RAKSHITH SHETTY | కాపీరైట్ కేసులో కోర్టు తీర్పు

Published: 02 Apr 2026 • 10:36 AM

* సినిమా పాటల కోసం భారీ పెనాల్టీ

* ఢిల్లీ హైకోర్టు భారీ జరిమానా.. రూ. 25 లక్షలు చెల్లించాలని ఆదేశం

* ‘బ్యాచిలర్ పార్టీ’ సినిమాకు మ్యూజిక్ సెగ

* రక్షిత్ శెట్టి స్టూడియోపై కోర్టు సీరియస్.

ఆకేరు న్యూస్, డెస్క్: ప్రముఖ కన్నడ నటుడు, దర్శకుడు మరియు నిర్మాత రక్షిత్ శెట్టికి ఢిల్లీ హైకోర్టులో చుక్కెదురైంది. ఆయన నిర్మాణ సంస్థ ‘పరమ్వా స్టూడియోస్’ నిర్మించిన ‘బ్యాచిలర్ పార్టీ’ సినిమాలో అనుమతి లేకుండా పాటలను వాడుకున్నందుకు గానూ రూ. 25 లక్షల భారీ జరిమానా విధిస్తూ న్యాయస్థానం తీర్పునిచ్చింది.

అసలేం జరిగింది?
‘బ్యాచిలర్ పార్టీ’ సినిమాలో ‘న్యాయ ఎల్లిదె’ (Nyaya Ellide), ‘ఒమ్మె నిన్నన్ను’ (Omme Ninnannu) అనే రెండు పాటలను తమ అనుమతి లేకుండా వాడుకున్నారని ప్రముఖ మ్యూజిక్ కంపెనీ MRT మ్యూజిక్ కోర్టును ఆశ్రయించింది. ఈ పాటల హక్కులు తమ వద్దే ఉన్నాయని, సినిమా వాణిజ్యపరమైన ప్రయోజనాల కోసం వీటిని అక్రమంగా ఉపయోగించారని ఫిర్యాదులో పేర్కొన్నారు.

కోర్టులో వాదనలు:
రక్షిత్ శెట్టి తరఫు న్యాయవాదులు కోర్టులో తమ వాదనలు వినిపిస్తూ.. ‘న్యాయ ఎల్లిదె’ పాటను కేవలం 7 సెకన్లు, ‘ఒమ్మె నిన్నన్ను’ పాటను కేవలం 31 సెకన్లు మాత్రమే వాడామని, ఇంత తక్కువ సమయం వాడటం కాపీరైట్ ఉల్లంఘన కిందకు రాదని పేర్కొన్నారు. అయితే ఈ వాదనను న్యాయమూర్తి జస్టిస్ తేజస్ కారియా తోసిపుచ్చారు. పాట ఎంత సేపు వాడారన్నది ముఖ్యం కాదని, అది సినిమా కథలో భాగంగా, ఉద్దేశపూర్వకంగానే వాడారని కోర్టు అభిప్రాయపడింది. గతంలో ఇచ్చిన కోర్టు ఆదేశాలను పాటించనందుకు గానూ జరిమానాతో పాటు కోర్టు ధిక్కరణ కింద కూడా సీరియస్ అయ్యింది.

తీర్పు:
రక్షిత్ శెట్టి జైలు శిక్ష నుంచి మినహాయింపు పొందినప్పటికీ, MRT మ్యూజిక్ సంస్థకు నష్టపరిహారంగా రూ. 25 లక్షలు చెల్లించాలని కోర్టు స్పష్టం చేసింది. సినిమా థియేటర్లలోనే కాకుండా OTT ప్లాట్‌ఫామ్‌లలో కూడా ఈ పాటలను వినియోగించడాన్ని తప్పుబట్టింది.