NHRC | 22A భూముల నిషేధిత జాబితాపై కీలక ఆదేశాలు

Published: 22 Sep 2026 • 08:44 AM

ఆకేరు న్యూస్,హైదరాబాద్ : తెలంగాణలో 22A కింద భూములను నిషేధిత జాబితాలో చేర్చడంపై జాతీయ మానవ హక్కుల కమిషన్‌ (NHRC) కీలకంగా స్పందించింది. ఈ వ్యవహారంపై తక్షణమే స్వతంత్ర విచారణ చేపట్టాలని తెలంగాణ ప్రభుత్వ ప్రధాన కార్యదర్శిని ఆదేశించినట్లు సమాచారం. సాధారణ ప్రజల ఆస్తులను 22A నిషేధిత జాబితాలో చేర్చడం వల్ల వారు ఎదుర్కొంటున్న ఇబ్బందులపై హైదరాబాద్‌కు చెందిన ఓ న్యాయవాది ఈ నెల 14న NHRCకు ఫిర్యాదు చేసిన నేపథ్యంలో ఈ ఆదేశాలు వెలువడ్డాయి.

ఫిర్యాదులో.. ప్రభుత్వం, రెవెన్యూ అధికారులు సరైన పరిశీలన లేకుండా కొందరు అమాయక ప్రజల భూములను 22A నిషేధిత జాబితాలో చేర్చడంతో తీవ్ర ఇబ్బందులు ఎదురవుతున్నాయని న్యాయవాది పేర్కొన్నారు.

తమ ఆస్తులపై హక్కులు ఉన్నప్పటికీ వాటిని నిషేధిత జాబితాలో చేర్చడం వల్ల భూముల రిజిస్ట్రేషన్లు, లావాదేవీలు నిలిచిపోతున్నాయని ఫిర్యాదులో వివరించినట్లు తెలుస్తోంది.
ఆస్తులపై హక్కులకు భంగం కలుగుతోందని ఫిర్యాదు

22A జాబితాలో భూములు చేరడంతో ఆయా ఆస్తుల యజమానులు తీవ్ర మానసిక ఆందోళనకు గురవుతున్నారని ఫిర్యాదుదారు NHRC దృష్టికి తీసుకెళ్లారు. ప్రభుత్వ విభాగాల నిర్ణయాల కారణంగా తమ ఆస్తులను స్వేచ్ఛగా వినియోగించుకోలేకపోవడం, విక్రయించలేకపోవడం వంటి సమస్యలు ఎదురవుతున్నాయని పేర్కొన్నారు.

ప్రజల ఆస్తులను నిషేధిత జాబితాలో చేర్చే ముందు సంబంధిత రికార్డులను సమగ్రంగా పరిశీలించాలని, తప్పుగా చేర్చిన భూములను నిషేధిత జాబితా నుంచి తొలగించేలా చర్యలు తీసుకోవాలని కోరినట్లు సమాచారం.

* స్వతంత్ర విచారణకు ఆదేశాలు..

ఈ ఫిర్యాదును పరిశీలించిన జాతీయ మానవ హక్కుల కమిషన్.. వ్యవహారంపై స్వతంత్రంగా విచారణ జరిపి వాస్తవాలను వెలుగులోకి తీసుకురావాలని తెలంగాణ ప్రభుత్వ ప్రధాన కార్యదర్శిని ఆదేశించినట్లు ఫిర్యాదుదారు వెల్లడించారు. నిషేధిత జాబితాలో భూముల చేర్పు విషయంలో అధికారులు నిబంధనలను పాటించారా? అర్హత లేని భూములను 22Aలో చేర్చారా? అనే అంశాలపై విచారణ జరగనుంది.

బాధితుల నుంచి వచ్చిన ఫిర్యాదులు, భూములకు సంబంధించిన రికార్డులు, రెవెన్యూ శాఖ వద్ద ఉన్న వివరాలను పరిశీలించి వాస్తవ పరిస్థితిని గుర్తించే అవకాశం ఉంది. విచారణలో తప్పులు జరిగినట్లు తేలితే బాధితులకు తగిన ఉపశమనం కల్పించే చర్యలు తీసుకోవాల్సి ఉంటుంది.

* బాధితులకు ఊరట లభించే అవకాశం..

22A నిషేధిత జాబితాలో తమ భూములు చేరడంతో ఇబ్బందులు పడుతున్న భూ యజమానులకు NHRC ఆదేశాలు ఊరటనిచ్చే అంశంగా మారాయి. అయితే, ప్రస్తుతం ఇది విచారణకు ఆదేశించిన దశలోనే ఉందని, తుది నిర్ణయం లేదా బాధితుల భూములను స్వయంచాలకంగా జాబితా నుంచి తొలగించినట్లు భావించకూడదు.

ఈ వ్యవహారంపై రాష్ట్ర ప్రభుత్వం, రెవెన్యూ శాఖ చేపట్టే తదుపరి చర్యలు కీలకంగా మారనున్నాయి. స్వతంత్ర విచారణలో వెలువడే నివేదిక ఆధారంగా బాధితులకు ఎలాంటి పరిష్కారం లభిస్తుందన్నది ఇప్పుడు ఆసక్తికరంగా మారింది.