Telangana Rain Alert | తెలంగాణలో మళ్లీ భారీ వర్షాలు

Published: 10 Sep 2026 • 06:45 PM

* బంగాళాఖాతంలో మరో అల్పపీడనం..

* సెప్టెంబర్ 12 తర్వాత మరింత విస్తరించనున్న వర్షాలు

ఆకేరు న్యూస్, హైదరాబాద్ : బంగాళాఖాతంలో మరో అల్పపీడన ప్రాంతం ఏర్పడే అవకాశం ఉండటంతో తెలంగాణలో మళ్లీ భారీ వర్షాలు కురవనున్నాయి. సెప్టెంబర్ 11–12 తేదీల్లో అల్పపీడనం ప్రభావం పెరిగితే రాష్ట్రంలోని పలు ప్రాంతాల్లో వర్షాలు విస్తరించే అవకాశం ఉందని వాతావరణ అంచనాలు చిస్తున్నాయి. ముఖ్యంగా ఉత్తర, తూర్పు తెలంగాణ జిల్లాల్లో మోస్తరు నుంచి భారీ వర్షాలు కురిసే అవకాశం ఉందని అంచనాలు వెలువడుతున్నాయి. సెప్టెంబర్ 12 తర్వాత వర్షాల విస్తీర్ణం మరింత పెరిగే అవకాశం ఉండటంతో ప్రజలు అప్రమత్తంగా ఉండాల్సిన అవసరం ఉంది.

ఇప్పటికే వాతావరణ శాఖ బంగాళాఖాతంలో అల్పపీడనం ఏర్పడే పరిస్థితులపై నిఘా కొనసాగిస్తోంది. ఈ వ్యవస్థ ఏ దిశగా కదులుతుంది.. దాని తీవ్రత ఎలా ఉంటుంది అనే అంశాలపై ఆధారపడి తెలంగాణలో వర్షాల ప్రభావం మారే అవకాశం ఉంది. ఉత్తర తెలంగాణలో రైతులు, లోతట్టు ప్రాంతాల ప్రజలు అప్రమత్తంగా ఉండాలని సూచిస్తున్నారు. భారీ వర్షాలు నమోదైతే వాగులు, చెరువులు పొంగే అవకాశం ఉండటంతో స్థానిక పరిస్థితులను గమనిస్తూ జాగ్రత్తలు తీసుకోవాల్సి ఉంటుంది. హైదరాబాద్‌లో కూడా సెప్టెంబర్ 11 నుంచి 13 వరకు ఒకట్రెండు దఫాలుగా వర్షాలు లేదా ఉరుములతో కూడిన జల్లులు కురిసే అవకాశం ఉందని IMD అంచనా వేసింది. అల్పపీడనం దిశ, తీవ్రతపై రానున్న 24–48 గంటల్లో మరింత స్పష్టత వచ్చే అవకాశం ఉంది.