Kavitha Kalvakuntla
Kavitha Kalvakuntla| ఆకేరు న్యూస్, హైదరాబాద్‌: తెలంగాణలో ప్రభుత్వ ఆసుపత్రుల భద్రత, మౌలిక వసతుల నిర్వహణపై మరోసారి చర్చ మొదలైంది. ఆదిలాబాద్‌ RIMSలో SNCU అగ్నిప్రమాదంలో ఐదుగురు శిశువులు మృతి చెందిన ఘటన మరువకముందే.. భూపాలపల్లి ప్రభుత్వ ఆసుపత్రిలోని SNCU వార్డులో సీలింగ్‌ కూలిన ఘటన వెలుగులోకి వచ్చింది. ఈ పరిణామాలను ప్రస్తావిస్తూ తెలంగాణ రక్షణ సేన నాయకురాలు కల్వకుంట్ల కవిత ప్రభుత్వంపై ప్రశ్నలు సంధించారు.
వరుస ఘటనలతో భద్రతపై చర్చ
ఆదిలాబాద్‌ RIMSలో సెప్టెంబర్‌ 22న జరిగిన అగ్నిప్రమాదంలో ఐదుగురు శిశువులు మృతి చెందారు. ఈ ఘటనపై ప్రభుత్వం విచారణకు ఆదేశించడంతో పాటు ప్రభుత్వ, ప్రైవేట్‌ ఆసుపత్రుల్లో భద్రతా ఆడిట్‌ నిర్వహించాలని నిర్ణయించింది. RIMSలో అత్యవసర మరమ్మతులు, మౌలిక వసతుల పునరుద్ధరణ కోసం ప్రభుత్వం రూ.11.1 కోట్లు విడుదల చేసినట్లు నివేదికలు వెల్లడించాయి.
ఈ నేపథ్యంలో భూపాలపల్లి ప్రభుత్వ ఆసుపత్రిలో SNCU సీలింగ్‌ కూలిన ఘటన ఆసుపత్రి భవనాల నిర్వహణపై దృష్టిని మళ్లించింది. సీలింగ్‌ కూలిన సమయంలో వార్డులో చిన్నారులు లేకపోవడంతో పెద్ద ప్రమాదం తప్పిందని తెలంగాణ రక్షణ సేన పేర్కొంది.
కవిత ప్రధాన ప్రశ్న ఇదే..
ప్రజలకు అత్యవసర వైద్యం అందించాల్సిన ప్రభుత్వ ఆసుపత్రుల్లోనే భద్రతా ప్రమాణాలపై ప్రశ్నలు ఎందుకు వస్తున్నాయని కవిత ప్రశ్నించారు. భవనాల నిర్వహణ, విద్యుత్‌ వ్యవస్థలు, అగ్నిమాపక పరికరాలు, ఇతర భద్రతా ఏర్పాట్లను ప్రభుత్వం క్రమం తప్పకుండా తనిఖీ చేయాలని ఆమె డిమాండ్‌ చేశారు.
ప్రభుత్వ ఆసుపత్రుల్లో మందులు, పారిశుద్ధ్యం, వైద్య సిబ్బంది, బెడ్ల కొరత వంటి సమస్యలు కూడా ఉన్నాయని తెలంగాణ రక్షణ సేన ఆరోపించింది. అయితే ఈ ఆరోపణలపై ప్రభుత్వం, వైద్యారోగ్య శాఖ నుంచి అధికారిక స్పందన రావాల్సి ఉంది.
‘ఆపరేషన్‌ బ్లూకోడ్‌’తో పరిశీలన
ప్రభుత్వ ఆసుపత్రుల వాస్తవ పరిస్థితులను పరిశీలించేందుకు ‘ఆపరేషన్‌ బ్లూకోడ్‌’ కార్యక్రమాన్ని చేపట్టనున్నట్లు తెలంగాణ రక్షణ సేన ప్రకటించింది. ఇందులో భాగంగా ఆసుపత్రుల్లో మౌలిక వసతులు, పారిశుద్ధ్యం, వైద్య సదుపాయాలు, భద్రతా ఏర్పాట్లను పరిశీలించి సమస్యలను ప్రజల దృష్టికి తీసుకువస్తామని తెలిపింది.
అసలు చర్చ నిర్వహణపైనే..
RIMS ఘటన తర్వాత ప్రభుత్వం భద్రతా ఆడిట్లకు ఆదేశించడం, మరమ్మతులకు నిధులు కేటాయించడం వంటి చర్యలు చేపట్టింది. అక్టోబర్‌ 1న జాతీయ బాలల హక్కుల పరిరక్షణ కమిషన్‌ (NCPCR) బృందం కూడా RIMSను పరిశీలించి ఘటనపై వివరాలు సేకరించింది.
ఇలాంటి పరిస్థితుల్లో ఒక్కో ఘటనను విడివిడిగా చూడటానికి బదులు.. ప్రభుత్వ ఆసుపత్రుల భవనాలు, విద్యుత్‌, ఫైర్ సేఫ్టీ, అత్యవసర స్పందన వ్యవస్థల నిర్వహణపై సమగ్ర పర్యవేక్షణ ఎంతవరకు జరుగుతోందన్నది ఇప్పుడు కీలక ప్రశ్నగా మారింది.
About the Author
Please tell us what is wrong. Your report will be sent to the website team.
