Mobile EMI Torture | మొబైల్ ఈఎంఐ కోసం ఇంత దారుణమా..?

Published: 18 Sep 2026 • 10:13 AM

* బంధించి చిత్రహింసలు.. చివరకు రక్తం విక్రయం!
* తల్లి ఫిర్యాదుతో వెలుగులోకి వచ్చిన దారుణం
* లక్నోలో దిగ్భ్రాంతికర ఘటన

ఆకేరు న్యూస్, హైదరాబాద్ నెట్ వర్క్: ఉత్తరప్రదేశ్ రాజధాని లక్నోలో అత్యంత అమానుషమైన ఘటన వెలుగులోకి వచ్చింది. కేవలం ఒక మొబైల్ ఫోన్ ఈఎంఐ (EMI) సకాలంలో చెల్లించలేదనే చిన్న కారణంతో, ఒక యువకుడిని వారం రోజుల పాటు నిర్బంధించి, తీవ్రంగా హింసించి, చివరికి అతని రక్తాన్ని బలవంతంగా వేరే వారికి విక్రయించిన ఘటన తీవ్ర సంచలనం సృష్టించింది.

*సంఘటన పూర్తి వివరాలు..

పోలీసులు తెలిపిన వివరాల ప్రకారం, బాధితుడైన నవ్‌కుమార్ (27) ఫైనాన్స్ పద్ధతిలో ఒక మొబైల్ ఫోన్‌ను కొనుగోలు చేశాడు. అయితే ఊహించని ఆర్థిక ఇబ్బందుల కారణంగా అతను గత నెల 8వ తేదీన చెల్లించవలసిన రూ. 2,799 వాయిదా మొత్తాన్ని కట్టలేకపోయాడు.

ఈ విషయం తెలుసుకున్న నిందితులు అనికేత్ సింగ్ అలియాస్ కాకా (26), సుశాంత్ శర్మ (31) మరియు శుభం సింగ్ బాధితుడిని సంప్రదించి, వాయిదా డబ్బు చెల్లించాలని మొబైల్ షాపు వద్దకు రమ్మని పిలిపించుకున్నారు.

*వారం రోజులపాటు నరకం..

అక్కడి నుండి నిందితులు నవ్‌కుమార్‌ను నేరుగా శుభం సింగ్ ఇంటికి తీసుకెళ్లి గదిలో బందీగా ఉంచారు. వారం రోజుల పాటు అతడిని అత్యంత పాశవికంగా హింసించారు. ఈ క్రమంలో బాధితుడు తన ఫోన్ నంబర్‌ను వేరే వ్యక్తికి ఉపయోగించుకోవడానికి ఇవ్వడంతో నిందితులు మరింత ఆగ్రహానికి గురయ్యారు.

ఈఎంఐ చెల్లించనందుకు గుణపాఠం నేర్పాలన్న దురుద్దేశంతో, నిందితులు అతడిని బలవంతంగా ఒక బ్లడ్ బ్యాంక్‌కు తరలించి, రక్తాన్ని డ్రా చేసి విక్రయించారు. అంతేకాకుండా, ఆ రక్తం అమ్మగా వచ్చిన డబ్బును కూడా వారే నొక్కుకున్నారు. వాయిదా డబ్బులను కూడా బాధితుడి నుంచే బలవంతంగా వసూలు చేశారు.

*పోలీసుల దర్యాప్తు..

ఎట్టకేలకు నిందితుల చెర నుంచి తప్పించుకున్న బాధితుడు పోలీసులను ఆశ్రయించడంతో ఈ దారుణం బయటపడింది. బాధితుడి తల్లి ఇచ్చిన ఫిర్యాదు మేరకు పోలీసులు కేసు నమోదు చేసి వేగంగా దర్యాప్తు చేపట్టారు. ప్రధాన నిందితులు అనికేత్ సింగ్ అలియాస్ కాకా, సుశాంత్ శర్మలను పోలీసులు అరెస్టు చేశారు. పరారీలో ఉన్న ప్రధాన సూత్రధారి శుభం సింగ్ కోసం గాలింపు చర్యలు ముమ్మరం చేశారు.

నిందితులకు సహకరించి బలవంతంగా రక్తం విక్రయించిన బ్లడ్ బ్యాంక్ అధికారుల పాత్రపై కూడా లోతైన విచారణ జరుపుతున్నారు. నిందితులపై కిడ్నాప్, తీవ్రమైన హింస, చట్ట విరుద్ధమైన వైద్య విధానాలు, బెదిరింపులకు పాల్పడిన వివిధ సెక్షన్ల కింద కేసులు నమోదు చేసినట్లు పోలీసులు తెలిపారు. ఈ అమానుష ఘటన ఆర్థిక సంస్థల వేధింపులు మరియు వ్యక్తుల ప్రాథమిక హక్కుల దుర్వినియోగంపై సమాజంలో తీవ్ర ఆందోళన కలిగిస్తోంది.