Nurse Acid Attack
* కత్తి, కొడవలితో దాడి.. ఆపై యాసిడ్ పోసిన భర్త
* ట్రాఫిక్ పోలీసుల చొరవతో నిందితుడి అరెస్ట్
ఆకేరు న్యూస్, డెస్క్: కర్ణాటక రాజధాని బెంగళూరులో దారుణ ఘటన చోటుచేసుకుంది. కుటుంబ కలహాల నేపథ్యంలో ఓ భర్త తన భార్యపై కత్తి, కొడవలితో దాడి చేసి అనంతరం యాసిడ్ పోశాడు. బాధితురాలి కేకలు విన్న క్లినిక్ సిబ్బంది, స్థానికులు ఆమెను రక్షించేందుకు ప్రయత్నించగా.. నిందితుడు వారిపై కూడా దాడికి యత్నించినట్లు పోలీసులు తెలిపారు. సమీపంలో విధులు నిర్వహిస్తున్న ట్రాఫిక్ పోలీసులు వెంటనే స్పందించి నిందితుడిని అదుపులోకి తీసుకున్నారు.
* ఘటన వివరాల్లోకి వెళితే..
కోల్కతాకు చెందిన 26 ఏళ్ల యువతి బెంగళూరులోని జేపీ నగర్ 3వ దశలో ఓ ప్రైవేట్ క్లినిక్లో గత ఏడాదిన్నరగా నర్సుగా పనిచేస్తోంది. తమిళనాడుకు చెందిన వెంకటేషన్తో ఆమెకు వివాహమైంది. కొంతకాలంగా భార్యాభర్తల మధ్య మనస్పర్థలు, కుటుంబ వివాదాలు ఉన్నట్లు ప్రాథమిక దర్యాప్తులో వెల్లడైంది.
గురువారం ఉదయం సుమారు 9.15 గంటలకు బాధితురాలు అల్పాహారం కోసం క్లినిక్ నుంచి బయటకు వచ్చింది. అప్పటికే ఆమెను వెంబడిస్తూ వచ్చిన భర్త వెంకటేషన్ క్లినిక్ ఉన్న భవనం పార్కింగ్ ప్రాంతానికి చేరుకున్నాడు. తన ద్విచక్ర వాహనంపై కత్తి, కొడవలి, యాసిడ్ తీసుకొచ్చినట్లు పోలీసులు గుర్తించారు.
* కత్తితో అడ్డుకున్న వారిపై దాడికి యత్నం
పార్కింగ్ ప్రాంతంలో బాధితురాలిపై కొడవలితో దాడి చేసిన వెంకటేషన్.. అనంతరం ఆమెపై యాసిడ్ పోశాడు. తీవ్రంగా గాయపడిన ఆమె కేకలు వేస్తూ అక్కడి నుంచి పరుగులు తీసింది. ఆమె అరుపులు విన్న క్లినిక్ సిబ్బంది, స్థానికులు వెంటనే అక్కడికి చేరుకుని నిందితుడిని అడ్డుకునేందుకు ప్రయత్నించారు. ఈ సమయంలో వారిపై కూడా కత్తితో దాడి చేసేందుకు నిందితుడు ప్రయత్నించినట్లు పోలీసులు తెలిపారు.
* ట్రాఫిక్ పోలీసుల చొరవ
ఘటన జరిగిన సమయంలో సమీపంలోని ట్రాఫిక్ సిగ్నల్ వద్ద విధులు నిర్వహిస్తున్న పోలీసులు పరిస్థితిని గమనించారు. వెంటనే అక్కడికి చేరుకుని పారిపోవడానికి ప్రయత్నిస్తున్న వెంకటేషన్ను పట్టుకుని అదుపులోకి తీసుకున్నారు. తీవ్రంగా గాయపడిన బాధితురాలిని స్థానికులు సమీపంలోని ప్రైవేట్ ఆసుపత్రికి తరలించారు. ప్రస్తుతం ఆమెకు చికిత్స అందుతున్నట్లు సమాచారం.
* దర్యాప్తు చేస్తున్న పోలీసులు
సమాచారం అందుకున్న జేపీ నగర్ పోలీసులు ఘటనా స్థలాన్ని పరిశీలించి కేసు నమోదు చేసి దర్యాప్తు చేపట్టారు. భార్యపై దాడికి పాల్పడటానికి గల పూర్తి కారణాలు, ఘటనకు ముందు జరిగిన పరిణామాలపై పోలీసులు విచారణ చేస్తున్నారు. ఈ కేసుకు సంబంధించి మరిన్ని వివరాలు దర్యాప్తులో వెల్లడికావాల్సి ఉంది.
About the Author
Please tell us what is wrong. Your report will be sent to the website team.
