Raipur Students
* అంతర్జాతీయ రోబోటిక్స్ ఫైనల్కు ఇద్దరు విద్యార్థులు!
ఆకేరు న్యూస్, రాయ్పూర్: చిన్న వయసులోనే సాంకేతిక రంగంలో అద్భుత ప్రతిభ కనబరుస్తున్నారు ఛత్తీస్గఢ్లోని రాయ్పూర్కు చెందిన ఇద్దరు విద్యార్థులు. ఏడో తరగతి చదువుతున్న పరక్రమ్ సిన్హా, మొహమ్మద్ గౌస్ అన్సారీ అంతర్జాతీయ రోబోటిక్స్ పోటీలకు అర్హత సాధించి దేశం దృష్టిని ఆకర్షించారు. వీరిద్దరూ జాతీయ స్థాయి రోబోటిక్స్ ఛాంపియన్షిప్లో LEGO Line Follower విభాగంలో రెండో స్థానం సాధించారు.
రాయ్పూర్లోని వేదిక్ ఇంటర్నేషనల్ స్కూల్కు చెందిన ఈ విద్యార్థులు.. దక్షిణ కొరియాలో నవంబర్ 28, 29 తేదీల్లో జరగనున్న ‘రోబోటెక్స్ ఇంటర్నేషనల్ గ్రాండ్ ఫైనల్’లో భారత్కు ప్రాతినిధ్యం వహించనున్నారు. వివిధ విభాగాల్లో దేశం తరఫున ఎంపికైన 36 మంది విద్యార్థుల్లో వీరిద్దరూ చోటు దక్కించుకున్నారు.
* సెన్సార్ల సాయంతో దారి గుర్తించే రోబోట్!
విద్యార్థులు పాల్గొన్న LEGO Line Follower విభాగంలో ఒక నిర్దిష్ట మార్గాన్ని గుర్తించి, ఎలాంటి మానవ జోక్యం లేకుండా దానిని అనుసరించే రోబోట్ను తయారు చేయాలి. ఇందుకోసం సెన్సార్లు, ప్రోగ్రామ్ చేసిన సూచనలను ఉపయోగిస్తారు. రోబోట్ తన ముందున్న మార్గాన్ని గుర్తించి, దానికి అనుగుణంగా కదలికలను సర్దుబాటు చేసుకుంటూ గమ్యాన్ని చేరుకోవాలి. ఈ పోటీ ద్వారా విద్యార్థుల్లో రోబోటిక్స్, కోడింగ్, తార్కిక ఆలోచన, సమస్యలను పరిష్కరించే సామర్థ్యాలను పరీక్షిస్తారు. ఈ విభాగంలో తమ ప్రతిభను నిరూపించుకున్న పరక్రమ్, గౌస్ జాతీయ స్థాయిలో రెండో స్థానం సాధించి అంతర్జాతీయ వేదికకు చేరుకున్నారు.
* 7,000 మందికి పైగా విద్యార్థులతో పోటీ
జాతీయ రోబోటిక్స్ ఛాంపియన్షిప్లో 16కు పైగా రాష్ట్రాల నుంచి 7,000 మందికి పైగా విద్యార్థులు పాల్గొన్నారు. తొమ్మిది విభాగాల్లో 500కు పైగా రోబోట్లు పోటీపడ్డాయి. ఇంతటి పోటీలో రెండో స్థానం సాధించడం రాయ్పూర్ విద్యార్థుల ప్రతిభకు నిదర్శనంగా నిలిచింది.
* విద్యార్థులను అభినందించిన ఛత్తీస్గఢ్ సీఎం
అంతర్జాతీయ పోటీలకు అర్హత సాధించిన పరక్రమ్ సిన్హా, మొహమ్మద్ గౌస్ అన్సారీ నవంబర్ 19న రాయ్పూర్లోని తన నివాస కార్యాలయంలో ఛత్తీస్గఢ్ ముఖ్యమంత్రి విష్ణు దేవ్ సాయిని కలిశారు. ఈ సందర్భంగా సీఎం వారిని అభినందించి, దక్షిణ కొరియాలో జరగనున్న పోటీల్లో విజయం సాధించాలని ఆకాంక్షించారు. రోబోటిక్స్, అభివృద్ధి చెందుతున్న సాంకేతిక రంగాలపై ఆసక్తి పెంచుకోవాలని ఇతర విద్యార్థులకు కూడా పిలుపునిచ్చారు.
* ఎస్టోనియాలో ప్రారంభమైన రోబోటెక్స్ పోటీలు
ఎస్టోనియాలో ప్రారంభమైన రోబోటెక్స్ ఇంటర్నేషనల్ పోటీల్లో వివిధ దేశాలకు చెందిన యువ ప్రతిభావంతులు పాల్గొంటారు. లైన్ ఫాలోయింగ్ రోబోట్లు, రోబోట్ ఫుట్బాల్, సుమో, డ్రోన్ రేసింగ్, సమస్యల పరిష్కారం వంటి విభిన్న విభాగాల్లో పోటీలు నిర్వహిస్తారు.
ఇప్పుడు దక్షిణ కొరియాలో జరిగే గ్రాండ్ ఫైనల్లో అంతర్జాతీయ స్థాయి పోటీదారులతో తమ ప్రతిభను పరీక్షించుకునేందుకు ఈ ఇద్దరు విద్యార్థులు సిద్ధమవుతున్నారు. చిన్న వయసులోనే రోబోటిక్స్ రంగంలో సాధించిన ఈ విజయం.. సాంకేతిక విద్యపై ఆసక్తి ఉన్న ఇతర విద్యార్థులకు స్ఫూర్తిగా నిలుస్తోంది.

Please tell us what is wrong. Your report will be sent to the website team.

