Minister Ponnam Prabhakar | సర్వాయి పేట రూపురేఖలు మార్చుతాం

Published: 25 Aug 2026 • 09:54 PM

* రూ. 4.5 కోట్లతో పాపన్న టూరిజం ప్రాజెక్ట్

ఆకేరు న్యూస్, సైదాపూర్:
కరీంనగర్ జిల్లా సైదాపూర్ మండలం సర్వాయి పేట గ్రామంలో నిర్వహించిన ‘పల్లె పల్లెకు పొన్నం అన్న – పల్లె పల్లెలో ప్రజాపాలన’ కార్యక్రమంలో రవాణా, బీసీ సంక్షేమ శాఖ మంత్రి పొన్నం ప్రభాకర్ పాల్గొని విస్తృతంగా పర్యటించారు.

* డాక్టర్ బి.ఆర్. అంబేద్కర్ విగ్రహావిష్కరణ & ప్రారంభోత్సవాలు

గ్రామంలో నూతనంగా ఏర్పాటు చేసిన డాక్టర్ బి.ఆర్. అంబేద్కర్ విగ్రహాన్ని మంత్రి ఆవిష్కరించి పూలమాలలు వేసి నివాళులర్పించారు. అనంతరం ప్రత్యేక పశువైద్య శిబిరాన్ని ప్రారంభించి పశువులకు మందులు అందజేశారు. అలాగే లబ్ధిదారు రత్నాల జ్యోతికి చెందిన నూతన ఇందిరమ్మ ఇంటిని ప్రారంభించారు.

* సంక్షేమ పథకాలు & అభివృద్ధి సమీక్ష

గ్రామంలో సంక్షేమ పథకాల అమలుపై నిర్వహించిన సమీక్షలో మంత్రి మాట్లాడుతూ.. గ్రామంలో 8 ఇందిరమ్మ ఇళ్లు పూర్తయ్యాయని, రెండవ విడతలో మరిన్ని మంజూరు చేస్తామని తెలిపారు. గృహజ్యోతి కింద 39 కుటుంబాలకు ఉచిత విద్యుత్, మహాలక్ష్మి పథకం ద్వారా 189 కుటుంబాలకు గ్యాస్ సబ్సిడీ అందించినట్లు వివరించారు. అలాగే 274 మంది రైతులకు రూ. 21.85 కోట్ల రుణమాఫీ, 530 మందికి రూ. 2.11 కోట్ల రైతు భరోసా, 49 కొత్త రేషన్ కార్డుల పంపిణీ జరిగిందని, గ్రామంలో రోడ్లు, మౌలిక వసతుల కోసం కోట్ల రూపాయల నిధులు కేటాయించామని చెప్పారు.

* రూ. 4.5 కోట్లతో సర్వాయి పాపన్న టూరిజం ప్రాజెక్ట్

సర్దార్ సర్వాయి పాపన్న గౌడ్ చారిత్రక నేపథ్యాన్ని చాటిచెప్పేలా సర్వాయి పేటను రూ. 4.5 కోట్లతో టూరిజం ప్రాజెక్టుగా అభివృద్ధి చేస్తున్నట్లు మంత్రి ప్రకటించారు. కోట మరమ్మతులు పూర్తి చేసి, త్వరలోనే ముఖ్యమంత్రి రేవంత్ రెడ్డి చేతుల మీదుగా ఈ ప్రాజెక్టును ప్రారంభిస్తామన్నారు. సర్పంచ్ కోరిన సమస్యలను ప్రాధాన్యత క్రమంలో పరిష్కరిస్తామని హామీ ఇచ్చారు.

* పర్యావరణ పరిరక్షణ & జల సంరక్షణ

ప్రతి ఒక్కరూ కనీసం ఒక మొక్క నాటి కుటుంబ సభ్యుడిలా సంరక్షించాలని మంత్రి పిలుపునిచ్చారు. భూగర్భ జలాలు పెంచేందుకు ఇంటింటా ఇంకుడు గుంతలు నిర్మించుకోవాలని, ఆరుతడి పంటల సాగును ప్రోత్సహించాలని రైతులకు సూచించారు.

* రోడ్డు భద్రత – ‘జీరో డెత్’ లక్ష్యం

విద్యార్థులకు రోడ్డు భద్రతపై అవగాహన కల్పిస్తూ, రాష్ట్రంలో రోడ్డు ప్రమాదాలను నివారించి ‘జీరో డెత్’ సాధించడమే ప్రభుత్వ లక్ష్యమని మంత్రి తెలిపారు. ప్రమాద బాధితులను కాపాడిన వారికి ‘రహవీర్ అవార్డు’ కింద రూ. 25,000 ప్రోత్సాహకం అందిస్తున్నట్లు పేర్కొన్నారు.
ఈ కార్యక్రమంలో స్థానిక ప్రజాప్రతినిధులు, వివిధ శాఖల అధికారులు, గ్రామ ప్రజలు పెద్ద సంఖ్యలో పాల్గొన్నారు.