* సత్యసాయి ట్రస్ట్ సేవ‌లు మ‌రువ‌లేనివి
* మాజీ మంత్రి హ‌రీష్ రావు
* సత్య సాయి సంజీవిని చైల్డ్ హార్ట్ కేర్ సెంటర్ లో 196 మంది పిల్లలకు గుండె ఆపరేషన్
* గిఫ్ట్ ఏ లైఫ్ ప్రోగ్రాంలో పాల్గొన్న హ‌రీష్ రావు
ఆకేరు న్యూస్‌, సిద్దిపేట : సత్య సాయి సంజీవిని చైల్డ్ హార్ట్ కేర్ సెంటర్ లో 196 మంది పిల్లలకు ఉచిత గుండె ఆపరేషన్ చేయడం నిజంగా చాలా గొప్ప విషయమని మాజీ మంత్రి సిద్దిపేట ఎమ్మెల్యే హ‌రీష్ రావు అన్నారు. సిద్దిపేట జిల్లా కొండపాకలో సత్య సాయి సంజీవిని చైల్డ్ హార్ట్ కేర్ సెంటర్ లో 196 మంది పిల్లలకు ఉచిత గుండె ఆపరేషన్ చేసిన సందర్భంగా గిఫ్ట్ ఏ లైఫ్ ప్రోగ్రాంలో హ‌రీష్ రావు పాల్గొన్నారు. ఈ సందర్భంగా ఆయ‌న మాట్లాడుతూ ఈ హాస్పిటల్ కి వచ్చి పిల్లలతో, తల్లిదండ్రులతో మాట్లాడటం ఎంతో సంతోషంగా ఉంద‌న్నారు. సిబ్బంది సేవ‌ల‌ను చూసి ముగ్దున్ని అయ్యాను అన్నారు. వారి సేవా గుణంతో రోగుల‌ను అక్కున చేర్చుకుంటున్న తీరు అద్భుతంగా ఉంద‌న్నారు. అందుకు కాసేపు తృప్తిగా గ‌డ‌పాల‌ని సెల్ ఫోన్ స్విచ్ ఆఫ్ చేసుకున్నాన‌ని హ‌రీష్ అన్నారు.తల్లిదండ్రుల కళ్ళల్లో ఆ మెరుపులు చూస్తుంటే ఎంత ఆనందంగా ఉందో మాటల్లో చెప్పలేను అని అన్నారు. గాక్ట‌ర్ శ్రీనివాస్ చెప్పినట్టు ఈ హాస్పిటల్లో కేవలం మందులే కాదు దేవుని ఆశీర్వాదం, ప్రేమ దొరుకుతుంద‌ని అన్నారు.ఇక్కడ పనిచేసే ప్రతి ఒకరు చిరునవ్వుతో, ఆప్యాయంగా పలకరించి సేవ చేస్తున్నార‌ని అదే సగం రోగాన్ని తగ్గిస్తుంద‌ని హ‌రీష్ అన్నారు. దాదాపు రెండు దశాబ్దాల ప్రజా జీవితంలో కొన్ని పనులు అత్యంత సంతృప్తిని, ఆనందాన్ని కలిగిస్తాయ‌ని అందులో ఒకటి ఈ సత్యసాయి హార్ట్ ఇన్స్టిట్యూట్ నెలకొల్పడం అని హ‌రీష్ అన్నారు. కాళేశ్వరం ద్వారా నీళ్లను పంట పొలాలకు పారించి రైతుల కళ్ళల్లో ఆనందం చూశాను.
ఈరోజు గుండె ఆపరేషన్ జరిగిన పిల్లలు, వారి తల్లిదండ్రుల కళ్ళల్లో ఆనందాన్ని చూస్తున్నాను అని అన్నారు. సత్యసాయి ట్రస్ట్ వారు ఈ ప్రాంతంలో గర్భిణుల బాగోగులు చూసేందుకు ఒక ఆసుపత్రి పెట్టాలని అడిగారు. పిల్లలకు గుండాపరేషన్ చేసే ఆసుపత్రులను వివిధ రాష్ట్రాల్లో సత్యసాయి ట్రస్ట్ వారు నిర్వహిస్తున్నారు. అలాంటి ఆసుపత్రి ఒకటి ఇక్కడ పెట్టండి అని నేను వారికి విజ్ఞప్తి చేశాను. అని హ‌రీష్ తెలిపారు. ఇంత పెద్ద ఆసుపత్రి నిర్మించి వందల మంది పిల్లలకు ఉచితంగా ఆపరేషన్లు చేసే ఇంత గొప్ప కార్యక్రమం చేయడం చాలా గొప్ప విషయమని హ‌రీష్ అన్నారు.ఈ ప్రాంత ప్రజలుగా మనం ఎప్పటికీ సత్యసాయి ట్రస్టుకు, శ్రీనివాస్ గారికి రుణపడి ఉండాల‌ని హ‌రీష్ అన్నారు.ఇక్కడ ఆపరేషన్ చేసుకున్న వారందరూ పేదవారే. ఇంతకుముందు వారు మాటల్లో చెప్పారు. రోజుకి రెండు మూడు వందల రూపాయల కూలి పనిచేసే వాళ్లము అని చెప్పారు. మీరు వీరికి అందించిన వైద్యం చాలా గొప్పది. ఒక జీవితాన్ని ఇస్తుంద‌ని హ‌రీష్ అన్నారు,పుట్టపర్తి ఆశ్రమంలో ప్రపంచ దేశాల నుండి ఉన్నత స్థాయిలో ఉన్నవారు కూడా వచ్చి పని చేస్తారు. ఆ పిల్లల ముఖంలో ఆనందాన్ని చూస్తే నాకు కొత్త ఉత్సాహం కలిగింద‌ని అన్నారు. ఈ కార్యక్రమం గురించి ఎక్కువ మందికి తెలపాలి. ఇంకెక్కువమంది దీని ద్వారా లబ్ధి పొందాలని కోరుకుంటున్నాన‌ని అన్నారు. 2,60,000 మంది పిల్లలు దేశంలో గుండె సమస్యతో బాధపడుతుంటే కేవలం 10 శాతం మందికి మాత్రమే వైద్యం అందుతున్నద‌ని ఆవేద‌న వ్య‌క్తం చేశారు.
ఇంకా ఈ దేశంలో దాదాపు 60, 70 వేల మందికి ప్రతి సంవత్సరం వైద్యం అందడం లేద‌ని అన్నారు. హాస్పిటల్ లో ఒక ఆపరేషన్ థియేటర్ ఉంద‌ని ఆపరేషన్లు పెరిగిన కొద్దీ ఇంకో ఆపరేషన్ థియేటర్ ఓపెన్ చేసి ఎంతమందికైనా వైద్యం అందిస్తామని సిబ్బంది తెల‌ప‌డం చాలా ఆనందంగా ఉంద‌ని అన్నారు. ఇక్కడ ట్రైనింగ్ సెంటర్ ని కూడా ఏర్పాటు చేసి నిరుద్యోగులకు ఉపయోగపడే విధంగా కార్యక్రమం చేపడతామని హ‌రీష్ రావు అన్నారు.
…………………………………………………….
