Raghannagudem| ఆధునిక సాగుపై అవగాహన

Published: 14 Oct 2026 • 08:40 PM

Raghannagudem| ఆకేరు న్యూస్, రాయపర్తి: వ్యవసాయంలో పెట్టుబడి ఖర్చులను తగ్గించి, నీటిని ఆదా చేస్తూ అధిక దిగుబడులు సాధించేలా రైతులు ఆధునిక సాగు పద్ధతులను అవలంబించాలని వ్యవసాయ అధికారులు సూచించారు. వరంగల్ జిల్లా రాయపర్తి మండలం రాఘన్నగూడెం గ్రామంలో బుధవారం ఆత్మ (ATMA) ఆధ్వర్యంలో నేరుగా విత్తే వరి సాగు, పత్తిలో కాపాస్ క్రాంతి పద్ధతులపై అవగాహన కార్యక్రమం నిర్వహించారు.

ఈ కార్యక్రమానికి వరంగల్ జిల్లా ఆత్మ ప్రాజెక్టు డైరెక్టర్ ఎం. విజయ నిర్మల, జాతీయ ఆహార భద్రతా పోషకాహార మిషన్ ఉమ్మడి వరంగల్ జిల్లా కన్సల్టెంట్ పి. సారంగం, రాయపర్తి మండల వ్యవసాయ అధికారి వీరభద్రం, వ్యవసాయ విస్తరణ అధికారి క్రాంతి, టెక్నికల్ అసిస్టెంట్ ఎం. రవికుమార్ హాజరై రైతులకు సాగు మెళకువలను వివరించారు.

నేరుగా విత్తే వరితో నీటి ఆదా

వరి సాగులో నాట్లు వేసేందుకు కూలీల కొరతను అధిగమించడంతో పాటు పెట్టుబడి ఖర్చులను తగ్గించేందుకు నేరుగా విత్తే వరి పద్ధతి ఉపయోగపడుతుందని అధికారులు తెలిపారు. సకాలంలో కలుపు నివారణ, నీటి యాజమాన్యం, సస్యరక్షణ చర్యలు చేపడితే సుమారు 30 శాతం వరకు నీటిని ఆదా చేసే అవకాశం ఉందని వివరించారు. రైతులు పంట దశలను బట్టి తగిన యాజమాన్య పద్ధతులను పాటించాలని సూచించారు.

పత్తిలో పురుగుల నివారణకు సూచనలు

పత్తి పంటను ఆశించే గులాబీ రంగు పురుగు, రసం పీల్చే పురుగుల నివారణకు తీసుకోవాల్సిన జాగ్రత్తలను అధికారులు వివరించారు. పురుగుల ఉధృతిని ముందుగానే గుర్తించి నష్టాన్ని తగ్గించేందుకు పసుపు రంగు జిగురు అట్టలు, లింగాకర్షక బుట్టలను వినియోగించే విధానాన్ని ప్రదర్శన క్షేత్రాల్లో వివరించారు. వేప నూనె వినియోగం, సమగ్ర సస్యరక్షణ చర్యలపై రైతులకు అవగాహన కల్పించారు.

వాంకుడోతండాలో ప్రకృతి సేద్యంపై శిక్షణ

కార్యక్రమంలో భాగంగా వాంకుడోతండాలో కృషి సఖిల ఆధ్వర్యంలో ప్రకృతి సేద్యంపై ప్రత్యేక శిక్షణ నిర్వహించారు. అనంతరం రాఘన్నగూడెం గ్రామ పరిధిలోని నేరుగా విత్తే వరి, పత్తి ప్రదర్శన క్షేత్రాలను అధికారులు, రైతులు సందర్శించి పంటల పెరుగుదల, సాగు పద్ధతులను పరిశీలించారు.

ఈ కార్యక్రమంలో గ్రామ సర్పంచ్, ఉప సర్పంచ్, వార్డు సభ్యులు, మండల వ్యవసాయ విస్తరణ అధికారులు, చుట్టుపక్కల గ్రామాల రైతులు పాల్గొన్నారు. ఆధునిక సాగు పద్ధతులపై అవగాహన పెంచుకొని, అందుబాటులో ఉన్న వనరులను సమర్థంగా వినియోగించుకోవాలని అధికారులు రైతులకు సూచించారు.