Teacher Student Ratio Issue
ఆకేరు న్యూస్, సూర్యాపేట: ప్రభుత్వ పాఠశాలల్లో విద్యా వ్యవస్థను బలోపేతం చేసేందుకు ప్రభుత్వం కోట్లాది రూపాయలు ఖర్చు చేస్తోంది. కానీ క్షేత్రస్థాయిలో పరిస్థితి మాత్రం భిన్నంగా ఉంది. సూర్యాపేట జిల్లా తుంగతుర్తి మండలంలోని తూర్పుగూడెం జిల్లా పరిషత్ ఉన్నత పాఠశాల (ZPHS) ఇందుకు ప్రత్యక్ష నిదర్శనంగా నిలుస్తోంది. ఇక్కడ విద్యార్థుల సంఖ్య కంటే ఉపాధ్యాయుల సంఖ్యే ఆశ్చర్యకరంగా ఉంది.
*ప్రార్థనకు ముగ్గురు విద్యార్థుల హాజరు.. ఆరుగురు టీచర్ల పర్యవేక్షణ…
సాధారణంగా ఏ పాఠశాలలోనైనా వందలాది మంది విద్యార్థులు ప్రార్థన చేస్తుంటే, ఉపాధ్యాయులు వారిని క్రమశిక్షణలో పెట్టడం చూస్తుంటాం. కానీ తూర్పుగూడెం పాఠశాలలో పరిస్థితి రివర్స్లో ఉంది. తాజాగా జరిగిన పాఠశాల ప్రార్థన (Prayer) సమయంలో ఆరుగురు ఉపాధ్యాయులు హాజరుకాగా, వారి ముందు నిలుచున్న విద్యార్థులు మాత్రం కేవలం ముగ్గురే కావడం గమనార్హం. ఈ దృశ్యం చూసిన స్థానికులు విద్యాశాఖ తీరుపై విస్మయం వ్యక్తం చేస్తున్నారు.
*తరగతుల వారీగా విద్యార్థుల లెక్కలు ఇవే..
ఈ హైస్కూల్లో ఆరు నుంచి తొమ్మిదో తరగతి వరకు కలిపి మొత్తం ఎనిమిది మంది విద్యార్థులు మాత్రమే చదువుతున్నారు. కనీసం పదో తరగతిలో ఒక్క విద్యార్థి కూడా లేకపోవడం గమనార్హం. తరగతుల వారీగా విద్యార్థుల సంఖ్య పరిశీలిస్తే:
6వ తరగతి: ఒకరు (01)
7వ తరగతి: ఇద్దరు (02)
8వ తరగతి: ముగ్గురు (03)
9వ తరగతి: ఇద్దరు (02)
10వ తరగతి: నిల్ (00)
మొత్తం 8 మంది విద్యార్థుల కోసం ఆరుగురు ఉపాధ్యాయులు విధులు నిర్వహిస్తున్నారు. అంటే దాదాపు ఒక్కో విద్యార్థికి ఒక ఉపాధ్యాయుడు అందుబాటులో ఉన్నట్టే లెక్క.
*ప్రైవేట్ పాఠశాలల మోజు.. పర్యవేక్షణ లోపం?
గ్రామీణ ప్రాంతాల్లో సైతం ప్రైవేట్ పాఠశాలల హవా పెరగడం, తల్లిదండ్రులు తమ పిల్లలను ఇంగ్లీష్ మీడియం పేరుతో పట్టణాలకు పంపడం వల్ల ప్రభుత్వ పాఠశాలలు వెలవెలబోతున్నాయి. నాణ్యమైన విద్యా బోధన చేసే ప్రభుత్వ ఉపాధ్యాయులు అందుబాటులో ఉన్నప్పటికీ, విద్యార్థులు లేకపోవడంతో వారి బోధనా నైపుణ్యం వృథా అవుతోందని విద్యావేత్తలు ఆవేదన వ్యక్తం చేస్తున్నారు.
*వనరుల వృథాపై విమర్శలు…
కేవలం ఎనిమిది మంది విద్యార్థుల కోసం ఒక ఉన్నత పాఠశాలను నిర్వహించడం, అక్కడ ఆరుగురు ఉపాధ్యాయులను కొనసాగించడం ప్రభుత్వ ధనం దుర్వినియోగమేనని స్థానికులు అభిప్రాయపడుతున్నారు. ఇలాంటి పాఠశాలలను సమీపంలోని ఇతర స్కూళ్లలో విలీనం చేయడమో, లేదా ఇక్కడి ఉపాధ్యాయులను విద్యార్థుల సంఖ్య ఎక్కువగా ఉన్న చోటికి డిప్యుటేషన్పై పంపడమో చేయాలని విద్యాశాఖ అధికారులను కోరుతున్నారు.
తూర్పుగూడెం పాఠశాల పరిస్థితి ఇప్పుడు సోషల్ మీడియాలో కూడా వైరల్గా మారింది. దీనిపై జిల్లా విద్యాశాఖ అధికారులు ఎలా స్పందిస్తారో వేచి చూడాలి.
About the Author
