* ఎల్బీనగర్ చట్నీస్ హోటల్లో పేలుడు!
ఆకేరు న్యూస్, హైదరాబాద్: ఎల్బీనగర్ బ్రాంచ్లో చట్నీస్ హోటల్లో పేలుడు ప్రమాదం చోటుచేసుకుంది. శుక్రవారం హోటల్ కిచెన్లో ఒక్కసారిగా పేలుడు సంభవించడంతో అక్కడ ఉన్న సిబ్బంది, కస్టమర్లు తీవ్ర భయాందోళనకు గురయ్యారు. ప్రాథమిక సమాచారం ప్రకారం.. హోటల్ వంటగదిలోని ఇడ్లీ స్టీమర్ ఒక్కసారిగా పేలిపోయింది. ఈ ప్రమాద సమయంలో అక్కడ పనిచేస్తున్న ముగ్గురు సిబ్బందికి గాయాలయ్యాయి. పేలుడు ధాటికి పెద్ద శబ్దం రావడంతో హోటల్లో ఉన్న కస్టమర్లు ప్రాణభయంతో బయటకు పరుగులు తీశారు. ప్రమాదం జరిగిన వెంటనే అప్రమత్తమైన హోటల్ యాజమాన్యం మరియు ఇతర సిబ్బంది, గాయపడిన వారిని చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం వారి పరిస్థితి నిలకడగానే ఉన్నట్లు తెలుస్తోంది. సమాచారం అందుకున్న ఎల్బీనగర్ పోలీసులు ఘటన స్థలానికి చేరుకుని పరిశీలించారు. స్టీమర్లో ప్రెజర్ పెరగడం వల్లే ఈ ప్రమాదం జరిగిందా? లేక సాంకేతిక లోపం ఏమైనా ఉందా? అనే కోణంలో పోలీసులు విచారణ జరుపుతున్నారు. ఆస్తి నష్టం మరియు ఇతర వివరాలను అధికారులు సేకరిస్తున్నారు. హైదరాబాద్లోని రద్దీ ప్రాంతాల్లో ఒకటైన ఎల్బీనగర్లో ఇలాంటి ప్రమాదం జరగడం స్థానికంగా చర్చనీయాంశమైంది. మరిన్ని వివరాలు తెలియాల్సి ఉంది.
About the Author
Please tell us what is wrong. Your report will be sent to the website team.
