రామ్ చరణ్, నాగార్జున
* చిత్రంపై పూర్తి నమ్మకం ఉంది: నాగార్జున
* నవంబర్ 13న ప్రపంచవ్యాప్తంగా విడుదల
ఆకేరు న్యూస్, సినిమా: యువ హీరో అనీష్ నటిస్తున్న తొలి చిత్రం ‘ఇట్లు అర్జున’కు టాలీవుడ్ ప్రముఖుల నుంచి ప్రశంసలు వెల్లువెత్తుతున్నాయి. ముఖ్యంగా మెగాపవర్ స్టార్ రామ్ చరణ్ ఈ సినిమాపై ఆసక్తికర వ్యాఖ్యలు చేశారు. తన కెరీర్‌లో భారీ విజయాన్ని అందించిన ‘రంగస్థలం’ కంటే పెద్ద హిట్‌ను ‘ఇట్లు అర్జున’తో అనీష్ అందుకోవాలని ఆకాంక్షించారు. మరోవైపు కింగ్ నాగార్జున సైతం అనీష్ నటనపై ప్రశంసలు కురిపించారు. సినిమా చూసి తాను ఆశ్చర్యపోయానని, చిత్రబృందం ఎంతో కాన్ఫిడెంట్‌గా ఉందని తెలిపారు.
కింగ్ నాగార్జున సమర్పణలో రూపొందిన ఈ చిత్రంలో అనీష్ హీరోగా, అనస్వర రాజన్ హీరోయిన్‌గా నటిస్తున్నారు. మహేష్ ఉప్పల దర్శకుడిగా పరిచయం అవుతున్నారు. దర్శకుడు వెంకీ కుడుముల నిర్మాతగా వాట్ నెక్స్ట్ ఎంటర్‌టైన్‌మెంట్స్ బ్యానర్‌పై ఈ చిత్రాన్ని నిర్మిస్తున్నారు. ఎస్. తమన్ సంగీతం అందించారు. నవంబర్ 13న ప్రపంచవ్యాప్తంగా విడుదల కానున్న ఈ సినిమా ప్రమోషన్స్‌లో భాగంగా నిర్వహించిన మ్యూజికల్ కాన్సర్ట్‌కు రామ్ చరణ్, నాగార్జున, అఖిల్ అక్కినేని ముఖ్య అతిథులుగా హాజరయ్యారు.
అనీష్‌కు మంచి భవిష్యత్తు: రామ్ చరణ్
ఈ వేడుకలో రామ్ చరణ్ మాట్లాడుతూ.. అనీష్‌కు సినిమాపై ఎంతో ప్రేమ ఉందని, తొలి చిత్రంలోనే అద్భుతమైన నటన కనబరిచాడని ప్రశంసించారు. మాటలు మాట్లాడలేని పాత్రలో నటిస్తూ తన భావాలను హావభావాలతో పలికించడం గొప్ప విషయమన్నారు. కొన్ని సన్నివేశాలు చూసి ఆశ్చర్యపోయానని, తనకంటే పది రెట్లు మెరుగ్గా నటించాడని కొనియాడారు.
తాను ‘రంగస్థలం’ సినిమాలో చెవిటివాడి పాత్ర పోషించానని గుర్తుచేసుకున్న చరణ్.. ఆ సినిమా సాధించిన విజయాన్ని మించి ‘ఇట్లు అర్జున’ విజయం సాధించాలని కోరుకున్నారు. అనీష్‌కు చిత్ర పరిశ్రమలో మంచి భవిష్యత్తు ఉందని ఆకాంక్షించారు.
అనీష్ నటన చూసి ఆశ్చర్యపోయా: నాగార్జున
నాగార్జున మాట్లాడుతూ.. అనీష్ తొలిసారిగా సినిమా గ్లింప్స్ తీసుకొచ్చినప్పుడు, మొదటి సినిమాకే ఇంత ఛాలెంజింగ్ పాత్ర ఎందుకు ఎంచుకున్నావని అడిగానన్నారు. అయితే కథపై అనీష్‌కు ఉన్న నమ్మకం తనను ఆకట్టుకుందని తెలిపారు. సినిమా చూసిన తర్వాత అనీష్ నటనకు ఆశ్చర్యపోయానని, కళ్లతోనే భావాలను అద్భుతంగా పలికించాడని ప్రశంసించారు.
అనస్వర రాజన్‌తో అనీష్ కెమిస్ట్రీ కూడా బాగుందని పేర్కొన్నారు. సినిమా విషయంలో తాము ఎంతో నమ్మకంగా ఉన్నామని, ప్రేక్షకుల ఆశీస్సులు కావాలని కోరారు. ఈ కార్యక్రమానికి విచ్చేసిన రామ్ చరణ్‌కు, సినిమా ట్రైలర్‌ను విడుదల చేసిన ఎన్టీఆర్‌కు ప్రత్యేక కృతజ్ఞతలు తెలిపారు.
ఇది మంచి కమర్షియల్ సినిమా: అఖిల్
అఖిల్ అక్కినేని మాట్లాడుతూ.. మాటలు లేకుండా హీరోతో సినిమా చేయాలనే ఆలోచన కొత్తగా అనిపించిందన్నారు. సినిమా చూసిన తర్వాత అనీష్ నటనకు ముగ్ధుడయ్యానని తెలిపారు. దర్శకుడు మహేష్ కొత్త కథను చక్కగా తెరకెక్కించారని ప్రశంసించారు. ఇది మంచి కమర్షియల్ సినిమా అని, తమన్ పాటలు, నేపథ్య సంగీతం ప్రేక్షకులను ఆకట్టుకుంటాయని అన్నారు.
‘అర్జున్ ప్రేమ మీకు వినిపిస్తుంది’: అనీష్
హీరో అనీష్ మాట్లాడుతూ.. తనపై నమ్మకం ఉంచి అవకాశం ఇచ్చిన నాగార్జున, వెంకీ కుడుముల, దర్శకుడు మహేష్ ఉప్పలకు కృతజ్ఞతలు తెలిపారు. రామ్ చరణ్ తనకు నటుడిగా ఎంతో స్ఫూర్తినిస్తారని చెప్పారు. తొలి సినిమా కోసం ఎంతో కష్టపడ్డానని, ఆ కష్టాన్ని నవంబర్ 13న ప్రేక్షకులు తెరపై చూస్తారని అన్నారు. “అర్జున్ మాట్లాడలేకపోవచ్చు.. కానీ తన ప్రేమ మీ అందరికీ వినిపిస్తుంది” అంటూ సినిమా ప్రత్యేకతను వివరించారు.
రిస్క్ తీసుకుని చేసిన ప్రయత్నం: వెంకీ కుడుముల
నిర్మాత వెంకీ కుడుముల మాట్లాడుతూ.. హీరోకు మాటలు లేకుండా సినిమా చేయాలనే ఆలోచనను చాలామంది రిస్క్‌గా భావించారని తెలిపారు. అయితే అనీష్ తన నటన, హావభావాలు, బాడీ లాంగ్వేజ్‌తో ప్రేక్షకులను మెప్పించగలననే నమ్మకంతో ఈ ప్రయోగానికి సిద్ధమయ్యాడన్నారు. దర్శకుడు మహేష్ మంచి కథను సిద్ధం చేశారని, తమన్ సంగీతం సినిమాకు ప్రత్యేక ఆకర్షణగా నిలుస్తుందని చెప్పారు.
హీరోయిన్ అనస్వర రాజన్, సంగీత దర్శకుడు తమన్ కూడా చిత్ర విశేషాలను పంచుకున్నారు. అర్జున్ పాత్రకు అనీష్ పూర్తి న్యాయం చేశాడని అనస్వర ప్రశంసించగా, ఈ సినిమాకు సంగీతపరంగా ప్రత్యేక శ్రద్ధ తీసుకున్నానని తమన్ తెలిపారు. దర్శకుడు మహేష్ సైతం అనీష్ నటనపై ప్రశంసలు కురిపించారు.
ఈ కార్యక్రమంలో నిర్మాత రవిశంకర్, TFDC చైర్మన్ దిల్ రాజు, సినిమాటోగ్రాఫర్ రాజా తదితరులు పాల్గొని చిత్రబృందానికి శుభాకాంక్షలు తెలిపారు. మాటలు లేని ప్రధాన పాత్రతో తెరకెక్కిన ‘ఇట్లు అర్జున’ నవంబర్ 13న థియేటర్లలోకి రానుంది. రామ్ చరణ్, నాగార్జున ప్రశంసలతో ఈ సినిమాపై ప్రేక్షకుల్లో ఆసక్తి మరింత పెరిగింది.
About the Author
Please tell us what is wrong. Your report will be sent to the website team.
