* సిరిసిల్లలో టీ స్టాల్ మూసివేత‌పై కేటీఆర్ ఫైర్‌
ఆకేరు న్యూస్‌, హైద‌రాబాద్ : కేటీఆర్ ఫొటో పెట్టుకున్నందుకు టీ స్టాల్ తీసివేయించార‌ని ఓ వ్య‌క్తి సోష‌ల్‌మీడియాలో ఆవేద‌న వ్య‌క్తం చేస్తూ షేర్ చేసిన వీడియోపై బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్ (Ktr) స్పందించారు. తన ఫొటో, పేరు పెట్టుకున్నారని సిరిసిల్లలో ఓ టీ స్టాల్ మూసివేయించిన ఘటనపై తీవ్రంగా స్పందించారు. ప్రతీది గుర్తుపెట్టుకుంటున్నానని.. ఎవర్నీ వదిలిపెట్టే ప్రసక్తే లేదని హెచ్చరించారు. ఇదే మాట మీద ఉంటానని మీకు మాట ఇస్తున్నానని స్పష్టం చేశారు. ఈ మేరకు టీ షాపు యజమాని బత్తుల శ్రీనివాస్ ఆవేదనతో మాట్లాడుతున్న ఒక వీడియోను షేర్ చేశారు. రాజన్న సిరిసిల్ల జిల్లా (Siricilla District) కేంద్రానికి చెందిన బత్తుల శ్రీనివాస్ బతుకమ్మ ఘాట్‌ వద్ద గత నాలుగేళ్లుగా ‘కేటీఆర్ టీ స్టాల్’ నడిపిస్తున్నాడు. హోటల్‌ బోర్డుపై కూడా కేటీఆర్ ఫొటో పెట్టుకున్నారు. ఇది గమనించిన సిరిసిల్ల జిల్లా కలెక్టర్‌ సందీప్‌ కుమార్‌ ఝా ఆ హోటల్‌ను మూసేయించారు. అసలు ఆ టీ స్టాల్(T Stall)కు ట్రేడ్‌ లైసెన్స్‌ ఉందా? లేకుంటే హోటల్‌ను సీజ్‌ చేయండి అంటూ మున్సిపల్‌ అధికారులకు ఆదేశాలు జారీ చేశారు. కలెక్టర్‌ హుకుంతో వెంటనే రంగంలోకి దిగిన మున్సిపల్‌ సిబ్బంది టీ స్టాల్‌ను బలవంతంగా మూసివేయించారు. ట్రేడ్‌ లైసెన్స్‌ లేదన్న కారణంతోనే టీ స్టాల్ మూసివేశామని మున్సిపల్‌ అధికారులు చెబుతున్నారని.. కానీ అసలు కారణం అది కాదని శ్రీనివాస్ తెలిపాడు. కేటీఆర్ ఫొటో తీసేయాలన్న ఆదేశాల‌ను ప‌ట్టించుకోనందుకే ఈ చ‌ర్య‌ల‌కు పాల్ప‌డ్డార‌ని ఆరోపిస్తున్నాడు.
…………………………………………
