MLA Naini Rajender | పేద విద్యార్థులకు కార్పొరేట్ స్థాయి విద్యే ధ్యేయం

Published: 18 Aug 2026 • 04:13 PM

* హనుమకొండ DIET ప్రాంగణంలో సమగ్ర పాఠశాల స్థలాన్ని పరిశీలించిన ఎమ్మెల్యే నాయిని

ఆకేరు న్యూస్, హన్మకొండ : పేద, బడుగు, బలహీన వర్గాలకు చెందిన విద్యార్థులకు అంతర్జాతీయ ప్రమాణాలతో కూడిన ఉన్నత విద్యా సదుపాయాలు అందించడమే లక్ష్యంగా తెలంగాణ ప్రభుత్వం ప్రతిష్టాత్మకంగా ముందుకుసాగుతోంది. ఇందులో భాగంగా వరంగల్ పశ్చిమ నియోజకవర్గ పరిధిలో నిర్మించతలపెట్టిన “ఇంటిగ్రేటెడ్ సమగ్ర పాఠశాల” స్థల పరిశీలన కార్యక్రమాన్ని మంగళవారం స్థానిక శాసనసభ్యులు నాయిని రాజేందర్ రెడ్డి చేపట్టారు. హనుమకొండలోని డయాట్ (DIET) కళాశాల ప్రాంగణాన్ని రెవెన్యూ మరియు రాజీవ్ విద్యా మిషన్ (RVM) అధికారులతో కలిసి ఆయన క్షేత్రస్థాయిలో పరిశీలించారు.

* 10 ఎకరాల విస్తీర్ణం.. అన్ని రకాల వసతులపై సమీక్ష

డైట్ కళాశాల ప్రాంగణంలో అందుబాటులో ఉన్న సుమారు 10.10 గుంటల (10 ఎకరాల 10 గుంటల) విస్తీర్ణాన్ని ఎమ్మెల్యే ప్రత్యక్షంగా పరిశీలించారు. ఈ సందర్భంగా పాఠశాల నిర్మాణానికి ఈ స్థలం ఏ మేరకు అనుకూలంగా ఉంటుంది?, విద్యార్థుల రాకపోకలకు రోడ్డు సదుపాయం ఎలా ఉంది?, కళాశాల సరిహద్దులు మరియు భవిష్యత్తు విస్తరణకు ఉన్న అవకాశాలు ఏమిటనే అంశాలపై రెవెన్యూ అధికారులతో సుదీర్ఘంగా చర్చించారు.

స్థలానికి సంబంధించిన స్పష్టమైన హద్దులు, సర్వే నంబర్లు మరియు కోఆర్డినేట్స్ (Co-ordinates) వివరాలను ఎటువంటి ఆలస్యం లేకుండా తక్షణమే అందజేయాలని సంబంధిత అధికారులను ఆదేశించారు. సర్వే ప్రక్రియ పూర్తయిన వెంటనే తదుపరి పరిపాలనా అనుమతులు, ప్రతిపాదిత ఆమోదాల ప్రక్రియను వేగవంతం చేయాలని స్పష్టం చేశారు.

* ప్రభుత్వ లక్ష్యం – కార్పొరేట్ స్థాయి విద్య

ఈ సందర్భంగా ఎమ్మెల్యే నాయిని రాజేందర్ రెడ్డి మాట్లాడుతూ.. “రాష్ట్రంలోని పేద, ఎస్సీ, ఎస్టీ, బీసీ, మైనార్టీ విద్యార్థులకు ఒకే చోట అత్యుత్తమ విద్యా ప్రమాణాలు, మెరుగైన మౌలిక వసతులు కల్పించాలనే సంకల్పంతోనే ప్రభుత్వం ఈ సమగ్ర పాఠశాలల రూపకల్పన చేసింది. విద్యతో పాటు క్రీడలు, డిజిటల్ విద్య, సురక్షితమైన మరియు ఆహ్లాదకరమైన విద్యా వాతావరణం ఇక్కడ అందుబాటులోకి వస్తుంది” అని తెలిపారు.

వరంగల్ పశ్చిమ నియోజకవర్గానికి కేటాయించిన ఈ పాఠశాల నిర్మాణం వేగవంతం అయ్యేలా అన్ని శాఖల అధికారులు సమన్వయంతో పనిచేయాలని సూచించారు. పరిపాలనాపరమైన అనుమతులు, హద్దుల నిర్ధారణ పనులు వేగంగా పూర్తి చేసి, శంకుస్థాపన నాటికి అన్ని ఏర్పాట్లు సిద్ధం చేయాలని స్పష్టం చేశారు.

* పాల్గొన్న అధికారులు…

ఈ క్షేత్రస్థాయి స్థల పరిశీలన కార్యక్రమంలో హనుమకొండ ఎమ్మిరో (MRO) రవీందర్ రెడ్డి, రెవెన్యూ ఇన్ స్పెక్టర్ (RI) దశరథ రామ్ రెడ్డి, ఆర్‌వీఎం (RVM) అసిస్టెంట్ ఇంజనీర్ (AE) అజీజ్, ఇతర శాఖల ప్రతినిధులు మరియు స్థానిక ప్రజాప్రతినిధులు పాల్గొన్నారు.