Rayaparthi | మొక్కలు నాటిన సర్పంచ్ గారే సహేంద్ర భిక్షపతి

Published: 25 Aug 2026 • 07:38 PM

* రాయపర్తి ZPHS పాఠశాలలో ఘనంగా వనమహోత్సవం

ఆకేరు న్యూస్,రాయపర్తి:
పర్యావరణ పరిరక్షణ, పచ్చదనం పెంపొందించడమే లక్ష్యంగా చేపట్టిన వనమహోత్సవ కార్యక్రమంలో భాగంగా రాయపర్తి మండల కేంద్రంలోని జిల్లా పరిషత్ ఉన్నత పాఠశాల (ZPHS) ఆవరణలో మంగళవారం మొక్కల నాటే కార్యక్రమం అట్టహాసంగా జరిగింది. ఈ కార్యక్రమానికి రాయపర్తి గ్రామ సర్పంచ్ గారే సహేంద్ర భిక్షపతి, ముఖ్య అతిథిగా హాజరై, పాఠశాల ఆవరణలో ఉపాధ్యాయులు మరియు విద్యార్థులతో కలిసి పలు రకాల నీడనిచ్చే, పూల మొక్కలను నాటారు.

ఈ సందర్భంగా సర్పంచ్ గారే సహేంద్ర భిక్షపతి మాట్లాడుతూ… ప్రతీ ఒక్కరూ సామాజిక బాధ్యతగా స్వీకరించి మొక్కలను నాటాలని పిలుపునిచ్చారు. చెట్లను నాటడమే కాకుండా వాటిని సంరక్షించి, మహా వృక్షాలుగా ఎదిగేలా చూడాల్సిన బాధ్యత మనందరిపై ఉందన్నారు. భావితరాలకు స్వచ్ఛమైన గాలి, పచ్చని వాతావరణాన్ని అందించాలంటే పాఠశాల స్థాయి నుంచే విద్యార్థులలో పర్యావరణ స్పృహ పెంచాలని సూచించారు. పాఠశాల ఆవరణను పచ్చదనంతో నింపి, ఆహ్లాదకరమైన వాతావరణాన్ని ఏర్పరచాలని ఉపాధ్యాయులను, విద్యార్థులను కోరారు.

ఈ కార్యక్రమంలో స్పెషల్ ఆఫీసర్ , ఎల్ పి ఓ, ఎంపీడీవో, ఎంపీవో, పాఠశాల ప్రధానోపాధ్యాయులు (HM), ఉపాధ్యాయ బృందం, గ్రామ పంచాయతీ ప్రతినిధులు, పాఠశాల యాజమాన్య కమిటీ (SMC) సభ్యులు, ప్రజాప్రతినిధులు మరియు విద్యార్థులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.