Telangana Secretariat Jobs
* ప్రొబేషన్‌లోనే అర్హత సాధించాలి
* ఏడాదికి రెండుసార్లు పరీక్షలు
Telangana Secretariat Jobs| ఆకేరు న్యూస్, డెస్క్: తెలంగాణ సచివాలయంలో పనిచేస్తున్న నిర్దిష్ట కేటగిరీల ఉద్యోగులకు ప్రభుత్వం కంప్యూటర్ ప్రొఫిషియెన్సీ పరీక్షను తప్పనిసరి చేసింది. ఉద్యోగంలో చేరిన తర్వాత ప్రొబేషన్‌ కాలంలోనే ఈ పరీక్షలో ఉత్తీర్ణత సాధించాలని స్పష్టం చేసింది. ఈ మేరకు తెలంగాణ సచివాలయ సబార్డినేట్ సర్వీస్ రూల్స్‌–1997లోని రూల్‌ 9(సి)ను సవరిస్తూ సాధారణ పరిపాలన శాఖ (జీఏడీ) 2025 డిసెంబర్ 2న G.O.Ms.No.238 ఉత్తర్వులు జారీ చేసింది.
ఎవరెవరికి వర్తిస్తుంది?
ఈ నిబంధన అసిస్టెంట్ సెక్షన్ ఆఫీసర్లు (ASO), సీనియర్ స్టెనోగ్రాఫర్లు, జూనియర్ స్టెనోగ్రాఫర్లు, టైపిస్ట్‌-కమ్‌-అసిస్టెంట్లు తదితర నిర్దేశిత పోస్టులకు వర్తిస్తుంది. ముఖ్యంగా 2014 మే 12 తర్వాత నియమితులైన ఉద్యోగులను ఈ సవరణ పరిధిలోకి తీసుకొచ్చారు. అయితే నియామక సమయంలోనే సంబంధిత కంప్యూటర్ పరీక్షలో ఉత్తీర్ణత సాధించని ఉద్యోగులు మాత్రమే ప్రొబేషన్‌ సమయంలో పరీక్ష రాసి అర్హత పొందాల్సి ఉంటుంది.
ప్రొబేషన్‌లోనే పాస్ కావాలి
‘ప్రొఫిషియెన్సీ ఇన్ ఆఫీస్ ఆటోమేషన్ విత్ యూసేజ్ ఆఫ్ కంప్యూటర్స్ అండ్ అసోసియేటెడ్ సాఫ్ట్‌వేర్’ పేరుతో నిర్వహించే శాఖాపరమైన పరీక్షలో ఉద్యోగులు ఉత్తీర్ణత సాధించాలి. ప్రొబేషన్‌ గడువులోపే ఈ అర్హతను పొందడం తప్పనిసరి అని ప్రభుత్వం నిబంధనలో స్పష్టం చేసింది.
ఏడాదికి రెండుసార్లు పరీక్షలు
ఈ పరీక్షల నిర్వహణ బాధ్యతను తెలంగాణ పబ్లిక్ సర్వీస్ కమిషన్‌ (TGPSC)కు అప్పగించారు. ఇతర శాఖాపరమైన పరీక్షలతో కలిపి ఏడాదికి రెండుసార్లు పరీక్ష నిర్వహించాలని ప్రభుత్వం ఆదేశించింది. ప్రభుత్వ కార్యాలయాల్లో కంప్యూటర్లు, ఆఫీస్ ఆటోమేషన్ సాఫ్ట్‌వేర్ వినియోగంపై ఉద్యోగులకు తగిన నైపుణ్యం ఉండేలా ఈ నిబంధనను అమలు చేయనున్నారు.
ఉద్యోగులు గమనించాల్సిన అంశాలు
ఈ ఉత్తర్వులు సచివాలయంలోని అన్ని ఉద్యోగులకు ఒకే విధంగా వర్తించవు. నిర్దేశిత పోస్టులు, నియామక తేదీ, నియామక సమయంలో కంప్యూటర్ ప్రొఫిషియెన్సీ పరీక్షలో ఉత్తీర్ణులయ్యారా లేదా అనే అంశాల ఆధారంగా వర్తింపును నిర్ణయిస్తారు. కాబట్టి సంబంధిత ఉద్యోగులు తమ సర్వీస్ రికార్డులు, పరీక్ష అర్హత వివరాలను పరిశీలించుకోవాల్సి ఉంటుంది.
About the Author
Please tell us what is wrong. Your report will be sent to the website team.
