ప్రకారం మధ్యాహ్నం 3:30 గంటలకు మ్యాచ్ ప్రారంభం కానుండగా, టాస్ 3 గంటలకు పడనుంది.
* రోహిత్-కోహ్లీ రీఎంట్రీ..
టీ20 సిరీస్కు దూరంగా ఉన్న సీనియర్ ఆటగాళ్లు రోహిత్ శర్మ, విరాట్ కోహ్లీ, కేఎల్ రాహుల్ మళ్లీ జట్టులో చేరడంతో భారత బ్యాటింగ్ మరింత పటిష్టంగా మారింది. కెప్టెన్ శుభ్మన్ గిల్ నాయకత్వంలో భారత్ ఈ సిరీస్ను విజయంతో ప్రారంభించాలని లక్ష్యంగా పెట్టుకుంది.
మిడిలార్డర్లో శ్రేయస్ అయ్యర్, ఇషాన్ కిషన్, అక్షర్ పటేల్ కీలక బాధ్యతలు నిర్వర్తించనుండగా, వాషింగ్టన్ సుందర్, నితీష్ కుమార్ రెడ్డి ఆల్రౌండర్లుగా జట్టుకు బలం చేకూర్చనున్నారు.
* బుమ్రాపైనే బౌలింగ్ ఆశలు
భారత పేస్ దళానికి జస్ప్రీత్ బుమ్రా నాయకత్వం వహించనున్నాడు. అతడికి తోడుగా అర్ష్దీప్ సింగ్,హర్షిత్ రాణా, ప్రసిద్ధ్ కృష్ణ, ప్రిన్స్ యాదవ్, గుర్నూర్ బ్రార్ బరిలోకి దిగే అవకాశముంది. స్పిన్ బాధ్యతలను కుల్దీప్ యాదవ్, అక్షర్ పటేల్ నిర్వహించనున్నారు.
* ఫుల్ కాన్ఫిడెన్స్లో ఇంగ్లాండ్
టీ20 సిరీస్ను 4-0తో కైవసం చేసుకున్న ఇంగ్లాండ్ పూర్తి ఆత్మవిశ్వాసంతో వన్డే సిరీస్లో అడుగుపెడుతోంది. కెప్టెన్ హ్యారీ బ్రూక్, జోస్ బట్లర్, జో రూట్ వంటి స్టార్ బ్యాటర్లు మరోసారి జట్టుకు ప్రధాన బలంగా నిలవనున్నారు. బౌలింగ్లో జోఫ్రా ఆర్చర్, గస్ అట్కిన్సన్ భారత బ్యాటర్లకు గట్టి పరీక్షగా మారే అవకాశముంది.
* వన్డేల్లో భారత్కే పైచేయి
ఇప్పటివరకు ఇరు జట్ల మధ్య 110 వన్డేలు జరగగా, భారత్ 61 మ్యాచ్ల్లో విజయం సాధించింది. ఇంగ్లాండ్ 44 మ్యాచ్లు గెలిచింది. రెండు మ్యాచ్లు టై కాగా, మూడు మ్యాచ్లకు ఫలితం రాలేదు. అయితే ఇంగ్లాండ్ గడ్డపై భారత్కు రికార్డు అంత అనుకూలంగా లేకపోయినా, ఈసారి అనుభవజ్ఞులైన ఆటగాళ్ల రాకతో పరిస్థితి మారుతుందనే ఆశలు అభిమానుల్లో ఉన్నాయి.
టీ20 సిరీస్లో ఎదురైన నిరాశను మరచి, వన్డేల్లో సత్తా చాటాలని టీమిండియా పట్టుదలగా ఉంది. మరోవైపు సొంతగడ్డపై విజయపరంపర కొనసాగించాలని ఇంగ్లాండ్ చూస్తోంది. ఇరు జట్ల బలాబలాలు సమానంగా ఉండటంతో ఎడ్జ్బాస్టన్లో అభిమానులకు హోరాహోరీ పోరు ఖాయంగా కనిపిస్తోంది.
About the Author
